2 Sam 3 - Chiyawo Bible

¹ Japali ngondo jakusoŵa ŵakucengulanya kwa ndaŵi jelewu pasikati pa asilikali ŵa ngondo ŵa Saulo ni Asiliyeli ŵa ngondo ŵa Daudi.* Asilikali ŵa Daudi macili gawo galiji mkulilakulila, nambo macili ga asilikali ŵa Saulo galiji mkunandipilanandipila.

Ŵanace ŵa Daudi ŵakupagwila ku Hebuloni

² Daudi ŵakwete ŵanace ŵacalume msano ni jumo, ŵakupagwila ku Hebuloni. Mwanace jwandanda ŵaliji Aminoni, juŵaŵelecele mwa Ahinowamu jwa ku Yesilele.

³ Mwanace jwaŵili ŵaliji Kiliyabu, juŵaŵelecele mwa Abigelo, jwamkongwe jwa masije jwa Nabala, jwa ku Kalimeli. Mwanace jwatatu ŵaliji Abisalomu, juŵaŵelecele mwa Maaka, mwanace jwa Mwenye Talimai, jwa ku Geshu.

⁴ Jwamcece ŵaliji Adoniya, juŵaŵelecele mwa Hagiti. Mwanace jwa msano ŵaliji Shefatiya juŵaŵelecele mwa Abitala.

⁵ Mwanace jwa msano ni jumo jwa Daudi ŵaliji Itiliyamu, juŵaŵelecele mwa Egila. Ŵanace msano ni jumo ŵa Daudi ŵeleŵa, ni ŵiŵapagwile ku Hebuloni.

Mkamulano ŵa Abinele ni Daudi

⁶ Pijaliji mkuja pasogolo ngondo ja pasikati pa asilikali ŵa ngondo ŵa Saulo ni asilikali ŵa ngondo wa Daudi, Abinele ŵatandite msyene kulipa macili pacanya pa ŵandu ŵa mwiŵasa lya Saulo.

⁷ Saulo ŵakwete ŵamkwakwe ŵanondi lina lyawo Lisipa, mwanace jwa Ayiya. Ni Ishibosheti ŵamwusisye Abinele kuti, “Ana ligongo cici mjile kwinjila kwa ŵamkwawo baba ŵangu ŵanondi?”

⁸ Abinele ŵapile nago mtima mnope maloŵe ga Ishiboshetiga, ni ŵamsalile kuti, “Ana m'mweji mkupela une m'mbwa ja Ayuda, amagongo ŵetu? Kutandila pandanda pene, ndemi jwakulupicika kwa Saulo baba ŵenu, acalongo acimjakwe, ni acambusanga ŵakwe, ni nganinampeleceje m'mwejo m'makono mwa Daudi. Ni m'mweji lelo, mkunjimba magambo gakuti ndeŵile ni jwamkongwe aju.

⁹ Ni ligongo lyakwe Mlungu ambe une cilango, atamose kumbulaga kwene, naga ngangumtendela Daudi yele AMBUJE* yiŵatesile najo cilanga* cakuti,

¹⁰ tinjiwutyosya ucimwene mwiŵasa lya Saulo ni kuwupeleka kwa Daudi, kuti alamulile Aisalaeli ni Ayuda kutyocela ku Dani mpaka ku Belesheba.”

¹¹ Papopo Ishibosheti ŵagambile kuti jasa, kusoŵa liloŵe lyakuti amjanje Abinele, ligongo ŵamjogopaga mnope.

¹² Myoyo Abinele ŵatumisye ŵandu ni utenga kwa Daudi ku Hebuloni, kuja kumwusya kuti, “Ana asyene kulamula cilamboci ŵani? Ŵalakwe agambe kutenda cilanga ni uneji, soni une tinakamucisye kuti cilambo ca Aisalaeli ciŵe cawo.”

¹³ Daudi ŵajanjile kuti, “Cambone, timbice cilanga ni m'mwejo. Nambo ngumŵenda cindu cimo, myice akuno ni Mikala, ligongo ngasimwonegana ni une meso ni meso, naga ngamkwika akuno ni Mikala mwanace jwamkongwe jwa Saulo.”

