2 Timoseo 3 - Chiyawo Bible

Ndamo sya ŵandu masiku gambesi

¹ M'manyilile kuti masiku gambesi tijiciyika ndaŵi ja yakusawusya.

² Ŵandu taciŵa ŵakulinonyela acimsyene, ŵakunonyela mbiya, ŵakulikwesya, ŵakulalata ni mbwinya, ŵangapikanila acinangolo ŵawo, ŵangatogolela, soni ŵakusakasya yindu ya Mlungu.

³ Taciŵa ŵangali canasa, ŵangapikana pepani ni kwalambucisya yindu acimjawo. Taciŵa ŵandewo soni ŵakogoya, ni ŵanganonyela yambone,

⁴ ŵakwapeleka acimjawo kwa amagongo ŵawo. Taciŵa ŵangajogopa cilicose, ŵakulikwesya soni ŵakunonyela yakusangalasya m'malo mwakumnonyela Mlungu.

⁵ Tacisamala dini jetupe, jakuwoneka ni meso, nambo tacigakanaga macili gamapopelogo. Ŵandu ŵamti myoyo mwaŵambaleje.

⁶ Ŵane mwa jemanjajo akusajinjila m'nyumba sya ŵandu ni kwanyenjelelaga acakongwe ŵakulepetala, ŵele ŵali ŵasitopelwe ni ulemwa* wa yangalumbana yawo. Acakongwe ŵele akusajigalwa ni yakunonyela cilu yakulekanganalekangana,

⁷ acakongwe ŵeleŵa ndaŵi syosope akusasosa kumanyilila yindu nambo ngasakombola kumanyilila yindu yisyesyene.

⁸ Mpela yiŵatesile Yanesi ni Yambule pakumsisya Mose,* nombe ŵandu ŵeleŵa soni ŵasisyaga usyesyene, ŵasyasokonecele nganisyo syawo nipo soni ali ŵandu ŵangapunda pacikulupi.

⁹ Nambo ngusajendelecela nayo, pakuti ŵandu wosope tacikuwona kuloŵela kwawo, mpela muyatendecele Yane ni Yambele ŵala.

Ŵasalile yakwenela kutenda yambesi

¹⁰ Pakuti m'mwejo mŵele mli mkunguya muyakwiganya yangu, wende wangu, yakusosa yangu, cikulupi cangu, kuwusimana mtima kwangu, cinonyelo cangu, kupimilila kwangu,

¹¹ yisawusyo ni yipwetesi yangu. Jemanja mkuyimanyilila yindu yosope yiyambonecele ku Antiokeya, ku Ikoniyamu ni ku Lisitala. Nalasile mnope, nambo Ambuje ŵangulupwisye mosopemo.

¹² Nipo wosope ŵakusaka kuŵa ni umi wakumlumba Mlungu mwa Klistu* Yesu* tacisimana ni yisawusyo,

¹³ pelepo ni kuti ŵandu ŵangalumbana ni ŵa unami, taciŵa ali mkusakalilape, nipo taciŵa ali mkwalambusya ŵane ni kulilambusyaga acimsyenepewo.

¹⁴ Nambo m'mwejo, mpitilisye kuyikulupilila yele yimwalijiganyisye nipo myiweni kuti yili yisyesyene, pakuti mkwamanyilila ŵele ŵiŵamjiganyisye,

¹⁵ nipo soni mkumbucile kuti kutandilila pimwaliji mwanace mwagamanyilile Malemba ga Mlungu, gele gampaka gakombole kumpa lunda lwakulupucila nalo pakulupilila Klistu Yesu.

¹⁶ Malemba gosope galembedwe ni Mlungu mwakupujila lipuje, nipo gakusakamucisya pakwiganya yindu yisyesyene, kulekasya ulemwa, kongolela yangalumbana, ni pakwiganya ŵandu ya kulungamika.

¹⁷ Myoyo Malemba gakusamkamucisya mundu jwa Mlungu kuŵa jwakupakombola kutenda yosope ni kuliŵicila cilepe kusyesyene kutenda masengo gambone galigose.