2 Sam 6 - Chiyawo Bible

Libokosi lya Cilanga ku Yelusalemu

¹ Daudi* ŵasongenye soni asilikali ŵakwe ŵa ngondo 30,000 ŵamacili, ŵele ŵiŵasagwile pasikati pa Aisalaeli.

² Ŵanyakwice Daudi pamo ni asilikali ŵakwe ŵa ngondo wosope ŵele ŵiŵaliji nawo kutyocela ku Baala jwa ku Yuda kuti akajigale Libokosi lya Cilanga ca Mlungu. Libokosilyo lyamanyikaga soni ni lina lyakuti AMBUJE* Ŵamaciligosope, ŵakutama pa akelubi mpela pa citengu ca ucimwene.

³ Ŵanduwo ŵalikopwesye Libokosi lya Cilanga ca Mlunguco m'nyumba ja Abinadabu, jijaliji petumbi, ŵalinyakulile pa ngolo ja sambanojo. Usa ni Ahiyo, ŵanace ŵa Abinadabu, ni ŵiŵaliji mkwendesya ngolo jasambano,

⁴ jijajigele Libokosi lya Cilanga ca AMBUJE kutyocela nalyo ku nyumba ja Abinadabu jila. Ahiyo ŵaliji mkwenda pasogolo pa Libokosi lya Cilanga ca AMBUJE lila.

⁵ Myoyo Daudi pamo ni Aisalaeli wosope ŵasengwile mnope, ŵacimbicisye AMBUJE pakwimba nyimbo ni yida ya ngonji, tugoma, ying'wenyeng'wenye ni malipenga, mwamacili gawo gosope.

⁶ Nambo piŵayice ku malo gakupwagulila tiligu ku Nakoni, ng'ombe syakuŵele ni syasakaga kugwa, Libokosi lya Cilanga lila lyatenganyice, Usa ŵanyakwile mkono wakwe ni ŵalikamwile Libokosi lya Cilangalyo.

⁷ Papopo AMBUJE ŵampilile mtima Usa, nipo Mlungu ŵamcanyandile jwalakwejo ligongo nginawugosa msyungu wangakwaya Libokosi lya Cilanga, ni ŵawilile papopo mungulugulu Libokosilyo.

⁸ Daudi ŵadandawile ligongo lyakuti AMBUJE ŵapile mtima mpaka ŵamwuleje Usa. Mpaka lelo jino malo gelego gakukolanjidwa kuti Pelesi Usa.

⁹ Daudi ŵatesile woga ni AMBUJE lyele lisikuli, ni ŵawusisye kuti, “Ana Libokosi lya Cilangali tilikayice uli kumangwetu?”

¹⁰ Myoyo Daudi ŵajogwepe kulijigalila Libokosi lya Cilangalyo ku msinda wakwe ula wa Daudi, ni ŵalisepucisye ku nyumba ja Obedi Edomu, mlukosyo jwa mu msinda wa Giti.

¹¹ Myoyo Libokosi lya Cilanga lyatemi miesi jitatu m'nyumba ja Obedi Edomu, mlukosyo jwa mu msinda wa Giti jula. AMBUJE ni ŵampele upile Obedi Edomujo pamo ni liŵasa lyakwe lyosope.

¹² Daudi ŵapikene kuti AMBUJE apelece upile kwa Obedi Edomu pamo ni yindu yosope yiŵakwete, ligongo lya Libokosi lya Cilanga. Myoyo jwalakwe ŵajawile kuja kulijigala Libokosi lya Cilangalyo, kulityosya m'nyumba ja Obedi Edomu, ni kwawula nalyo ku msinda wa Daudi ali ŵakusengwa.

¹³ Ŵandu ŵiŵanyakwile Libokosi lya Cilanga ca AMBUJE ŵatiji ali ajesile sajo msano ni lumo, Daudi ŵapelekaga mbopesi ja ng'ombe jamkambako ni mwanace jwa ng'ombe jwakwimbala.

¹⁴ Daudi ŵaŵinile kwacimbicisya AMBUJE ni macili gakwe gosope ali awete efodi* janguwo ja bafuta.

¹⁵ Myoyo Daudi pamo ni Aisalaeli wosope ŵayice nalyo Libokosi lya Cilanga ca AMBUJE ali mgumila ni gomba mapenga.

¹⁶ Ndaŵi jilyajinjilaga Libokosi lya Cilanga ca AMBUJE mu msinda wa Daudi, Mikala mwanace jwamkongwe jwa Saulo ŵalingwile pa windo, ni ŵaweni Mwenye Daudi ali mkusumbasumba ni kuŵina kwacimbicisya AMBUJE. Papopo jwamkongwe jula ŵatandite kumnyosya Daudi mu mtima mwakwe.

¹⁷ Ŵandu ŵala ŵajinjile nalyo Libokosi lya Cilanga ca AMBUJE lila, ni ŵalitamice pa malo gakwe mkati mwa tenti jiŵapanganyisye Daudi ja kuŵika Libokosilyo. Daudi ni ŵapelece mbopesi syakutinisya ni sya mkamulano kwa AMBUJE.

¹⁸ Ali amalisisye kupeleka mbopesi syakutinisya ni mbopesi syamkamulanosyo, ŵapele upile ŵandu mu lina lya AMBUJE Ŵamaciligosope.

¹⁹ Panyuma pakwe ŵagaŵenye yakulya Aisalaeli wosope, acalume ni acakongwe, jwalijose ŵapocele mkate, nduli ja nyama, ni keke ja yisogosi ya mpeleya yejumu. Ali apocele wosope ŵatyosile, nipo ŵapite jwalijose ku nyumba jakwe.

²⁰ Ndaŵi jiŵajawulaga Daudi kuja kupeleka upile ku nyumba jakwe, Mikala, mwanace jwa Saulo, ŵayice kukumcingamila ni ŵatite kuti, “Ana ligongo cici kulicimbicisya kwa mwenye jwa Aisalaeli mpaka kwikana pa kutenda yindu yamti myoyo lelo! Kuwula pameso pa ŵamasengo ŵacakongwe ŵa nduna syakwe, mpela mwakusatendela mundu jwa masoka, ngakola soni kose!”

²¹ Daudi ŵamjanjile kuti, “Nayitesile yindu yeleyi ligongo lyakwacimbicisya AMBUJE, ŵele ŵiŵasagwile une m'malo mwa baba ŵenu ni liŵasa lyawo lyosope. Ni ŵambisile une kuŵa mwenye jwa Aisalaeli, ŵandu ŵawo AMBUJE. Myoyo timbe ndili mkondwape soni kwacimbicisya AMBUJE.

²² Timbe ndili mkulisambula kupunda pelepa, kapena timbe mundu jwakunyosyekwape pameso penu, nambo m'meso mwa ŵamasengo ŵacakongwe ŵa nduna syangu ŵimkwambawo timbe jwakucimbicika.”

²³ Myoyo Mikala, mwanace jwa Saulo, nginakola mwanace mpaka ciwa cakwe.