Amosi 5 - Chiyawo Bible

Maloŵe gakwadandawulila Aisalaeli

¹ Jemanja ŵandu ŵa ku Isalaeli mpikane maloŵe aga gingumsalila mwakumdandawulila.

² Mwali Isalaeli agwile, mwakuti ngasajimuka soni. Agwile ni kuliŵalicika pa cilambo cakwe soni pangali jwine jwakumjimusya.

³ AMBUJE Mlungu akuŵeceta kuti, “Msinda wa ku Isalaeli ukutumisya asilikali 1,000 kuja kuputa ngondo tiwucisigala ni asilikali 100; nipo msinda wawutumisye asilikali 100 kuja kuputa ngondo tiwucisigala ni asilikali likumipe.”

⁴ AMBUJE akwasalila Aisalaeli kuti, “Myice kwa Une, nipo timciŵa ni umi.

⁵ Mkajawula ku Giligala kapena ku Beteli atamose ku Belesheba. Giligala tacimdudulusya kuja najo ku ukapolo nipo Beteli tacijonanjidwa.”

⁶ Mtende yeleyi kuti mŵe ni umi. Naga ngamkutenda yeleyi tacilijoca ni moto liŵasa lya Isalaeli. Motowo tiwucajoca ŵandu ŵa ku Beteli, soni pangali jutacipakombola kuwusimisya.

⁷ Mkwete likungu, jemanja ŵimkusacitenda kuti cakuwona kuti ciŵe cakusakala ni kunyosya cilungamo!

⁸ AMBUJE ŵapanganyisye ndondwa, syakolanjidwa Puleyasi ni Oliyoni. Jwalakwejo akusasandusya cipi kuŵa musi, soni musi kuŵa cilo. Jwalakwejo akusagaŵilanga mesi ga m'nyasa ni kugataga pa cilambo capasi. Lina lyawo lili AMBUJE.

⁹ Jwalakwejo ni jwakusiŵajonanga ŵakulamulila ŵangalwe, ni kugumula mapupa gawo.

¹⁰ Jemanja mkusaŵengana ni jwakulamula jwakusisyana ni yangalungama, mkusaŵengana soni ni mundu jwakusaŵeceta yakuwona pa nganya ja magambo.

¹¹ Mkusimwaliŵatila ŵakulaga ni kwajiŵila yagowola yawo. Ali ni ligongo lyakwe atamose kuti mtaŵile majumba ga maganga ga kusepa, ngasimtamamo kapena soni kumwa finyo kutyocela ku migunda jenu ja mipeleya jimwapandile.

¹² Une ngumanyilila winji wa ulemwa* wenu ni ukulu wa magambo genu. Jemanja mkusimwalagasya ŵandu ŵambone, ni kupocelaga yipupu ni kulamula mwangajenela magambo ga ŵandu ŵakulaga ku nganya sya magambo.

¹³ Myoyo pa ndaŵi mpela jeleji, mundu jwakalamuka akaŵeceta cilicose ligongo jili ndaŵi jakusakala.

¹⁴ Mŵiceje mtima wenu pa yindu yayili yambone, ngaŵaga yakusakala, kuti mŵe ni umi. Kaneko AMBUJE Mlungu Jwamaciligosope taciŵa ni jemanja mpela mumŵecetelemo.

¹⁵ Mŵengane naco cele cili cakusakala, nipo mnonyeleje ayo yayili yambone, ni kulolecesya kuti cilungamo cikutendekwa mu nganya sya magambo. Mwine mwakwe AMBUJE tacitenda canasa kwa ŵandu ŵa cilambo acino ŵele ŵali ciŵela cijumi.

¹⁶ Myoyo AMBUJE, Mlungu Jwamaciligosope akuŵeceta kuti, “Tikuciŵa kulila m'misewu josope ja mu msinda. Atamose anamalima taciŵilanjidwa kukwalila ŵawe pampepe ni ŵandu wamba ŵele ŵalipilidwaga mbiya kuti alile malilo.

¹⁷ Tikuciŵa kulila m'migunda ja mipeleya. Yosopeyi tiyicitendekwa ligongo ngwisa kukumpa cilango jemanja.” AMBUJE Mlungu aŵecete myoyo.

¹⁸ Likungu tiliciŵa kwa jemanja ŵimkulikumbila lisiku lya AMBUJE! Ana lisiku lyelelyo tilicimpindulila cici jemanja? Kwa jemanja tiliciŵa lisiku lya cipi nipo ngaŵa lya lilanguka.

¹⁹ Tikuciŵa mpela mwakusatendela mundu jwakutila lisimba nipo kaneko akusimana ni cimbalangondo! Kapena jwine jwakwe jwakuti ajinjile m'nyumba ni kwegamila pepupa ni ligasa lyakwe ni kulumidwa ni lijoka!

²⁰ Lisiku lya AMBUJE tiliciyika ni cipi ngaŵa lilanguka; tiliciŵa lisiku lya likungu, kwangali lilanguka lililyose.

²¹ AMBUJE akuti, “Ngusaŵengana nago masiku ga jemanja ga yindimba, soni ngusinaganyosya!

²² Pitimcipeleka mbopesi syakutinisya ni sya utandi, ngisinisipocela; ngisimbocela mbopesi syenu sya mtendele sya nyama syakwimbala.

²³ Mkasokosa une ni nyimbo syenu, ngangusosa kupikana yida yenu yakwimbila ya ngonji.

²⁴ M'malo mwakwe, akunde cilungamo cijendelecele mpela mesi ga mu lusulo lwangapwela.

²⁵ “Jemanja ŵandu ŵa ku Isalaeli, unetu nganilamula kuti mumbe mbopesi ni yakupeleka pa yaka 40 yinamlongolele mcipululu mula.

²⁶ Nambo sambano pa ligongo lyakuti mlambile yimanyisyo ya Sakuti, mwenye jwenu, ni ndondwa ajila jakolanjidwa Kaiwani, mlungu jwenu, jwele jimwalipanganyicisye mwacimsyene, timyinyakuleje yilandanyo yeleyi,

²⁷ pa ndaŵi jitinjimjigala jemanja kuja namwe ku ukapolo kupunda msinda wa Damasiko,” AMBUJE akuŵeceta myoyo ŵele lina lyawo lili Mlungu Jwamaciligosope.