2 Sam 22 - Chiyawo Bible

Nyimbo jakutogolela ja Daudi

¹ Lisiku lyele AMBUJE* liŵamkulupwisye Daudi* m'myala mwa amagongo ŵakwe mnopemnope m'myala mwa Saulo, ŵaŵecete maloŵe mu nyimbo aji:

² Ni ŵatite, AMBUJE ni lwala lwangu, soni ni lipupa lyakunjenjela une, ni ŵakuwombola ŵangu.

³ AMBUJE ŵangu ni lwala lwangu, kwele kungusatilila. Ali cakulicinjilicisya cangu, ali ŵakunjinga ŵangu ni ŵa ku ngulupusya jwangu. Ali mkulupusyo jwangu; Ni ŵakunjenjela ŵangu wawo ŵakusawombola ku yiwawa.

⁴ Ngisinaŵilanga AMBUJE, ŵakwenela kwalumba, ni ŵakusangulupusya kwa amagongo ŵangu.

⁵ Matumbela ga ciwa gasyungulile une, soni matumbela gakonanga ganjogoyisye.

⁶ Yingwe ya ku malembe yasyungulile une, yitega ya ciwa yandejile.

⁷ Masiku ga yipwetesi yangu naŵilangaga AMBUJE. Nagumililaga AMBUJE kuti angamucisye. Ŵapikene maloŵe gangu, ali m'nyumba ja mapopelo jawo, ŵapikene kulila kwangu pakusosa cikamucisyo.

⁸ Pelepo cilambo capasi catetemele ni kutenganyika. Yilimbilimbi ya kwinani jatenganyice, ni kutetemela ligongo lyakuti Mlungu ŵatumbile.

⁹ Lyosi lyakopokaga mu mbula syawo, moto ŵakonanga ŵakopokaga mkamwa mwawo, soni makala gamoto gatyocelaga mkamwa pemo.

¹⁰ Ŵapapwile liwunde ni ŵayice pasi, cipi ca ngasimba caliji kusajo syawo.

¹¹ Ŵakwesile mkelubi ni ŵagulwice, ŵajesile mwakuwutuka ni mbungo.

¹² Cipi ŵacisandwisye kuŵa cakuliwunicila cawo, mawunde gakandapala ga ula gagumbele ni mesi.

¹³ Ni kulanguka kwa pameso pawo, kwatyocelaga ku makala ga moto.

¹⁴ AMBUJE kwinani ŵalindime, ni maloŵe ga Jwakwinani Mnope gapikanice.

¹⁵ Ŵaponyisye mapanga gawo, ni ŵapwilingenye amagongo ŵawo ŵajogoyisye ni yakumesya.

¹⁶ Ngalande sya pasi pa nyasa syawonecele pakulanguka, yilimbilimbi ja cilambo capasi jaliji pakuwonecela, ndaŵi jiŵakalipilaga AMBUJE amagongo ŵawo ni pele piŵakoposyaga mpweya ŵamacili mu mbula mwawo.

¹⁷ AMBUJE ŵatambasukwile mkono wawo ali kwinani, ni ŵangamwile ni kunjuwula m'nyasa syakusokoka.

¹⁸ Ŵangulupwisye kwa amagongo ŵangu ŵamacili kwa wosope ŵiŵaŵenganaga ni une; pakuti jemanjajo ŵaliji ŵamacili mnope kumbunda une.

¹⁹ Ŵandagaga ngondo amagongo ndili pa yisawusyo, nambo AMBUJE ŵanjenjelaga.

²⁰ Ŵangopwesye ku malo gakogoya, ni ŵangulupwisye ligongo lyakunonyelwa ni une.

²¹ AMBUJE ŵambele mbote ligongo lyakulungama kwangu ŵambele upile ligongo m'myala mwangu mwaliji mwambone.

²² Une nasunjile matala ga AMBUJE; soni nganingalawucila yacabe kumleka Mlungu jwangu.

²³ Napikanile misyungu jawo josope, ni malamusi gawo nganinjasa.

²⁴ Jwangali magambo pameso pawo, ligongo nayigwalaga yacabe mu umi ŵangu.

²⁵ Ni ligongo lyakwe AMBUJE ŵambele mbote mwakamulana ni kulungamika kwangu, mpela mwakumbonela kuti jwangali magambo.

²⁶ Kwa ŵandu ŵakulupicika, wawo AMBUJE akusakulupicika ni kwa ŵandu ŵakupikana akusiŵapikanila.

