2 Timoseo 2 - Chiyawo Bible

Ya msilikali jwambone jwa Klistu Yesu

¹ Sambano m'mwe, mwanangu, mlimbicile pakamulisya masengo mituka jalulele jimkwete mwa Klistu* Yesu.*

² Mjigale maloŵe gele gimwapikene kutyocela kwa une pameso pa mboni syejinji sila, mwasalile ŵandu ŵakulupilila ŵele ŵitacikombola kwajiganya ŵane.

³ Nomwe ŵakwe myiwone yisawusyo mpela msilikali jwambone jwa Klistu Yesu.

⁴ Msilikali jwakukamula masengo gakwe cenene jwangasamala yindu ya ŵandu ŵa ku musi, ligongo jwalakwe akusasosa kumsangalasya jwamkulungwa jwakwe jwa ngondo.

⁵ Mundu jwakuwutuka pa luwilo lwakuwutuka, ngaŵa mkupocela mbote naga nganawutuka mwakuya malamusi ga liwilolyo.

⁶ Namalima jwakukamula masengo gakwe mwakulimbicila, ni jwele jwakwenela kuŵa jwandanda kupocela yisogosi.

⁷ Myiganicisyeje cenene yele yinguŵecetayi, ligongo Ambuje tacimpa lunda lwakuti mpikanicisye yosope.

⁸ Mkumbucile Yesu Klistu jwele juŵajimwice ku ŵawe, nipo ali jumo jwa yisukulu ya Daudi,* mpela mwele musikwiganyicisya Ngani Syambone* syele singulalicila une.

⁹ Ligongo lyakuti ngulalicila Ngani Syambonesi, nguyiwona yisawusyo mpela soni kutaŵidwa ni unyolo mpela jwaciswamba. Nambo maloŵe ga Mlungu ngaŵa mkomboleka kutaŵidwa.

¹⁰ Myoyo sambano ngusapimilila yosopeyi ligongo lya ŵandu ŵiŵasagwile Mlungu, kuti jemanjajo nombe nawo apate cikulupusyo mwa Klistu Yesu ni kupocela lumbili lwandaŵi syosope.

¹¹ Aga ni maloŵe gasyesyene: “Naga twawile pampepe najo, tucikola soni umi pampepe najo.

¹² Naga tukupimilila, tucilamula pampepe najo. Naga uwe tukumkana, jwalakwejo soni tacitukana.

¹³ Atamose uwe tuli ŵangakulupicika, Jwalakwe akusaŵa jwakulupicika, pakuti ngaŵa mkomboleka kulisisya jika.”

Ya jwamasengo jwakwiticika ni Mlungu

¹⁴ Mwakumbusyeje ŵandu yindu yeleyi, ni kwatetela mwakwasalicisya pameso pa Mlungu kuti akasakanganaga pa maloŵe. Kutenda myoyo kuli kwangali cakupata, nambo yikusagamba kwasokonesya ŵandu ŵele ŵakupikanila kukanganako.

¹⁵ Mlinjilileje kuti mŵe ŵakwenela pameso pa Mlungu, mpela jwamasengo jwangali soni ni masengo gakwe, jwakulalicila* maloŵe mwa usyesyene mwangalola mbali.

¹⁶ Nambo ngani syangali mate, syangamcimbicisya Mlungu, msiŵambale, pakuti ŵandu ŵakuŵeceta yamti myoyo taciŵa ali kumnyosya Mlungu.

¹⁷ Nipo yakwiganya yawo yiciŵanda mpela kunyeka kwa liŵanga. Mwa ŵandu ŵeleŵa ŵane ni Himeneo ni Fileto.

¹⁸ Jemanjajo ŵasokonecele ni kuleka litala lisyesyene. Nipo akonanga cikulupi ca ŵandu ŵane ni kwiganyaga kuti ŵandu ŵawe ŵajimwice kalakala ku ŵawe.

¹⁹ Nambo cilimbilimbi cakulimbangana, cele ciŵaŵisile Mlungu, cili cakutamilicika nipo maloŵe galembedwe ni aga: “Ambuje akwamanyilila ŵele ŵali ŵakwe,” nipo soni, “Wosope ŵakuti ali ŵa Ambuje alece kutenda yangalumbana.”

²⁰ M'nyumba jajikulungwa mukusaŵa yida yakukicini yakulekanganalekangana: mukusaŵa yida ya silifa* ni golidi,* yine yayitela kapena yalitaka. Yida yine yikusaŵa yakamulicisya masengo pa cindimba cakusosekwa mnope nipo yine yikusakamula masengo ndaŵi jilijose.

²¹ Sambano naga mundu akuliswejesya ni kuleka yangalumbanayo, taciŵa mpela yida yakamulila masengo gakusosekwa. Taciŵa jwapajika ni jwakusosekwa mnope ni Ambujegwe ni kuwa cilepe kamula masengo galigose gambone.

²² Myitile yakusaka yangalumbana ya ucanda, ni mlimbicileje kuya kulungamika, cikulupi, cinonyelo ni mtendele, pampepe ni ŵandu wosope ŵali ŵambone mtima ŵakwasosa Ambuje kuti ŵakamucisye.

²³ Nambo mkane kusisyana kwakuloŵela ni kwangali lunda, pakuti mkumanyilila kuti yeleyi yikusatandisyaga ukangani.

²⁴ Nipo jwakutumicila jwa Ambuje ngakwenela kose kukangana ni ŵandu, nambo aŵeje jwakuwusimana mtima kwa ŵandu wosope, soni aŵeje mwalimu jwambone ni kulisinga.

²⁵ Aŵe jwakuwusimana mtima pakwasalila yakuwona ŵandu ŵakusisyana najo. Mwine Mlungu kuŵa mkwapa upile wakuti alece kutenda yangalumbana ni kumanyilila yindu yisyesyene.

²⁶ Pelepo lunda lyawo luciwujila, nipo tacikulupuka mu lwawu lwa Satana,* jwele juŵakamwile kuti atendeje lisosa lyakwe.