2 Sam 8 - Chiyawo Bible

Daudi akupunda pa ngondo

¹ Panyuma pakwe Mwenye Daudi* ŵamenyene soni ni Afilisiti, ŵapundile pa ngondo, ni Daudijo ŵasumwile msinda wa Metagama kutyoka m'myala mwa ga Afilisitiwo.

² Daudi ŵapundile soni pa ngondo jiŵamenyene ni Amowabu, ni ŵalamwile acikayidi ŵiŵakamwile kuti agone pasi ni ŵawulagaga acikayidi ŵaŵili pa acikayidi ŵatatu ŵaliwose. Myoyo Amowabu ŵaliji acikapolo ŵa Daudi, ni ŵatandite kukoma msongo kwa jwalakwe.

³ Daudi ŵampundile soni pa ngondo Mwenye Hadadesa jwa cilambo ca Soba, mwanace jwa Lehobu, ndaŵi jiŵajawulaga Daudi kumkuli kwa Lusulo lwa Yufuleti, kuti akatamilisye soni ulamusi wakwe ku wele upandewo.

⁴ Daudi ŵakamwile asilikali ŵa ngondo ŵa Hadadesa ŵakwela pa mahaci 1,700, ŵakwenda pasi ŵapali 20,000. Ŵajikatile mitasi ja ngongolo sya mahaci gosope gakuwuta yigeleta, nambo ŵasalesye mahaci gane gakwanila yigeleta makumi likumi.

⁵ Jele ndaŵijo ŵandu ŵa mtundu wa Asiliya, ŵakutama ku Damasiko, ŵatumisye asilikali ŵawo ŵa ngondo, kukumkamusya Hadadesa, mwenye jwa ku Soba, Daudi ŵawuleje ŵandu ŵakwanila 22,000 ŵa ku Siliyawo.

⁶ Daudi ni ŵatamilisye malo ga asilikali ŵa ngondo ku Damasiko, mcilambo ca Siliya. Myoyo ŵandu ŵa ku Siliya sambano ŵaliji pasi pa ulamusi wakwe, ni ŵatandite kukoma msongo kwa jwalakwe. AMBUJE* ŵampele Daudi macili gakwapunda pa ngondo amagongo ŵakwe, kulikose kuŵajawulaga.

⁷ Daudi ŵajigele yida yakulicenjela pa ngondo, yele yiŵanyakulaga ŵakutumicila ŵa Hadadesa, ni ŵayice nayo ku Yelusalemu.

⁸ Daudi ŵajigele mtofu wa cisyano ca bulonsi wejinji kutyocela ku misinda ja Beta ni Belotayi, misinda jele jiŵalamulilaga Hadadesa.

⁹ Ndaŵi jiŵapikene Toyi mwenye jwa ku Hamati kuti Daudi alipundile pa ngondo likuga lyosope lya ngondo lya Hadadesa,

¹⁰ ŵamtumile Yolamu mwanagwe kwa Mwenye Daudi, kuti akamkomasye. Soni kwine kuti akamtogolele ligongo lya kuti ŵampundile pa ngondo Hadadesa. Ŵatesile yeleyi ligongo Hadadesajo ŵaliji mkumenyana ngondo ni Toyi masiku gamajinji. Pakwawula Yolamujo ŵajigele mtuka wa yindu yakupanganyidwa ni silifa,* golidi* ni bulonsi.

¹¹ Yindu yeleyo Daudi ŵayipelece soni kwa AMBUJE pamo ni silifa ni golidi juŵasumwile kwa ŵandu ŵa ngosyo sine ŵele ŵiŵapundile pa ngondo.

¹² Ŵanduwo ŵaliji ŵa lukosyo lwa Edomu, Mowabu, Aamoni, Afilisiti ni Amaleki. Yindu yine ni yiŵayisumwile kwa Hadadesa mwanace jwa Lehobu jwa ku Soba.

¹³ Mbili ja Daudi japikanice cilambo cosope. Ndaŵi jiŵawujilaga, ŵaliji ali awuleje ŵandu ŵa lukosyo lwa Edomu 18,000 ku Ciŵata ca Njete.

¹⁴ Ŵaŵisile malo ga cigono ga asilikali ŵa ngondo pa malo gakulekanganalekangana mcilambo ca Edomu. Mcilambo cosope ca Edomu mwaliji mwana tumakuga twa asilikali ŵa ngondo, myoyo ŵandu wosope ŵa lukosyo lwa Edomu sambano ŵaliji ŵandu ŵakumtumicila Daudi. AMBUJE ŵampundisye Daudijo pa ngondo, kulikose kuŵajawile kuputa ngondojo.

¹⁵ Myoyo Daudi ŵaliji mkulamulila cilambo cosope ca Aisalaeli, ni ŵaliji mkwendesya yindu yosope mwacilungamo soni mwangali lusagu.

¹⁶ Yowabu mwanace jwa Seluya, ni juŵaliji jwakulongolela asilikali ŵa ngondo, Yehoshafati mwanace jwa Ahiludi ni juŵaliji jwakulembela, ŵalembanga mbili.

¹⁷ Sadoki, mwanace jwa Ahitubi, soni Ahimeleki, mwanace jwa Abiyatala, ŵaliji ŵakutaga mbopesi, ni Silaya ŵaliji jwakulembela jwa ku nganya.

¹⁸ Benaya, mwanace jwa Yehoyada, ŵaliji nduna jakulolela ŵandu ŵa lukosyo lwa Akeleti ni ŵa lukosyo lwa Apeleti. Ŵanace ŵa Daudi nombe nawo ŵaliji ŵakutaga mbopesi.