Amosi 1 - Chiyawo Bible

¹ Aga ni maloŵe ga Amosi mkucinga jwangondolo jwa ku Tekowa. Akuŵeceta yiŵayiweni yakwayana ni ŵandu wa cilambo ca Isalaeli yaka yiŵili mkanicitendecekwe cisicinya. Pa ndaŵi jeleji Usiya jwaliji mwenye jwa ku Yuda, soni Yelobowamu mwanace jwa Yowashi jwaliji mwenye jwa ku Isalaeli.

² Amosi jwatite, “AMBUJE akubangula ku Siyoni,* maloŵe gawo gakupikanika mpela kulindima ku Yelusalemu. Ni ligongo lyakwe malo gakulicisya yilangwa gajumwile, soni manyasi ga Petumbi lya Kalimeli gakunyala.”

Cilango ca Mlungu pa yilambo yakusyungulila Isalaeli Siliya

³ AMBUJE akuŵeceta kuti, “Ŵandu ŵa ku Damasiko akupitilisya kulemwa, myoyo tinjapa cilango. Jemanjajo ŵalagasyaga ŵandu ŵa ku Giliyadi.

⁴ Myoyo tinjitumisya moto pa nyumba ja ucimwene jijataŵidwe ni Mwenye Hasaele soni motowo tiwucijoca mapupa ga nyumba ja Mwenye Beni Hadadi.

⁵ Tinjiposokolanya yipata ya Damasiko ni kwatyosya ŵakutama mu Ciŵata ca Afeni, soni ni jwele jwakamulile simbo ja ucimwene ku Beti Edeni. Ŵandu ŵa ku Siliya tacijigalidwa ukapolo kuja nawo ku cilambo ca Kili.”

Filisitiya

⁶ AMBUJE akuŵeceta kuti, “Ŵandu ŵa ku Gasa akupitilisya kulemwa, myoyo tinjapa cilango. Jemanjajo ŵajigele mtundu wosope wa ŵandu ni kuja kuwusumisya mpela acikapolo kwa ŵandu ŵa ku Edomu.

⁷ Myoyo tinjitumisya moto pa mapupa gakuwucinjilicisya msinda wa Gasa, ni mapupago tigacijocedwa.

⁸ Tinjijonanga ŵandu wosope ŵakutama ku Ashidodi, soni mundu jwakukamulila simbo ja ucimwene wa ku Ashikeloni. Ni mkono wangu, tinjawulaga ŵandu ŵa mu msinda wa Ekiloni, nipo Afilisiti wosope ŵakusigalila tacijonasika.”

Taya

⁹ AMBUJE akuŵeceta kuti, “Ŵandu ŵa ku Taya akupitilisya kulemwa, myoyo tinjapa cilango. Jemanjajo ŵapelece mtundu wosope wa ŵandu ku Edomu, nganasunga cilanga* ca ulongo ciŵatesile cila.

¹⁰ Myoyo tinjitumisya moto pa mapupa gakucinjilicisya Taya, nipo motowo tiwucijoca mapupa gakwe.”

Edomu

¹¹ AMBUJE akuŵeceta kuti, “Ŵandu ŵa ku Edomu akupitilisya kulemwa, myoyo tinjapa cilango. Jemanjajo ŵatopwesye acalongo acimjawo lipanga lili myala mwangatendela canasa. Ŵakwete ukali wangapembeceka, ni lutumbilo lwangamala.

¹² Myoyo une tinjitumisya moto pa msinda wa Temani, nipo motowo tiwucijoca mapupa gakwe ga ku Bosila.”

Amoni

¹³ AMBUJE akuŵeceta kuti, “Ŵandu ŵa ku Edomu akupitilisya kulemwa, myoyo tinjapa cilango. Jemanjajo pakusosa kusumula malo ku Giliyadi ŵawuleje acakongwe ŵa yitumbo, pakwatumbula pa lutumbo.

¹⁴ Tinjitumisya moto pa mapupa ga ku Laba, nipo motowo tiwucitinisya mapupa gakwe. Tipaciŵa kugumila kwakukulungwa pa lisiku lya ngondolyo, ngondojo tijiciŵa mpela cimbunga mu ndaŵi jakuti nyengo nganijiŵa cenene.

¹⁵ Mwenye pamo ni nduna syakwe tacijigalidwa kuja ku ukapolo.”