2 Sam 2 - Chiyawo Bible

Daudi mwenye jwa ku Yuda

¹ Panyuma pakwe, Daudi* ŵawusisye AMBUJE* kuti, “Ana njawule kuja kutamilicika ku msinda wine uliwose wa ku Yuda?” AMBUJE ŵamsalile kuti, “Elo, jawulani.” Daudi ŵawusisye soni kuti, “Sambano njawule kwapi?” AMBUJE ŵatite, “Mjawule ku Hebuloni.”

² Myoyo Daudi ŵajawile kweleko pamo ni aciŵamkwakwe ŵaŵili ŵala, Ahinowamu jwa ku Yesilele, ni Abigelo jwamkongwe jwa masije jula jwa Nabala jwa ku Kalimeli.

³ Daudi ŵajawile ni ŵandu ŵakwe ŵiŵaliji nawo ŵala, jwalijose ni liŵasa lyakwe. Ŵatemi m'misi ja ku Hebuloni.

⁴ Ŵandu ŵa ku Yuda ŵayice ku Hebuloni, ni kweleko Daudi ŵamtasile mawuta pa mtwe pakwe kuti aŵe mwenye jwawo. Piŵapikene Daudi kuti ŵandu ŵa ku Yabeshi Giliyadi ni ŵiŵamsicile Saulo mwilembe,

⁵ ŵatumile utenga kwa ŵanduwo kuja kwasalila kuti, “AMBUJE ampe upile, pakuŵa mwalosisye kulupicika kwa Saulo mbujegwenu pakumsika mwilembe.

⁶ Sambano AMBUJE amlosye jemanja canasa cawo cangamala ni kulupicika kwawo. Une none tinamtendele yindu yambone ligongo lya yimtesileyi.

⁷ Ni ligongo lyakwe sambano mlimbe mtima, ni kutenda yindu yacilumelume, pakuŵa ambuje ŵenu Saulo awile, ni ŵandu ŵa mtundu wa Ayuda andasile une mawuta pa mtwe kuti mbe mwenye gwawo.”

Ishibosheti akumjinjisya ucimwene wa Aisalaeli

⁸ 4 Abinele mwanace jwa Nele, juŵaliji jwakulamulila asilikali ŵa ngondo ŵa Saulo, ŵaliji ali amjigele Ishibosheti mwanace jwa Saulo ŵajombwece najo pesi pa Yolodani, ku Mahanaimu.

⁹ Kweleko ŵamjinjisye ucimwene, kuti aŵe mwenye jwa ku Giliyadi, Asha, Yesilele, Efelemu ni Benjamini, tugambe kuti cilambo cosope ca Aisalaeli.

¹⁰ Ishibosheti, mwanace jwa Saulo, jwaliji jwa yaka makumi mcece ndaŵi jiŵatandaga kulamulila Aisalaeli, ni ŵatemi pa ucimwene wakwewo kwa yaka yiŵili. Nambo lukosyo lwa Yuda lwa mkuyiye Daudi.

¹¹ Daudi ŵaliji mwenye jwa lukosyo lwa Yuda ku Hebuloni, yaka msano ni yiŵili ni hafu.

Ngondo pasikati pa Aisalaeli ni Ayuda

¹² Myoyo Abinele mwanace jwa Nele pamo ni asilikali ŵa ngondo ŵa Ishibosheti mwanace jwa Saulo ŵajawile ku Gibiyoni, kutyocela ku Mahanaimu.

¹³ Yowabu mwanace jwa Seluya pamo ni asilikali ŵa ngondo ŵa Daudi ŵajawile kuja kusimana nawo kwitamanda lya Gibiyoni. Ŵatemi pasi, ŵane lisi line lya litamandalyo, ŵane soni lisi linelyo.

¹⁴ Abinele ŵamsalile Yowabu kuti, “Acacanda ŵenu ni ŵetu ayice, amenyane tulole.” Yowabu ŵajanjile kuti, “Yambone, amenyane.”

¹⁵ Acacandawo ŵayice ni ŵaŵalasile, ŵa lukosyo lwa Benjamini, acacanda wa Ishibosheti, mwanace jwa Saulo, ŵapali likumi ni ŵaŵili. Acacanda ŵa Daudi ŵapali soni likumi ni ŵaŵili.

¹⁶ Myoyo jwalijose jwa acacandawo ŵawukamwile mtwe wa m'magongo jwakwe ni ŵamsomile mjakwejo mu mbalati ni upanga. Myoyo wosope makumi gaŵili ni mcece ŵawile ndaŵi jimope. Ni ligongo lyakwe malogo ŵagakolasile kuti Helikati Hasulimu, nipo gali ku Gibiyoni.

