2 Timoseo 4 - Chiyawo Bible

¹ Pameso pa Mlungu soni pameso pa Klistu* Yesu,* ŵele ŵitacilamula ŵandu wosope, ŵacijumi ni ŵawe ŵakwe, nipo pakukucimbicisya kwika kwakwe ni Ucimwene wakwe wa Klistujo, ngumlamula kusyene kuti

² mlalicile maloŵe ga Mlungu. Mlalicileje mwakulimbicila, pa ndaŵi jakugasaka ŵandu atamose pangakugasaka. Mwasalileje yakulemwa yawo, mwajamuceje, ni kwalimbikasya mtima, ni kwajiganya mwakuŵeŵa mtima kusyesyene.

³ Ndaŵi tijiciyika pitacikanaga ŵandu cijiganyo cisyesyene. M'malo mwakwe, tacikuyaga yindu yakwanonyelesya acimsyenewo, tacilisagulila ni kuliwunjicila aciŵalimu ŵele ŵakwiganya yakuyisaka jemanjajo acimsyenepewo basi.

⁴ Tacigatila Maloŵe ga Mlungu ni ngasaka soni kugapikana nambo tacigambaga kuya yindu ya adisiadisi yangali mate kose.

⁵ Nambo m'mwejo, mligoseje muyosope, mpimilile muyipwetesi, mkamule masengo gakulalicila Ngani Syambone,* ni mkamule masengo genu gosope mpela jwakutumicila jwa Mlungu.

⁶ Kuŵeceta ya une, umi wangu utandite kalape kutajidwa mpela mbopesi, nipo ndaŵi jikwanile jakuti njawuleje ulendo wangu wakutyoka mu umi awuno.

⁷ Mbutile ngondo jambone, soni malisisye cenene luwilo lwakuwutuka, nipo soni nacisunjile cikulupi.

⁸ Cicikulindilila une sambano ni mbote ja cilungamo jasunjile Mlungu. Ambuje ŵele ŵakusalamula mwangalola ngope, ni ŵele ŵitacimba mbote lisiku lyakumalisya. Nambotu ngasamba une jikape, nambo soni ŵane wosope ŵele ŵakulindilila mwa cinonyelo kuti Ambujewo taciyika soni.

Maloŵe gane

⁹ Mlinjilile kwisa akuno mwacitema.

¹⁰ Pakuti Dema anonyelwe ni yapasi pano, nipo andesile apite ku Atesalonika. Klesike ŵapite ku Galatiya,* nipo Tito ŵapite ku Dalimatiya.

¹¹ Luka jika ni jwali ni une. Mkamjigale Maliko* ni kwisa najo akuno, ligongo jwejula mpaka apakombole kungamucisya masengo.

¹² Nambo namtumile Tukiko ku Efeso.

¹³ Pakwisa munjigalile mkanjo wangu wunawulesile ku Tulowasi ni Kalipo. Munjigalile soni mabuku gangu, mnopemnope gamapende gala.

¹⁴ Alekisanda, m'misili jwa cipala cayisyano jula ŵandendele yangalumbana yejinji. Ambuje tacimpa mtuka mwakulingana ni yele yiŵatesile.

¹⁵ Soni m'mwejo mkalamuce najo, ligongo jwalakwe jula ŵasisisye mwamacili yakulalicila yetu.

¹⁶ Pinaliji mkulicenjela pa magambo gangu pandanda pala, paliji pangali mundu atamose jumo jwele juŵayice kukungamucisya, wosope ŵagambile kundeka jikape, Mlungu ŵakululucile.

¹⁷ Nambo Ambuje ŵaliji pampepe ni une, ni ŵalimbisye mtima kuti lalicile maloŵe gosope ga Ngani Syambone, kuti ŵandu ŵa mitundu jine* agapikane. Myoyo nakulupwice mkamwa mwa lisimba.

¹⁸ Ambuje tacingulupusya soni ku cilicose cakusaka kundendela cangalumbana, nipo tacisunga cenene mpaka kunjinjisya mu Ucimwene wakwe wa kwinani. Kwa Jwalakwe kuŵe lumbili lwangali mbesi. Ami.*

Maloŵe gambesi

¹⁹ Mkambelecele moni kwa Pulisila ni Akwila nipo soni kwa ŵa mwiŵasa lya Onesifolo.

²⁰ Elasito ŵasigalile ku Kolinto, nipo namlesile Tulofimo ali mkulwala ku Mileto.

²¹ Mlinjilile kwika akuno mkanijiyice ndaŵi jakusisima. Yubulo, Pudeni, Lino, Klaudiyo, soni acalongo acimjetu ŵane wosope akupeleka moni.

²² Ambuje atame ni jemanja. Umbone mtima wakutyocela kwa Mlungu uŵe ni jemanja wosope.