2 Sam 23 - Chiyawo Bible

Maloŵe gakumalisya ga Daudi

¹ Aga ni maloŵe ga kumalisya ga Daudi:* Aji ni nyimbo ja Daudi, mwanace jwa Yese, maloŵe ga mundu juŵamŵisile Mlungu penani, jwele Mlungu ja Yakobo* ŵamsagwile kuti aŵe mwenye, mundu jwakunonyelwa kwimba nyimbo syakusalala sya Aisalaeli.

² Msimu wa AMBUJE* ukuŵeceta mwa une, ni maloŵe gakwe gali pakamwa pangu.

³ Mlungu jwa Aisalaeli aŵecete, lwala lwa Aisalaeli lusalile kuti, “Mlungu jwakulamulila ŵandu mwa cilungamo kulamulila kwakumjogopa Mlungu,

⁴ taciŵa mpela lilanguka lya kundaŵi, pakopoka lyuŵa kundaŵi kwangali mawunde; ndaŵi jakusipuka manyasi pasi ligongo lya lilanguka lyeswela, ula jili jilesile.”

⁵ Mwamti Mlungu ŵayipele upile ligongo lyakuti ŵatesile cilanga* cangamala ni une cilanga cambone cenene soni cangapitikuka. Ayi ni yingusaka soni ni yicingulupusya. Soni Mlungu ni jutacitenda yosopeyi.

⁶ Nambo ŵandu ŵangalumbana wosope ali mpela miŵa jikwenela kwasidwa, jakuti ŵandu ngajikombola kamula ni makono.

⁷ Nambo akusajikata ni cisenga kapena ni lipanga ni kuja kujijoca pa moto.

Ŵa ngondo ŵakupikanika ŵa Daudi

⁸ Naga mena ga ŵandu ŵa ngondo ŵamacili ŵa Daudi: Yoshebu Bashebeti, ŵa ku Takemoni, jwamkulungwa jwa ŵa ngondo ŵatatu. Ŵele ŵiŵamenyene ngondo ni ŵandu 800, ni ŵawuleje wosope ni lipanga lwakwe.

⁹ Ŵiŵakuyaga panyuma pawo mwa ŵandu ŵatatu ŵamacili ŵala ŵaliji Eliyesa, mwanace jwa Dodo, mwanace jwa Aho. Ŵelewo ŵaliji ni Daudi ndaŵi jiŵatandaga Afilisiti ŵiŵasongene kuti amenyane nawo ngondo ku Pasi Damimu. Aisalaeli ŵaliji ali atisile.

¹⁰ Nambo Eliyesa ŵasigalile, ni ŵatasile ngondo Afilisiti mpaka mkono ŵakwe watesile mandilindili, nambo upanga wakwe nganiwugwa. Lisiku lyelelyo AMBUJE ŵapundisye ku amagongo ŵawo. Panyuma pakwe Aisalaeli ŵayice kuŵaliji Eliyesa kujigala yida ya ŵandu ŵawewo.

¹¹ Ŵiŵaliji panyuma pa Eliyesa ni Sama, mwanace jwa Age jwa ku Halali. Ndaŵi jine Afilisiti ŵasongene ku Lehi kuwaliji mgunda ŵa mbelemende. Ni Aisalaeli ŵatisile Afilisitiwo.

¹² Nambo Sama ŵajimi pakatikati pa mgundawo ni ŵawucenjele, soni ŵawuleje Afilisitiwo, ligongo AMBUJE ŵapundikasisye kwa amagongowo.

¹³ Masiku gagowola, ŵatatu mwa ŵa ngondo ŵakupikanika makumi gatatu gala, ŵapite kwa Daudi ku mbanga ja Adulamu, pelepo likuga lya ngondo lya Afilisiti lyataŵaga masakasa gawo ku Ciŵata ca Lefayimu.

¹⁴ Pelepo ni kuti Daudi ŵaliji mu mbanga mula, ni likuga lya ngondo lya Afilisiti lyaliji ku Betelehemu.

¹⁵ Sambano Daudi ŵaŵecete mwakumbila kuti, “Ha! Akambe jwine mesi gakumwa ga pa cisima cicili pa cipata ku Betelehemu kuti mwe!”

