2 Yohana 1 - Chiyawo Bible

¹ Cikalataci cikutyocela kwa une Jwamkulungwa. Ngulembela kwa ŵakongwe ŵele Mlungu ŵasagwile ni ŵanace ŵawo ungusinanonyela kusyene. Nganimba jika jungusinamnonyela jemanja nambo soni wosope ŵakusamanyilila usyene.

² Tukusamnonyela ligongo lya usyene wele uli mwetuwe nipo tucitama ni uwe ndaŵi syangamala.

³ Umbone mtima, canasa ni mtendele yakutyocela kwa Mlungu Atati ni kwa Yesu* Klistu* Mwanagwawo, yitupe umbone mtima, canasa ni mtendele; yeleyi yiŵe yetuwe mu usyesyene ni mu cinonyelo.

Ya usyesyene ni cinonyelo

⁴ Une naliji jwakusengwa pakwasimana ŵane mwa ŵanace ŵenu alimkulondesya ya usyesyene, mpela mwele ŵatulamulile Atati ŵetu.

⁵ Nambo sambano ngumŵenda m'mweji ŵakongwe kuti: tunonyelaneje jwine ni mjakwe. Pelepa ngaŵa kuti ngumlembela lilamusi lya sambano iyayi, nambo lilalila lyele tukulimanyilila kutandila pandanda.

⁶ Cinonyelo celeci cili cakuti, tuŵe ŵakugapikanila malamusi ga Mlungu. Lilamusili, limwalipikene kutandila pandanda, lili lyakuti jemanja wosope mtameje mwa cinonyelo.

⁷ Pana ŵandu ŵajinji ŵa unami mcilambo cosope capasi. Jemanjaji ŵangajiticisya kuti Yesu Klistu ŵayice nipo ŵatemi mcilambo capasi mpela mundu. Mundu jwakwikana yeleyi ali jwa unami soni jwakumkana Klistu.

⁸ Mkalamuceje kuti mkajasa cele cimwacikamulilile masengo, nambo kuti mkapocela mbote jamtundu.

⁹ Jwalijose jwele jwangakuya yakwiganya ya Klistu, nambo akusajonjecesya yine, jwangali Mlungu. Nambo jwele jwakusakuya yakwiganya ya Klistu, jwele ali ni wosope, Atati ni Mwanace.

¹⁰ Naga jwalijose akwika kwa jemanja ni cijiganyo cine ngaŵa celeci mkasimumpocela m'nyumba syenu, atamose kumkomasya.

¹¹ Jwalijose jwakumkomasya mundu jwamti myiyi nikuti akukamulangana nayo yitendo ya jwalakwejo yayili ya ulemwa.*

Maloŵe gambesi

¹² Ngwete yejinji yakuti namsalile, nambo ngangusosa kuyilemba mcikalata. Ngwembecela kwika kumangwenuko kuti tuŵecetane meso ni meso. Pelepo kusengwa kwetuwe kuciŵa kwakwanila.

¹³ Ŵanace ŵa mlumbu gwenu ŵele Mlungu ŵasagwile akumpa moni.