Amosi 3 - Chiyawo Bible

¹ Jemanja ŵandu ŵa ku Isalaeli, mpikane maloŵe gaŵecete AMBUJE gakwamba jemanja, liŵasa lyosope liŵalikopwesye mcilambo ca Iguputo:

² “Une namsagwile ni mkusamalila jemanja jikape pasikati pa mitundu josope ja pa cilambo capasi. Myoyo tinjimpa cilango cakogoya ligongo lya ulemwa* wenu wosope.”

Masengo ga jwakulocesya

³ Ana ŵandu ŵaŵili mpaka ajende yalumo mkanapangane?

⁴ Ana lisimba likusalila mu ukweti mkanilikamule nyama? Ana mwanace jwa lisimba akusatuluma mu mbanga mwakwe, mkanakamule kandu?

⁵ Ana cijuni mpaka citule pa lipetwa, pali pangali nyambo jakwe? Ana lipetwalyo mpaka ligambe kulikopola lisyene mkanilitanjisye kandu?

⁶ Ana lipenga lya ngondo mpaka lilile mu msinda ŵandu ngatenda woga? Naga likungu liyice mu msinda, ana ngaŵaga AMBUJE ni ŵalitumisye?

⁷ Yakuwona, AMBUJE Ŵamaciligosope ŵangatanda kuganisya kutenda mkaniŵamanyisye ŵakutumicila ŵakwe, ŵakulocesya.*

⁸ Lisimba naga likubangula, ana ŵani ŵangatenda woga? AMBUJE Mlungu naga akuŵeceta, ana ŵani mpaka atende ngaja kukulalicila utenga wakwewo?

Cilango ca Asamaliya

⁹ Mjenesye kwa ŵandu ŵakutama m'majumba ga ucimwene ku Iguputo ni ku Ashidodi: “Mwasalile kuti akasongane ku matumbi ga ku Samaliya, kuti akalole cipwilikiti ni yaciswamba yayikutendekwa kweleko pasikati pa ŵandu ŵakwe.”

¹⁰ AMBUJE akuŵeceta kuti, “Ŵandu ŵeleŵa akugumbasya majumba gawo ni yindu yakuyipata mwa ngondo ni mwawiyi. Jemanjaji ngakumanyilila kutenda yakulungama.

¹¹ Myoyo, amagongo tacisyungulila cilamboco, ni kugagwisya mapupa gakwe, ni kujigala yosope yayili mwelemo.”

¹² AMBUJE akuŵeceta kuti, “Mpela mkucinga akusapokasya ngongolo siŵili mkamwa mwa lisimba, kapena lusonga lwa lipikanilo lya ngondolo jakwe, myoyo soni tacakulupusya ŵanace ŵa Isalaeli ŵakutama mu Samaliya, ŵakugona pa yindanda ya mtengo wapenani.

¹³ Mpikane sambano, ni kwakalamusya ŵandu ŵa mwiŵasa lya Yakobo,”* akuti myoyo AMBUJE, Mlungu Jwamaciligosope.

¹⁴ “Pa lisiku litinjipeleka cilango kwa Aisalaeli ligongo lya yakulemwa yawo, tinjigumula malo gakupelecela mbopesi ga ku Beteli, soni misengo ja malo gakupelecela mbopesi tijicitemanguka ni kugwa pasi.

¹⁵ Tinjigwisya nyumba sya ŵandu syakusatama mu ndaŵi ja cawu ni ja cuku. Nyumba syakusalalisya ni misengo ja ndembo ticisiŵa masame; nyumba jilijose jajikulungwa tijiciŵa masame.”