²⁷ Kwa ŵandu ŵaswela mtima nombe nawo akusaŵa ŵaswela mtima, nambo kwa ŵandu ŵakusakala mtima akusalilosya ŵakalamuka mnope.

²⁸ Paja ŵandu ŵakulinondiya wawo akusiŵakulupusya nambo ŵandu ŵakulikwesya akusiŵatulusya.

²⁹ Yakuwona, wawo AMBUJE ni nyali jangu, ni Mlungu jwangu, akusamulicila mcipi.

³⁰ Ni cikamucisyo cawo mpakana ngombole kulipunda likuga lya ngondo ni macili gawo, wawo Mlungu mpakana ngombole kusumula misinda.

³¹ Kuŵeceta ya Mlungu, matala gakwe gali gambone; maloŵe ga AMBUJE ni gakuwona. AMBUJE ni cakulicinjilicisya ca wosope ŵakutilila kwa ŵalakwewo.

³² Pangali Mlungu jwine nambo AMBUJE jika. Pangali lwala lwine lwakutilila nambo kwa Mlungu jwetu.

³³ Mlungu jwangu ni cakunjenjela cangu cakulimba ŵakusatyosya yakogoya m'matala gangu

³⁴ Akusalimbisya sajo syangu mpela sya mbaŵala, soni akusasunga cenene ku matumbi.

³⁵ Akusajiganya makono gangu kapute ka ngondo, mwamti mpaka ngombole kupinda ukunje wa cisyano ca bulonsi.

³⁶ Wawo anjenjele ni cakulicinjilicisya cawo cacikulupusyo. Ni cikamucisyo cawo candesile une kuti mbikanice.

³⁷ Ŵalinganyicisye une litala, myoyo sajo syangu nganisitelesya.

³⁸ Natopwesye amagongo ŵangu ni najonasile. Nganimbujila munyuma mpaka namasile.

³⁹ Nakang'andile, ni kwagwisya pasi, mwamti nginajimuka soni, ŵaliji pasi pa sajo syangu.

⁴⁰ Paja wawo ŵambele macili gakuputila ngondo, ni ŵambutile ŵakunjimucila. Kuti atile ŵele ŵiŵaŵenganaga ni une.

⁴¹ Wawo ŵagalawisye amagongo ŵangu kuti alosye une kunyuma kwawo, ni ŵiŵaŵenganaga ni une najonasile.

⁴² Ŵalolite jemanjajo, nambo paliji pangali jwalijose jwakwakulupusya. Ŵalilile AMBUJE, nambo soni nganiŵajanga.

⁴³ Nasyajilesyajile mpela luwundu, ni nakasile ni kwapondaponda mpela matope ga mu msewu.

⁴⁴ Ŵangulupwisye kwa ŵandu ŵangu ŵiŵanjimucile. Ŵasunjile kuti mbe jwakulamulila mitundu josope. Myoyo ŵandu ŵangamanyilila ŵatandite kundumicila une.

⁴⁵ Ŵandu ŵa yilambo yine ŵayice kwa une kuŵenda; piŵagambile kupikana maloŵe gangu gandanda, ŵambikanile.

⁴⁶ Ŵandu ŵa mitundu jine* ŵajasile cikulupi, ŵakopwece m'masakasa gawo muŵajuŵile ali mkutetemela.

⁴⁷ AMBUJE ni umi ŵangu! Lulumbidwe lwala lwangu, acimbicikwe Mlungu jwangu lwala lwakungulupusya.

⁴⁸ Mlungu ni ŵangamucisye kuti namale ni nakombwele ŵandu ŵa mitundu jine kuti aŵe pasi pa ulamulilo ŵangu.

⁴⁹ Wawo ni ŵangulupwisye kwa amagongo ŵangu. Ŵangwesisye mwinani mwa ŵakunjimucila ŵambokasisye kwa ŵandu ŵa ngalwe.

⁵⁰ Ligongo lya yeleyi tinjatogolela wawo AMBUJE pasikati pa mitundu ja ŵandu, tinjijimba nyimbo sya kulilumba lina lyawo.

⁵¹ Mlungu akusakamucisya mwenye jwakwe kuti apundeje ndaŵi syosope. Akusalosya cinonyelo cakwe cangapitikukapitikuka kwa jwakusagulidwa jwakwe, kwa Daudi ni yisukulu yakwe.