¹⁴ Myoyo Daudi ŵatumile ŵandu ŵa mitenga kwa Ishibosheti, mwanace jwa Saulo, kuja kusala kuti, “Mumbe Mikala ŵamkwangu ŵinalombile pakulipila misumbu 100 ja Afilisiti.”

¹⁵ Ishibosheti ni ŵatumile ŵandu kuti akamjigale Mikalajo kwa Palitiyele ŵamkwakwe, mwanace jwa Laishi.

¹⁶ Nambo Palatiyelejo ŵamkuyiye jwamkongwejo. Jwamlumejo ŵapitaga mcilila mwitala lyosope mpaka kuja kwika ku Bahulimu. Abinele ŵamsalile jwamlumejo kuti, “M'mweji, ujilani.” Jwalakwe ni jwawujile.

¹⁷ Abinele ŵasalile acakulungwa wa Aisalaeli kuti, “Ndaŵi jipiteji mwasakaga kuti Daudi aŵe mwenye jwenu jwakumlamulila.

¹⁸ Sambano upile ŵenu ŵakutendela yeleyi ni welewu, tendani. Pakuŵa AMBUJE ŵaŵisile cilanga ni Daudi kuti, ‘Tinjakulupusya ŵandu ŵangu Aisalaeli kwa Afilisiti kupitila mwa m'mwejo, jwakutumicila jwangu, ni tinjakulupusya kwa amagongo wawo wosope.’ ”

¹⁹ Abinele ŵaŵecete soni ni ŵandu ŵa lukosyo lwa Benjamini. Kaneko ni ŵajawile kukumsalila Daudi ku Hebuloni yindu yosope yiŵakamulene ŵandu ŵa lukosyo lwa Benjamini ni ŵa lukosyo lwa Aisalaeli kuti ayitende.

²⁰ Ndaŵi jiŵayice Abinele ni ŵandu 20 kwa Daudi ku Hebuloni. Daudijo ŵamkolocesye cindimba Abinele ni ŵandu 20 ŵiŵaliji nawowo.

²¹ Abinele ŵamsalile Daudi kuti, “Angunde kuti njawule ngasonganye Aisalaeli wosope kuti ayice akuno kwa ŵalakwe, mwenye Ambuje ŵangu, kuti taŵikane cilanga ni ŵalakwe, ni soni kuti ŵalakwe talamuleje kulikose kuwukusaka mtima wawo.” Myoyo Daudi ŵamkundile Abinele kuti ajawuleje. Ni jwalakwe ŵajawile mu mtendele.

Kuwulajidwa kwa Abinele

²² Ndaŵi jijojo asilikali ŵa ngondo ŵa Daudi ŵayice pamo ni Yowabu kutyocela kuŵajile kuputa ngondo, ali ajigele yindu yejinji yakusumula ku ngondoko. Nambo Abinele nginaŵa pamo ni Daudi ku Hebuloni, pakuŵa Daudi ŵaliji ali amkundile kala jwalakwejo kuti ajawuleje nipo jwaliji ali apite mwa mtendele.

²³ Ndaŵi jiŵayice Yowabu ni asilikali wosope ŵa ngondo ŵiŵaliji nawo ŵala, ŵandu ŵane ŵamsalile Yowabujo kuti, “Abinele mwanace jwa Nele ŵayice kwa mwenye, ni mwenye ŵamkundile kuti ajawuleje, kwamti ŵapite mu mtendele.”

²⁴ Ali apikene yeleyo Yowabu ŵajawile kwa mwenye kuja kumwusya kuti, “Ana ŵalakwe mwenye, ana akuti atesile yindu yamtunduci? Abinele ŵayiceyice kwa ŵalakwe akuno, ligongo cici amkundile soni kuti ajawuleje? Ana nambo yisyene apite?

²⁵ Ŵalakwe mwenye, akutenda mpela ngakum'manyilila Abinele mwanace jwa Nele? Ŵagambile kwika jwalakwejutu kukwamata lipuje m'meso, kuti jwalakwe amanyilile yosope yakutenda ŵalakwe.”

