2 Sam 9 - Chiyawo Bible

Daudi akumtendela canasa Mefiboseti

¹ Lisiku line Daudi* ŵawusisye kuti, “Ana apali mundu jwalijose juŵasigele jwa mwiŵasa lya Saulo? Ngusaka kuti jwalakwejo namtendele canasa ligongo lya Yonatani.”

² Ni ŵapali jwakutumicila jwine jwa mwiŵasa lya Saulo, lina lyakwe Siba. Ŵamsalile jwalakwejo kuti akawonecele kwa Daudi. Myoyo mwenye ŵamwusisye jwalakwejo kuti, “Ana m'mweji Siba?” Jwalakwe ŵajanjile kuti, “Elo ambuje, ni une, jwakutumicila jwenu.”

³ Papopo mwenye ŵamwusisye soni kuti, “Ana pangali mundu jwalijose jwa mwiŵasa lya Saulo juŵasigele? Ngusaka kuti jwalakwejo nimtendele canasa mpela munaŵisile cilanga* kwa Mlungu.” Siba ŵajanjile kuti, “Apali ciŵela mwanace jwamlume jwa Yonatani. Nambo ali jwamlemale ngongolo syakwe.”

⁴ Mwenye ŵamwusisye soni kuti, “Ali kwapi jwalakwejo?” Siba ŵajanjile kuti, “Ali ku nyumba ja Makili, mwanace jwa Amiyele, ku Lodebala.”

⁵ Papopo Mwenye Daudi ŵatumile ŵandu kuti akamjigale, ŵanduwo kweli ŵajile kukumjigala ku nyumba ja Makili mwanace jwa Amiyele, ku Lodebala.

⁶ Ndaŵi jelejo Mefiboseti, mwanace jwa Yonatani, juŵaliji cisukulu ca Saulo, ŵayice ni kumjinamila, kupeleka ucimbicimbi. Daudi ni ŵatite kuti, “Mefiboseti!” Jwalakwejo ŵajanjile kuti, “Une yice ambuje, jwakutumicila jwenu.”

⁷ Daudi ŵamsalile kuti, “Mkatenda woga. Ngusaka kumtendela yindu yambone ligongo lya Yonatani baba ŵenu, soni tinamwucisye mbali josope ja cilambo ca Saulo, ambuje ŵenu. Soni timlyeje pamo ni une masiku gosope.”

⁸ Mefibosetijo ŵamjinamile Daudi, ni ŵatite kuti, “Ana une jwakutumicila jwawo ndili nduni, kuti ŵalakwe ajisamale m'mbwa jajiwe mpela uneji?”

⁹ Myoyo mwenye ŵamŵilasile Siba jwakutumicila jwa Saulo, ni ŵamsalile kuti, “Yindu yosope yiyaliji ya Saulo ni yosope ya mwiŵasa mwakwe nguyipeleka kwa mwanace jwa ambuje ŵenu Saulo.

¹⁰ M'mwejo, ŵanace wenu ni ŵakutumicila ŵenu, timumlimileje jwalakweju, ni timyiceje nayo yindu yagowola ku mgunda, kuti liŵasa lya ambuje ŵenu liŵeje ni yakulya. Nambo Mefiboseti talyeje pamo ni une masiku gosope.” Siba ŵakwete ŵanace ŵacalume 15 ni ŵandu 20 ŵakutumicila.

¹¹ Myoyo Siba ŵamsalile mwenye kuti, “Une jwakutumicila jwawo tinayitende yosope yene, pakuya yele yalamwile ŵalakwe mwenye ambuje ŵangu.” Myoyo Mefiboseti ŵaliji mkulya pamo ni Daudi mpela jumo jwa ŵanace ŵa mwenye.

¹² Mefiboseti ŵakwete mwanace jwamnondi lina lyakwe Mika. Ŵandu wosope ŵiŵatamaga m'nyumba ja Siba, ŵaliji sambano ŵakutumicila ŵa Mefiboseti.

¹³ Myoyo Mefiboseti, juŵaliji jwamlemale sajo syakwe syosope, ŵaliji mkutama ku Yelusalemu, pakuŵa jwalakwe ŵaliji mkulya ku nyumba ja mwenye masiku gosope.