3 Yohana 1 - Chiyawo Bible

¹ Cikalataci cikutyocela kwa une jwamkulungwane. Ngulembela cikalataci kwa jwakunonyelwa Gayo, jungusinamnonyela kusyesyene.

² Ŵakunonyelwa, ngusimbopela kuti yindu yenu yosope yimjendele cenene, nipo kuti umi wenu wacilu uwe wakulimbangana, mpela muwuŵelele umi wenu wa usimu.

³ Une naliji jwakusengwa kwejinji pakupikana ya usyene wa umi wenu kutyocela kwa acimjetu ŵiŵayice akuno. Tupikene soni ya mwele mumkwendela mwakuya usyene.

⁴ Pangali cine cakunonyelesya mnope kupunda kupikana kuti, ŵanace ŵangu akulondesya ya usyene.

Akumlumba Gayo

⁵ Mlongo mjangu jwakunonyelwa, mli ŵakulupicika pa masengo gosope gimkusimwatendela ŵakulupilila, mnopemnope acalendo.

⁶ Jemanjajo ŵatesile umboni pameso pa mpingo* yacinonyelo cimwalosisye. Yili yambone kuti, mwakamucisye kupitilisya ulendo wawo mwakumnonyelesya Mlungu.

⁷ Pakuti ŵawutandite ulendo ligongo lya lina lya Klistu,* soni nganapocela cine cilicose kutyocela kwa ŵandu ŵangakulupilila.

⁸ Sambano uwe tukwenela kwakamucisya ŵandu ŵamti iyiyi, kuti tukamusyane nawo pa masengo gakulalicila ya usyene.

Ya Diyotilife ni Demetiliyo

⁹ Nawulembele mpingo maloŵe gamnono, nambo Diyotilife ngakusosa kumbikanila. Jwalakwejo akusasosa kuti aŵe jwakulongolela.

¹⁰ Myoyo pitimbice kweleko tinjimsalila yosope yatesileje. Jwalakwejo aŵele ali kumbecetela maloŵe gangalumbana. Nambotu ngaŵa iyiyi peyi, jwalakwejo ngakusosa kwapocela acimjetu ŵakulupilila, nipo soni akisiŵalekasya ŵele ŵakusosa kuti ŵapocele, soni akusiŵatyosya mu mpingo.

¹¹ Mlongo mjangu jwakunonyelwa, kasimkuyaga yangalumbana nambo yayili yambone. Jwalijose jwakusatenda yambone, ali Mwanace jwa Mlungu; nambo jwakusatenda yangalumbana, nganambona Mlungu.

¹² Ŵandu ŵajinji akwatendela Demetiliyo umboni wambone. Atamose usyene nawo ukwatendela umboni. Uwe soni tukumtendela umboni, nipo m'mwejo mkumanyilila kuti umboni wetu uli usyesyene.

Maloŵe gambesi

¹³ Ngwete yejinji yakuti namsalile, nambo ngangusosa kuti nayilembe mcikalata.

¹⁴ Ngwembecela kwika kukumlola sampano, pelepo ni tuciŵecetana pameso ni pameso.

¹⁵ Mtendele uwe ni jemanja. Acimjetu wosope akumpa moni. Mpelece moni kwa acimjetu wosope jumojumo.