¹⁷ Ni japali soni ngondo jakogoya lyele lisikuli. Asilikali ŵa ngondo ŵa Daudi ŵamputile Abinele pamo ni asilikali ŵakwe ŵa ngondo ŵa ku Isalaeli.

¹⁸ Yowabu, Abishayi ni Asahelo, ŵanace ŵatatu ŵala ŵa Seluya, ŵaliji kukoko. Asahelo ŵaliji ŵakupakombola kuwutuka mpela ngolombwe.

¹⁹ Jwalakweju ŵamtopwesye Abinele. Pakuwutukapo nginalolaga aku nakuku, meso gakwe galiji pa Abinele basi.

²⁰ Piŵagalawice Abinele kulola munyuma, ŵatite kuti, “Ana m'mweji Asahelo?” Jwalakwe ŵajanjile kuti, “Ni une kwene.”

²¹ Abinele ŵamsalile kuti, “Msepucile mbali jine jilijose, mumkamule jumo jwa asilikaliwo, mumsumule yindu yakwe yosope.” Nambo Asahelo nginasaka kuti amlece kumtoposya Abinelijo.

²² Myoyo Abinele ŵamsalile soni Asahelo kuti, “M'mweji mundece, mkasimundoposya, ligongo cici mkunjinjilicisya kuti namwulaje? Nambi naga ngumwulaga, tingawonegane najo uli Yowabu, mlongo mjenu?”

²³ Nambo Asahelo nginasaka kumleka jwalakwejo. Myoyo Abinele ŵamsomile Asahelojo mlutumbo ni lipanga lyakwe, lipangalyo lyakopocele ku mgongo wakwe. Asahelo ŵagwile pasi, kuwa kwaliji kukoko. Ŵandu wosope ŵiŵayice pa malo pele piŵawilile Asahelo, ŵajimaga nipo ŵasoŵaga yakutenda.

²⁴ Nambo Yowabu ni Abishayi ŵatandite kumwutusya Abinele. Ndaŵi jilyakapilaga lyuŵa, ŵayice kwitumbi lyakolanjidwa Ama, lilyaliji cakunokuno mkanituyice ku Giya, petala lyakuja ku cipululu ca Gibiyoni.

²⁵ Ŵandu ŵa lukosyo lwa Benjamini ŵasongene pamo kukumkamucisya Abinele, ni ŵapanganyisye likuga limpepe lya ngondo, ni ŵajile kwima pacanya pa litumbi.

²⁶ Abinele ŵamwusisye Yowabu mwakwesya maloŵe kuti, “Ana tupitilisyepe kuputa ngondo mpaka msogolo? Ana ngakumanyilila kuti mbesi jakwe tijiŵe jakupweteka? Ana timwalekasye cakaci ŵandu wenu kututoposya m'weji acalongo acimjenu?”

²⁷ Yowabu ŵajanjile kuti, “Kusyene, ngulumbila, pameso pa Mlungu jwacijumi, mkaŵe ŵangaŵeceta, asilikali ŵa ngondo ŵanguŵa mkinaleka kwatoposya acalongo acimjawowo mpaka malaŵi kundaŵi.”

²⁸ Myoyo Yowabu ŵagombile lipenga, ni asilikali ŵakwe ŵosope ŵalesile, ngatoposya soni Aisalaeli, ni nginamenyana nawo soni.

²⁹ Myoyo Abinele ni asilikali ŵakwe ŵajesile cilo cosope, mpaka ŵacipelete Ciŵata ca Alaba. Ni ŵajombwece Lusulo lwa Yolodani, ni ŵajesile kundaŵi kosope, mpaka ŵajile kwika ku Mahanaimu.

³⁰ Yowabu ŵawujilile kuŵajile kumtoposya Abinele kula. Piŵasongenye pamo asilikali wosope, kwasimanice kuti asilikali ŵa Daudi likumi limo kwisa msano ni mcece akusoŵa, pamo ni Asahelo.

³¹ Nambo asilikali ŵa Daudi ŵaliji ali ŵawuleje ŵandu 360 ŵa Abinele, ŵa lukosyo lwa Benjamini.

³² Ŵawujigele mtembo wa Asahelo, ni ŵajile kuwusika ku malembe ga acinangolo wakwe, ku Betelehemu, Yowabu ni asilikali ŵakwe ŵajesile cilo cosope, ni kwacelele ali ku Hebuloni.