Amosi 8 - Chiyawo Bible

Amosi akuluwona lukalala lwa yisogosi yejiwu

¹ Yine soni yiŵandosisye AMBUJE kupitila m'mesomkulola ni ayi: Naluweni lukalala lwa yisogosi yejiwu.

² AMBUJE ŵambusisye kuti, “Amosi, ana cici cimkuciwonaci?” Une najanjile kuti, “Lukalala lwa yisogosi.” Kaneko AMBUJE ŵasalile kuti, “Ndaŵi jakumalisya pa ŵandu ŵangu Aisalaeli jikwanile. Nginjenga soni nganisyo syangu pa yakwapa jemanjajo cilango.

³ Pa lisiku lyelelyo nyimbo sya m'majumba ga ucimwene tisicisanduka kulila. Mitembo ja ŵandu tijicitupa. Tacijasidwa mwa kacetecete.”

Cilango ca Aisalaeli

⁴ Amosi jwatite kuti, mpikane ayi jemanja ŵimkusimwapondelesya ŵakulaga ni kusosa kwajonanga ŵandu ŵakulaga ŵa mcilambomu.

⁵ Jemanja mkusaliwusya mwacimsyene mcitiji kuti, “Ana cindimba ca pakukopoka kwa mwesi ticicimala cakaci kuti tusumisye tiligu jwetu? Ana lisiku lyakupumula* lya Ayuda tilimale ndaŵici kuti tutande soni kusumisya malonda getu? Kaneko ni tupate lipesa lyakunondiya mipimo kuti tukwesye mitengo, ni kwajiŵila ŵandu ni masikelo ga unami.

⁶ Tukombolekatu kusumisya tiligu jwetu jwangali mate pa mtengo wapenani. Citumsimane mundu jwakulaga jwele jwalepele kupeleka ngongole jakwe ja sapato, ni uwe citumsume mundujo mpela kapolo jwetu.”

⁷ Kaneko AMBUJE Mlungu jwa Isalaeli, alumbile kuti, “Ngasindiŵalila yitendo yenu yakusakala.

⁸ Ligongo lya yeleyi cilambo cosope ticicitenganyika, nipo wosope ŵakutama mwelemo tacitenda canasa. Cilambo cosope ticicitenganyika, kukwela ni kupwela mpela Lusulo lwa Nayilo.

⁹ Ndaŵi jikwisa jele tinjilitiŵisya lyuŵa musi nipo pacilambo tipaciŵa cipi musi. Une AMBUJE Jwamaciligosope mbecete myoyo.

¹⁰ Yindimba yenu tinjiyisandusya kuŵa malilo ni kusicenga nyimbo syenu syakusangalala kuŵa sya malilo. Tinjimyola umbo ni kum'weca yisaka, nipo timciŵa mpela acinangolo ŵakumlilila mwanace jwawo jumo pejo. Lisiku lyelelo tiliciŵa lyakupweteka mpaka kumbesi kwakwe.

¹¹ “Ndaŵi jikwisa jitinjitumisya sala pa cilambo. Ŵandu taciwa ni sala nambo ngaŵaga ja mkate, kapena njota ja mesi, nambo sala jakusoŵa maloŵe ga AMBUJE. Une AMBUJE mbecete myoyo.

¹² Ŵandu tacigambaga kwendajenda aku na kuku, kutyoka ku nyasa jine kuja ku nyasa jijakwe. Taciŵa ali mkulolesya palipose maloŵe ga AMBUJE, nambo ngasagasimana.

¹³ Pa lisiku lyelelo atamose acacanda ni ŵali ŵamacili gawo tacikomoka ni njota.

¹⁴ Wosope ŵakusalumbila mu lina lya Asima mlungu jwa ku Samaliya ni kuŵecetaga kuti, ‘Pali Mlungu jwa ku Dani,’ kapena kuti, ‘Palili litala lyakusaguka lyakuja ku Belesheba’, wosopewo tacigwa ngajimuka soni.”