2 Sam 7 - Chiyawo Bible

Cilanga ca Mlungu kwa Daudi

¹ Sambano Mwenye Daudi* ali ajinjile ni kutamilicika m'nyumba jakwe ja ucimwene, AMBUJE* ŵapelece mtendele mcilambo cakwe cosope.

² Lisiku line Daudijo ŵamsalile jwakulocesya* Natani kuti, “Une ngutama m'nyumba ja ucimwene jakutaŵa ni yitela ya mikungusa, nambo Libokosi lya Cilanga ca AMBUJE likutama mu tenti.”

³ Natani ŵamsalile mwenyejo kuti, “Ŵalakwe atende cindu cilicose cakuganisya mu mtima mwawo, pakuŵa AMBUJE ali ni ŵalakwe.”

⁴ Nambo cilo cicoco AMBUJE ŵamsalile Natani kuti,

⁵ “Mkamsalile jwakutumicila jwangu Daudi kuti une AMBUJE nguti, ‘Ana mkupela kuti ŵakundaŵila nyumba jakutama une ni m'mwejo?

⁶ Une nganindameje m'nyumba citandilile lisiku linakopwesye Aisalaeli ku cilambo ca Iguputo mpaka lelo jino. Njesile aku nakuku, nambo mwakutama mwangu mwaliji mu tenti.

⁷ Une nganinamwusyeje mundu jwalijose jwa ŵakulongolela ŵa Aisalaeli, ŵinasagwile kuti ŵaloleleje ŵandu ŵangu wosope, kuti, ligongo cici nganimundaŵila nyumba ja yitela ja mikungusa?’

⁸ “Ni ligongo lyakwe sambano mumsalile Daudi jwakutumicila jwangu kuti Une, AMBUJE Ŵamaciligosope akuŵeceta kuti, ‘Namjigele kwitinji kumwalangaga ngondolo kula kuti timjinjile ucimwene wakulamulila ŵandu ŵangu Aisalaeli.

⁹ Naliji ni m'mwejo kulikose kumwajinjililaga, soni napundile pa ngondo amagongo ŵenu ŵosope, m'mwejo mli mkulola. Tinalitende lina lyenu kuŵa lyakupikanika mpela mena ga ŵakulongolela ŵane ŵamacili ŵakupikanika, ŵa pa cilambo capasi.

^10-11 Nasagulile malo ŵandu ŵangu Aisalaeli, ni tinjatamika kweleko kuti akole malo gawogawope gakutama pangali yakusawusya soni yine. Pakuŵa citandilile kwinjila mcilambo amuno, ŵandu ŵa ukoleko aŵele ali mkwasawusya ŵandu ŵangu Aisalaeli, yeleyi ngasiyitendekwa soni. Ngutenda cilanga* cakumcenjela m'mwejo kwa amagongo wenu wosope ni soni kumpa yisukulu yenu yejinji.

¹² Ndaŵi jitimciwa ni pitacimsika m'malembe ga acinangolo ŵenu, jumo jwa ŵanace jwakuŵeleka m'mwejo, tinjimjisya ucimwene, kwinjila m'malo mwenu. Ni tinjiwulimbisya ucimwene wakwe.

¹³ Jwelejo ni jutacindaŵila Nyumba ja Mapopelo une, ni tinjiwutamilisya ucimwene wakwe kwa yaka yosope.

¹⁴ Une tinjiŵa babagwe, jwalakwe taciŵa mwanangu. Pitacindemwecesyaga tinjimpaga cilango mpela mwakusapelecela baba cilango kwa ŵanace ŵakwe,

¹⁵ Nambo ngisinamtyocesya cinonyelo cangu cangamala, mpela munamtyocesyele Saulo, jwele junamkanile, kuti mjinjile ucimwene m'mwejo.

¹⁶ Timcikola yisukulu yakwinjila m'malo mwenu, ucimwene wenu tiwuciŵa wa yaka yosope. Ucimwene wenu ngasiwumala.’ ”

¹⁷ Natani ŵamsalile Daudi yindu yosope yiŵamsalile Mlungu m'mesomkulola.

