2 Sam 5 - Chiyawo Bible

Daudi akum'weca ucimwene wa Aisalaeli ni Ayuda

¹ Panyuma pakwe lukosyo losope lwa Aisalaeli lwayice kwa Daudi* ku Hebuloni. Kukumsalila kuti, “Ŵalakwetu ni uweji tuli ŵa pa ulongo soni miasi jimpepe.

² Kalakala Saulo ŵaliji mwenye jwetu jwakutulamulila, ŵalakwe ni ŵaliji mkwalongolela Aisalaeli ku ngondo ni kuwuja nawo soni. AMBUJE* ŵasalile ŵalakwe kuti, ‘Timciŵa mkucinga jwa ŵandu ŵangu Aisalaeli, timciŵa mwenye jwa Aisalaeli.’ ”

³ Myoyo acakulungwakulungwa wosope ŵa Aisalaeli ŵayice kwa Mwenye Daudi ku Hebuloni. Mwenye Daudi ni ŵaŵikene nawo cilanga* pameso pa AMBUJE ku Hebuloniko, ni ŵanduwo ŵam'wecice Daudijo ucimwene kuti aŵe mwenye jwa Aisalaeli wosope.

⁴ Daudi ŵajinjile ucimwene ali ni yaka 30 yakupagwa nipo ŵalamulile kwa yaka 40.

⁵ Ŵalamulile Ayuda yaka msano ni yiŵili kwisa miesi msano ni umo ku Hebuloni. Ŵalamulile Aisalaeli wosope pamo ni Ayuda kwa yaka 33.

Daudi akusumula msinda wa Yelusalemu

⁶ Mwenye Daudi pamo ni asilikali ŵakwe ŵa ngondo ŵapite ku Yelusalemu kuja kukumenyana ni Ayebusi. Ayebusiwo ŵaliji ŵandu ŵiŵaliji mkutama mcilambomo. Ŵandu ŵeleŵa ŵaganisisye kuti Daudi ngaŵa mkupakombola kwapunda pa ngondo ni kuwusumula msindawo, myoyo ŵatumisye maloŵe kwa Daudi gakuti, “Ngasiyikomboleka m'mwejo kwinjila amuno. Ligongo lyakuti ŵandu ŵangalola ni ŵandu ŵalemale ni ŵitacimtoposya.”

⁷ Nambope Daudi ŵasumwile malo gecinje ni lipupa lya Siyoni,* ni malogo gakolanjidwa kuti, “Msinda wa Daudi.”

⁸ Lisiku lyeleli Daudi ŵasalile asilikali ŵakwe kuti, “Jwalijose jwakusosa kwawulaga Ayebusi, akwenela kupitila mu ngalande ja mesi, kuti akawulaje Ayebusi ŵalemale ni ŵangalolawo, ŵele ŵinguŵengana nawo mu mtima mwangumu.” Ni ligongo lyakwe ŵandu akusasala kuti, “Ŵandu ŵalemale ni ŵangalola, ngisajinjila m'Nyumba ja AMBUJE.”

⁹ Myoyo Daudi ŵatemi mu msinda wecinje ni lipupa ula ni ŵawupele lina lyakuti, “Msinda wa Daudi.” Ni ŵawutaŵile soni wele msindawo, kutandilila ku malo kwele kala kwaliji ciŵata, kungopoko lyuŵa kwetumbi mpaka mkati mwakwe.

¹⁰ Myoyo macili ga Daudi galiji mkulilakulila, ligongo AMBUJE Mlungu Ŵamaciligosope, ŵaliji najo.

¹¹ Hilamu, mwenye jwa ku Taya, ŵiŵatumisye ŵandu kwa Daudi ni utenga, pamo ni amisili ŵakupala matabwa ni ŵandu ŵane ŵakumanyilila kutaŵa majumba ni maganga. Ŵayice nayo pamo yitela ya mikungusa. Jemanjaji ŵayice kukumtaŵila Daudi nyumba jakwe ja ucimwene.

¹² Myoyo Daudi ŵamanyilile kuti AMBUJE amsagwile kuti aŵe mwenye jwakulamulila Aisalaeli, soni kuti ucimwene wakwe awukwesisye ligongo lya Aisalaeli ŵandu ŵakwe.

¹³ Daudi ali ayice ku Yelusalemu kutyocela ku Hebuloni, ŵalombele ku Yelusalemuko acakongwe ŵajinji. Ni ŵaŵelece ŵanace ŵacalume ni ŵacakongwe ŵajinji.

¹⁴ Aga ni mena ga ŵanace ŵa Daudi ŵiŵapagwile ku Yelusalemu; Shamuwa, Shobabu, Natani, Solomoni,

¹⁵ Ibihali, Elishuwa, Nefegi, Yafiya,

¹⁶ Elishama, Eliyada ni Elifeleti.

Daudi akwapunda pa ngondo Afilisiti

¹⁷ Piŵapikene Afilisiti kuti Daudi am'wecice ucimwene, kuti aŵe mwenye jwakulamulila cilambo ca Aisalaeli, Afilisitiwo ŵapite ku matumbi kuja kumsosasosa Daudijo kuti akamkamule. Nambo Daudijo piŵajipikene jele nganiji ŵatulwice kuja kwinjila ku malo gakwe gecije ni lipupa.

¹⁸ Afilisiti ni ŵayice kukutama m'Ciŵata ca Lefayimu.

¹⁹ Daudi ni ŵawusisye kwa AMBUJE kuti, “Ana njawule kuja kukumenyana nawo ngondo Afilisitiwo? Ana takapelece m'magasa mwangu?” AMBUJE ŵamjanjile kuti, “Elo, jawulani. Tingapelece kwene Afilisitiwo m'magasa mwenu.”

²⁰ Myoyo Daudi ŵajawile ku Bala Pelasimu, ni ŵapundile Afilisitiwo pa ngondo kweleko. Jwalakwe ni ŵatite kuti, “Une payiceje, AMBUJE ŵagaŵenye pasikati amagongo ŵangu mpela mesi ga cikumba.” Ni ligongo lyakwe malo gelego gakolanjidwa kuti Baala Pelasimu.

²¹ Afilisiti ŵajilesile milungu jawo ja Baala* kweleko, myoyo Daudi ni asilikali ŵakwe ŵajijigele milungu ja Baalajo ni ŵapite najo kumangwawo.

²² Ndaŵi jine Afilisiti ŵayice soni kukutama m'Ciŵata ca Lefayimu.

²³ Ali awusisye soni Daudi kwa AMBUJE, ŵamjanjile kuti, “Mkapita ku meso pakuja kukumenyana nawo, nambo mwapite ca kunyuma, ni mkamenyane nawo ngondo pa malo gakulolegana ni yitela ya Balasamu yila.

²⁴ Ni patimkapikane masegwe pa songa pa yitela ya Balasamuyo, ni kuti AMBUJE amlongolele kuti mkamenyane nawo asilikali ŵa ngondo ŵa Afilisitiwo, pelepo mkaŵe cile.”

²⁵ Daudi ŵatesile mpela muŵamlamulile AMBUJE, ni ŵapundile pa ngondo Afilisitiwo kutandila ku Geba mpaka ku Gesele.