²⁶ Yowabu ali atyosile ku nyumba ja Daudi kula, ŵatumile ŵandu ŵa mitenga kuti amkuye Abinele. Jemanjajo kusyene ŵajile kumsimana ku cisima ca Sila, ni ŵamsalile kuti awujilile. Nambo Daudi nginayimanyilila yeleyi.

²⁷ Piwawujilile Abinele ku Hebuloni, ali ayice pa cipata Yowabu ŵamjigalile pambali, kutenda mpela akusosa kuŵeceta najo ya asili pacisyepela. Kweleko Yowabu ŵamsomile Abinelijo mcitumbo, ni ŵawilile papopo. Yowabu ŵatesile yeleyi ligongo lyakuti Asahelo mpwakwe ŵawulajidwe ni Abinelejo.

²⁸ Daudi piŵajipikene ngani jeleji, ŵatite kuti, “Une pamo ni ŵandu ŵa ucimwene wangu nganitukola magambo pameso ga AMBUJE pa ciwa ca Abinele, mwanace jwa Nele.

²⁹ Magambo gelega gamgwilile Yowabu ni wosope ŵa peŵasa lya babagwe. Soni Mlungu ampe Yowabujo cilango cakuti peŵasa pakwe pakapagwa mundu jwangalwala cilwele ca cisonono, kapena cilwele ca matana, kapena cakulemala, kapena jwakuwulajidwa ku ngondo, soni jwakusoŵa yakulya.”

³⁰ Myoyo Yowabu ni mpwakwe Abishayi ŵamwuleje Abinele ligongo lyakuti Abinelijo ŵamwuleje Asahelo mpwawo ku ngondo ja ku Gibiyoni.

Abinele akusicidwa mwilembe

³¹ Ni Daudi ŵamsalile Yowabu ni ŵandu wosope ŵiŵaliji nawo kuti, “Papulani yakuwala yenu, ni m'wale yiguduli, kuti mlile malilo ga Abinele.” Mwenye Daudi msyene ŵakuyaga ŵandu ŵiŵanyakwile mtembowo.

³² Ni ŵajile ku msika Abinele ku Hebuloni. Mwenye ŵalisile mwakwesya maloŵe ku malembe ga Abinele. Ŵandu wosope nombe nawo ŵalisile mnope.

³³ Pakulila malilo ga Abinele Mwenye Daudi ŵatite, “Ana kuwa kwa Abinele kuli kwamti myiyi, kuwa mpela mucikusawila cisilu?

³⁴ Makono genu galiji gangataŵidwa, sajo syenu syaliji syangaŵijilila. Nambo m'wile mwakusawila mundu m'makono mwa ŵandu ŵakusakala mtima.” Myoyo ŵandu wosope ŵalisile soni.

³⁵ Panyuma pakwe ŵandu ŵala ŵayice kukumcondelela mwenye kuti alye cakulya mkanikuswe. Nambo Daudi ŵalumbile kuti, “Mlungu ambe une cilambo, naga uneji ngulya cakulya kapena cindu cine lyuŵa mkanilikapile.”

³⁶ Ŵandu ŵosope ŵapikanile yeleyo, ni yanonyele. Yosope yiŵatendaga mwenye yanonyelaga ŵandu wosope.

³⁷ Myoyo ŵandu ŵiŵatamaga ni mwenye pamo ni Aisalaeli wosope ŵamanyilile pa lyele lyuŵali kuti nganikuŵa kusaka kwa mwenye kuti Abinele mwanace jwa Nele awulajidwe.

³⁸ Mwenye ni ŵawusisye asilikali ŵakwe ŵa ngondo kuti, “Ana ngamkumanyilila kuti jwakulongolela jwamkulungwa mcilambo ca Aisalaeli lelo awile?

³⁹ Myoyo une lelo nganingola macili, cilu cangu citengwice, atamose kuti une ŵambwecice ucimwene. Ŵandu ŵeleŵa ŵali ŵanace ŵacalume ŵa Seluya akwete macili gakumbunda uneji. AMBUJE amwucisye mundu jwakutenda yakusakala mwakulandana ni yitendo yakwe yakusakalayo.”