Amosi 6 - Chiyawo Bible

Conasiko ca Isalaeli

¹ Likungu kwa jemanja ŵimkusatama mwangatenganyika ku Siyoni,* soni jemanja ŵimkusatama mwangalaga ku Samaliya. Likungu kwa jemanja ŵandu ŵakupikanika pasikati pa Aisalaeli, kwa ŵele ŵandu akusayika kwa jemanja kuti mwakamucisye!

² Mjawule ku msinda wa Kaline mkalole. Mjawule soni ku Hamati msinda wakupikanika ula, ni mjawule soni ku msinda wa Gati wa Afilisiti. Ana jemanjajo ŵaliji ŵakupunda mnope kwapunda ŵandu ŵa ku ma ucimwene ga Yuda ni Isalaeli Ana cilambo cawo caliji cekulungwa kupunda ca jemanja?

³ Jemanja ngamkuganisya kuti tiliciyika lisiku lya cilango, yimkutenda jemanja yili yakuti tiyicijanguyisya lisiku lya ciwawalyo.

⁴ Likungu kwa jemanja ŵimkusagona pa yindanda yesalalisye ni misengo ja ndembo, jemanja ŵimkusagamba kutama mwakulijongola pa mipando jenu ni kutendaga yindimba ya nyama ja ŵanace ŵangondolo ni ŵanace ŵa ng'ombe ŵakwimbala!

⁵ Mkusanonyela kupeka nyimbo, mpela muŵatendelaga Daudi,* ni kusijimba pakamulisya masengo yida yakwimbila ya ngonji.

⁶ Mkusamwela finyo mu migawo jegumbale, ni kupakala mawuta gakununjila mnope, nambo ŵangadandawula ni konasika kwa cilambo ca Yosefe.

⁷ Ali ni ligongo lyakwe jemanja timciŵa ŵandanda kwawula ku ukapolo. Yindimba ni yisangalalo yenu tiyicim'malila jemanja.

⁸ AMBUJE Mlungu Jwamaciligosope akuŵeceta kuti, “Nguŵengana ni yele yakunyadila ŵandu ŵa ku Isalaeli; nguŵengana nasyo nyumba syawo syekulungwa. Tinjipeleka kwa amagongo ŵawo likulungwa lyawo ni yosope ya mwelemo.”

⁹ Naga mwiŵasamo akulupwice ŵandu likumi ni akuŵa m'nyumba jimpepe, nombe nawo taciwa.

¹⁰ Mlongo mjakwe jwa jumo mwa ŵakuwawo, jwakwenela kwendesya ya malilo, taciyika kukukoposya mtembo m'nyumbamo. Sambano tacimwusya jwine jwasigalile m'nyumbamo kuti, “Ana mwelemo mwana soni jwine jwa umi?” Jwalakwejo tacijanga kuti “Iyayi, mwangali.” Kaneko jwacinasijo tacijila kuti, “Mtame pee! Tukalinga kukolanga lina lya AMBUJE.”

¹¹ AMBUJE pitacigamba kulamula, nyumba syekulungwa ni sya mwana tisicigumuka kusanduka yibulumwa.

¹² Ana mahaci mpaka gawutuce pa maganga? Ana pana mundu jwalijose jwakusalima pa nyasa ni ng'ombe? Sambano cilungamo mcisandwisye kuŵa cindu cakogoya ca ukali, soni yakulungama myitesile kuŵa yakulemweceka.

¹³ Mkusimnyada kuti mwawupundile msinda wa Lodebala, mkuŵeceta kuti, “Ana eti paja twawupundile msinda wa Kalinaimi ni macili getu jikape?”

¹⁴ Nambo AMBUJE, Mlungu Jwamaciligosope akuti, “Ŵandu ŵa ku Isalaeli, tinjimtandila ŵandu ŵa mtundu wine kuti apute namwe ngondo. Tacimlagasya kutyocela ku Mpata wa Hamati kumpoto kwa Lusulo lwa Alaba kum'mwela.”