2 Sam 21 - Chiyawo Bible

Yisukulu ya Saulo yikuwulajidwa

¹ Masiku ga ucimwene ŵa Mwenye Daudi,* kwapali sala kwa yaka yitatu yakuyana. Ni Daudi ŵaŵendile lunda kwa AMBUJE. AMBUJE ni ŵatite kuti, “Saulo ni liŵasa lyawo magambo gakuwulaga Agibiyoni ŵala gaciŵela.”

² Myoyo mwenyejo jwaŵilasile Agibiyoniwo. Agibiyoniwo nginaŵa Aisalaeli. Nambo ŵaliji ŵakusigala ŵa Aamoli. Atamose Aisalaeli ŵalumbile kuti ngisiŵawulaga Agibiyoniwo, nambo Saulo ŵasosile kwajonanjila cile ligongo lya cinonyelo cakwe kwa Aisalaeli ni kwa Ayuda.

³ Pelepo Daudi ŵawusisye Agibiyoni ŵala kuti, “Ana natendele cici? Nambi njile uli kuti atupopelele kwa AMBUJE* kuti atupe upile?”

⁴ Agibiyoni ŵatite kwa Daudi kuti, “Magambo gapali pasikati pa uwe ni Saulo kapena liŵasa lyawo, soni nganigaŵa gakulipila ni golidi* kapena silifa,* soni ngaŵa kuti uwe tukusosa kulipila pakuwulaga jumo jwa Aisalaeli iyayi.” Apo Daudi ŵawusisye soni kuti, “Nambi sambano akuti natendele cici?”

⁵ Ni ŵajanjile kuti, “Saulo ŵasacile kuti atujonanjile, soni ŵalinganyisye kuti uwe atumale mwamti akasasigala atamose mundu jumo kuti aŵe mcilambo ca Aisalaeli.

⁶ Atupe yisukulu msano ni yiŵili yayilume mwa yisukulu ya Saulo, kuti tukayiwulaje pameso pa AMBUJE ku gibiyoni, ku msinda wa Saulo mundu jwakusagulidwa jwa AMBUJE.” Mwenyejo ŵajanjile kuti, “Cambone, tinjapeleka.”

⁷ Nambo mwenye ŵamsunjile Mefiboseti, mwanace jwa Yonatani, mwanace jwa Saulo ligongo lya cilanga* ciŵatesile Mwenye Daudi ni Yonatani mwanace jwa Saulo, pameso pa AMBUJE.

⁸ Myoyo mwenyejo ŵajigele Amoni ni Mefiboseti ŵane soni, ŵanace ŵa Lisipa, mwanace jwamkongwe jwa Ayiya jwa Saulo. Ŵajigele soni ŵanace ŵacalume msano ŵele Melebi, mwanace jwamkongwe jwa Saulo, juŵaŵelece Adiliyele mwanace jwa Balisilayi jwakutyocela ku Mehola.

⁹ Ni ŵapelece kwa Agibiyoni, ni wosopewo ŵawulajile kwitumbi, pameso pa AMBUJE, wosope msano ni ŵaŵiliwo ŵawilile pamo. Jemanjajo ŵawulajidwe masiku gandanda gagowola, lisiku lyandanda lyakuja kata balele.*

¹⁰ Lisipa, mwanace jwamkongwe jwa Ayiya, jwajigele cisaka ni ŵatandice pa lwala lulwaliji mitembo ja ŵanduwo, kutandila lisiku lwandanda lyagowola mpaka soni kugwa kwa ula. Jwamkongwejo nginasosa kuti pa mitembopo payice yijuni musi kapena yilombo ya mwitinji cilo.

¹¹ Daudi piŵapikene yiŵatesile Lisipa, mwanace jwa Ayiya, ŵele ŵiŵaliji ŵamkwawo ŵa Saulo,

¹² Daudi ŵapite kukujigala mawupa ga Saulo ni mawupa ga Yonatani mwanace jwa Saulo. Ŵapite kugatyosya m'myala mwa ŵandu ŵa ku Yabeshi ku Giliyadi. (Jemanjajo ŵajiŵile mawupago ku luŵala lwa ku Beti Shani, kwele Afilisiti kuŵamwuleje Saulo pa Litumbi lya Gilibowa).

¹³ Daudi ŵajigele mawupa ga Saulo ni Yonatani mwanagwawo, ni ŵasonganyisye mawupa ga ŵandu msano ni ŵaŵili ŵiŵawulajidwe kwitumbi ŵala.

¹⁴ Ni ŵagaŵisile pamo mawupa ga Saulo ni mawupa ga Yonatani mwanagwawo, mcilambo ca Benjamini ku Sela, m'malembe ga Kishi baba ŵawo ŵa Saulo. Yeleyi yatendedwe ligongo ni yiŵalamwile mwenye. Panyuma pakwe Mlungu ŵajanjile mapopelo gakulambila cilamboco.

Ngondo ni Afilisiti ŵakulungwa yilu

¹⁵ Lisiku line Afilisiti ŵamenyene soni ngondo ni Aisalaeli nipo Daudi ŵapite ni ŵa ngondo ŵakwe, ni ŵamenyene ni ŵa ngondo ŵa Afilisitiwo nipo Daudiwo ŵapesile mnope.

¹⁶ Jumo jwa Afilisiti ŵele ŵiŵakolanjidwaga kuti Lafa, lina lyakwe Ishibi Benobi, jwele lipanga lyakwe lyasitopaga makilogalamu gatatu ni hafu, ŵaliji ni upanga wasambano mlamba mwakwe, ŵaganisisye yakuti awulaje Daudi.

¹⁷ Nambo Abishayi mwanace jwa Seluya jwayice kukwakamucisya Daudi, ni ŵalimbene ni Mfilisitijo mpaka ŵamwuleje. Pelepo ŵandu ŵa Daudi ŵalumbilile Daudi kuti, “Wawo ngisajawula ku ngondo ni uwe kogopa kuti taciwulajidwa. Ligongo Aisalaeli wosope akwakulupilila.”

¹⁸ Kaneka soni ngondo jatandite ni Afilisiti ku Gobu. Pelepo Sibekayi jwa ku Husha, ŵawuleje Safi, jumo jwa yisukulu ya Lafa.

¹⁹ Soni ngondo jine jatandite ni Afilisiti ku Gobu. Ni Elihanani, mwanace jwa Yale Olegimu jwa ku Betelehemu, jwawuleje Goliyati Mgiti, jwele citela ca lipanga lyakwe caliji cacikulungwa mpelaga citela cakuwunjila nguwo.

²⁰ Kwatandite soni ngondo ku Gati, kwele kwapali mundu jwamlewu jwakwete mwigasa lililyose yala msano ni cimo, mlusajo lulilose nombe lwakwete yala msano ni cimo, yosope pampepe yaliji makumi gaŵili ni mcece. Soni jwaliji jumo jwa yisukulu ya Lafa.

²¹ Ndaŵi jele jwalakweju jijwanyosyaga Aisalaeli, Yonatani mwanace jwa Shimeya, mlongo mjawo jwa Daudi, ŵamwuleje jwelejo.

²² Ŵandu mcecewo ŵaliji yisukulu ya Lafa ku Gati, ni ŵawulajidwe ni Daudi kwika soni ŵa ngondo ŵakwe.