¹⁶ Apo ŵandu ŵatatu ŵamacili ŵala ŵajawile kupitila ku masakasa ga Afilisiti, ni kuteka pa cisima ca ku Betelehemu, cicaliji pakuŵandikana ni cipata. Ŵajigele mesigo ni ŵayice nago kwa Daudi. Nambo Daudijo nganasaka kumwa kose mesigo, ŵagambile kwitila pasi, kugapeleka kwa AMBUJE,

¹⁷ ni ŵatite, “Ngulumbila kwa AMBUJE, nginimba ndesile cindu celeci, ligongo tiyiŵe mpela kumwa miasi ja ŵandu ŵele ŵaŵisile umi wawo pa ucece.” Mwamti ŵakanile kumwa mesigo. Yeleyi ni ŵatesile ŵandu ŵatatu ŵamacili ŵala.

¹⁸ Sambano Abishayi, mlongo mjawo jwa Yowabu, mwanace jwa Seluya, ni juŵaliji jwakulongolela jwa ŵandu makumi gatatu gala. Ŵawuleje ŵandu 300 ni lipanga lyakwe, ni ŵapikanice mpela ŵandu ŵatatu ŵala.

¹⁹ Ŵaliji ŵakupikanika mnope kwa ŵandu makumi gatatu ŵala, ni ŵatemi kuŵa ŵakulungwa ŵawo, nambo nganiŵayika ŵatatu ŵala.

²⁰ Benaya mwanace jwa Yehoyada jwakutyocela ku Kabisele ŵaliji mundu jwakulimba mtima; ŵatesile yejinji yakusimonjesya pakwawulaga acakulungwa ŵaŵili ŵa ngondo ŵa cilambo ca Mowabu. Lisiku line kusa kuli mkusisima ŵajinjile mwisimbo ni ŵawuleje lisimba mwelemo.

²¹ Ŵawuleje soni mundu jwine jwa ku Iguputo, jwakuwoneka mwakusalala. Mundujo jwakwete lipanga m'myala mwakwe. Benaya ŵapite kwa mundujo ali ajigele mpici ni ŵasumwile lipanga kutyocela m'myala mwa mundu jwa ku Iguputojo, nipo ŵamwuleje ni lipanga lyakwe lilyolyo.

²² Yeleyi ni yiŵatesile Benaya mwanace jwa Yehoyada ni ŵapikanice mpela acimlongola ŵane makumi gatatu gala.

²³ Benaya ŵaliji ŵakupikanika sikati ja ŵa ngondo makumi gatatu ŵala nambope nganapayika pa asilikali ŵatatu ŵala. Daudi ŵamŵisile Benaya kuŵa jwakulamulila asilikali ŵakwalondela mwenyewo.

^24-39 Mwikuga lya ŵandu 30 ŵala ŵapali soni aŵa: Asahelo, mpwakwe jwa Yowabu Elihanani mwanace jwa Dodo jwa ku Betelehemu Shama jwa ku Halodi Elika jwa ku Halodi Helesi jwa ku Peliti Ila mwanace jwa Ikeshi jwa ku Tekowa Abiyesa jwa ku Anatoti Mebunayi jwa ku Husha Salimoni jwa ku Aho Mahalayi jwa ku Netofa Helebi mwanace jwa Baana jwa ku Netofa Itayi mwanace jwa Libayi jwa ku Gibeya ku lukosyo lwa Benjamini Papali soni Benaya jwa ku Pilatoni Hidayi jwa ku Sulo sya ku Gaashi Abiyaliboni jwa ku Alaba Asimafeti jwa ku Bahulimu Eliyaba jwa ku Shaliboni Ŵanace ŵa Yasheni Yonatani Shama Muhalali Ahiyamu mwanace jwa Shalala jwa ku Halali Elifeleti mwanace jwa Ahasibayi jwa ku Maaka Eliyamu mwanace jwa Ahitofelo jwa ku Gilo Hesilo jwa ku Kalimeli Palayi jwa ku Alabu Igali mwanace jwa Natani jwa ku Soba Bani jwa ku Gadi Seleki jwa ku Amoni Nahalayi jwa ku Beeloti, jwakujigala yida ya ngondo ya Yowabu Itila ni Galebu ŵa ku Yatili Uliya Muhiti Wosope pampepe ŵapali asilikali 37 ŵakupikanika mnope.