Lipopelo lya Daudi

¹⁸ Mwenye Daudi ni ŵajinjile mcitenti cakwapopelela AMBUJE. Ŵatemi pasi ni ŵatandite kupopela, ŵatite kuti, “Ŵalakwe AMBUJE Ŵamaciligosope, une ndili mundu jwangaŵajilwa kuyipocela yindu yandendele uneji pamo ni liŵasa lyangu.

¹⁹ Nambo yosopeyi yaliji yamnono m'meso mwa Ŵalakwe AMBUJE Mlungu Ŵamaciligosope. Ŵaŵecete soni ya liŵasa lya une jwakutumicila jwawo, kulilocesya ya ndaŵi jekulungwa ja msogolo. Ŵalakwe AMBUJE andosisye une mipago ja msogolo.

²⁰ “Ana une tisale soni cici kwa ŵalakwe? Pakuŵa ŵalakwe AMBUJE Mlungu Ŵamaciligosope, akumanyilila une jwakutumicila jwambone.

²¹ Ayitesile yindu yekulungwayi ligongo lya cilanga cawo, soni pakuya yele yiwukusaka mtima wawo kutenda, kuti une jwakutumicila jwawone manyilile.

²² “Yakuwona, Ŵalakwe AMBUJE Mlungu Ŵamaciligosope, ali ŵakulungwa. Mpela yele yitwapikene ni mapilikanilo getu, pangali soni jwine jwakulandana ni ŵalakwe, soni pangali Mlungu jwine nambo ŵalakwe jika basi.

²³ Ana mtundu wapi wa ŵandu ŵa pa cilambo capasi uli ŵakulandana ni Aisalaeli, ŵele ŵalakwe Mlungu ŵakulupwisye ku Iguputo kuti aŵe ŵandu ŵawo? Ŵapikanice pakwatendela yindu yekulungwa ni yakogoya, soni pakwatoposya ŵandu ŵa ngosyo sine pamo ni milungu jawo, ndaŵi jele ŵandu ŵenu jiŵajinjilaga mcilambo.

²⁴ Mwasagwile ŵandu ŵenu Aisalaeli kuti aŵe ŵandu ŵenuŵenupe kwa yaka yosope. Ni ŵalakwe AMBUJE ŵaliji Mlungu jwawo.

²⁵ “Sambano ŵalakwe AMBUJE Mlungu, acisunje cilanga cawo ciŵatesile pakusala ya une jwakutumicila jwawo ni ya liŵasa lyangu. Atende mpela muŵaŵecetelemo.

²⁶ Myoyo lina lyenu tiliciŵa lyakucimbicikwa mpaka kalakala. Ŵandu tacitiga kuti, ‘AMBUJE Ŵamaciligosope ali Mlungu jwakwalamulila Aisalaeli.’ Myoyo liŵasa lya une Daudi, jwakutumicila jwenu, tilicitamilicika kwa yaka yosope.

²⁷ “Pakuŵa Ŵalakwe, AMBUJE Ŵamaciligosope, Mlungu jwa Aisalaeli, asalile une jwakutumicila jwawo kuti taciwutamilisya ucimwene pa lukosyo lwangu. Ni ligongo lyakwe une jwakutumicila jwawo limbile mtima kusala ali lipopeloli kwa ŵalakwe.

²⁸ Sambano Ŵalakwe AMBUJE Ŵamaciligosope, ali Mlungu, soni maloŵe gawo gali gakuwona. Aŵisile cilanga kuti tacindendela une jwakutumicila jwawo yindu yambone yamtundu welewu.

²⁹ Myoyo ngwaŵenda kuti alipe upile mwa lukondwa liŵasa lya une jwakutumicila jwawo, kuti litamejepe pameso pawo kwa yaka yosope. Pakuŵa ŵaŵecete yeleyi ni Ŵalakwe AMBUJE Mlungu, myoyo liŵasa lya une jwakutumicila jwawo kweli tilicipocela upile mpaka kalakala.”