2 Sam 13 - Chiyawo Bible

Aminoni ni Tamala mlumbugwe

¹ Abisalomu mwanace jwa Daudi,* ŵakwete mlumbugwe jwakusalala, lina lyakwe Tamala. Aminoni mwanace jwine jwa Daudi, ŵamnonyele Tamala;

² mpaka jwalakwe ŵayikene mwa kulwala, ligongo lyangagona lugono, kumganisya Tamala mlumbugwejo. Tamalajo ŵaliji mwali jwangamanya ŵalume, ni caliji cindu cangakomboleka kuti Aminoniwo amtende jwalakwejo cindu cilicose.

³ Nambo Aminoni ŵakwete mjakwe, lina lyakwe Yehonadabu, mwanace jwa Shimeya, mpwakwe Daudi. Yonadabujo ŵaliji mundu jwakalamuka mnope.

⁴ Lisiku line Yonadabu ŵamwusisye Aminoni kuti, “Ana m'mweji ngati mwanace jwa mwenye, nambi ligongo cici mkuwoneka ŵangasangalala kundaŵi kulikose? Ana ligongo cici ngamkusalila une?” Aminoni ŵamjanjile jwalakwejo kuti, “Une ngumnonyela Tamala mlumbugwawo acimwene ŵangu Abisalomu.”

⁵ Myoyo Yonadabu ŵamsalile jwalakwejo kuti, “Mkagone pa cindanda penu, ni mkalambucisye kulwala. Baba ŵenu pitakayice kukumlola, mkasalile kuti, ‘Conde akamsalile Tamala, mlumbu gwangu, kuti ayice kukungolocesya cakulya kuti une ndye. Ayice kungolocesya cakulyaco kunokuno, uneji ndili mkulola, kuti tinaciwoneje soni kuti tindye cakulyaco kutyocela m'magasa mwakwe.’ ”

⁶ Myoyo Aminoni ŵagonile, ni ŵalambucisye kulwala. Piŵayice mwenye kukumlola, Aminoniwo ŵasalile mwenyewo kuti, “Conde, akamsalile Tamala mlumbu gwangu kuti ayice akuno, kuti tandelecele cakulya une ndili mkuciwona, kuti tindye cakulyaco kutyocela m'magasa mwakwe.”

⁷ Daudi ŵatumisye utenga kwa Tamala kumsalila kuti, “Mjawule ku nyumba ja mlumbu gwenu Aminoni, mkamtelecele cakulya.”

⁸ Tamala ŵajawile ku nyumba ja Aminoni mlumbugwe, ni ŵamsimene ali cigonele. Ŵajigele utandi, ŵawuwunyile, ni ŵagumbile mikate Aminoniwo ali mkulola, ni ŵajitelece mikatejo.

⁹ Ŵajigele ciwaya, ni ŵajikuswile mikatejo, ŵampele jwalakwejo kuti alye, nambo Aminoniwo ŵakanile kulya. Aminoni ŵatite kuti, “Mwasalile ŵandu wosope atyoce amuno.” Myoyo ŵandu wosope ŵakopwece m'nyumba mula.

¹⁰ Aminoni ŵamsalile Tamala kuti, “Myice naco cakulya cila mcipinda muno, kuti mundisye ni magasa mwenu.” Tamala ŵajigele mikate jiŵatelece jila, ni ŵajinjile najo mcipinda muŵaliji Aminoni, mlumbu gwawo jula.

¹¹ Nambo ali aŵandicile naco cakulya kwa Aminoni kuti amlisye, Aminoni ŵamkamwile Tamala, ni ŵamsalile kuti, “Myice mgone ni une, cemwali.”

¹² Nambo Tamalajo ŵajanjile kuti, “Iyayi, acimwene, mkasimunganganicisya. Yindu yamtundu welewu nganiyitendecekweje, citandilile kala kose ku Aisalaeli. Mkatenda yindu yawusilu yamtundu welewu.

¹³ Ana uneji ngasindenda soni pakwenda pasikati pa ŵandu? Soni m'mwejo timciŵa jumo jwa yisilu pasikati pa Aisalaeli. Ni ligongo lyakwe sambano ngumŵenda kuti conde, ngamwile lukongolo lwenu, mwasalile kaje mwenye, pakuŵa mwenyewo ngakana kuti lombele m'mwejo.”

¹⁴ Nambo Aminoni nginapikana yiŵaŵecetaga Tamala yila. Ni pakuŵa ŵakwete macili gakumpunda Tamala, Aminoniwo ŵamkamulile Tamalajo ni ŵagonile najo.

¹⁵ Kaneko Aminoni ŵatandite kuŵengana najo Tamala mnope. Uŵengani wakwe ni Tamala wakusile mnope kupundana ni muŵamnonyelele pandanda. Aminoniwo ni ŵamsalile Tamala kuti, “Jimukani, mjawuleje.”

¹⁶ Nambo Tamalajo ŵakanile, ŵatite kuti, “Iyayi, acimwene ŵangu, kundoposya kwamtundu ŵelewo kuli kulemwa kupundana ni yimundendeleyi,” Nambo Aminoni nginasosa kupikana yiŵasalaga Tamalayo.

¹⁷ Ndaŵi jijojo Aminoni ŵamŵilasile mcanda juŵamtumicilaga, ni ŵamsalile kuti, “Mumkoposye jwamkongweju, atyoce amuno, ngangusaka kumwona soni, soni mwugale litanga pitakopoce jwalakwejo.”

¹⁸ Myoyo mcanda jwa Aminoni jula ŵamkopwesye Tamala, ni ŵawugele litanga jwamkongwejo ali akopwece. Ndaŵi jeleji Tamala ŵawete dilesi jelewu, ja makono gamalewu, mwelemo ni muŵawalilaga ŵanace ŵacakongwe ŵa mwenye, ŵimkiniŵamanya acalume, pa ndaŵi jelejo.

¹⁹ Tamala ŵalitasile liwu kumtwe kwakwe, ni ŵapapwile cakuwala cakwe cacilewu ciŵawete cila. Myoyo ŵakamwile makono gakwe kumtwe, ni ŵapitaga mcilila mwakwesya maloŵe litala lyosope.

²⁰ Pelepo Abisalomu, mlumbugwe jwacitumbo cimo ni Tamala, ŵamwusisye kuti, “Ana Aminoni, alumbu ŵenu, amlemwekasisye? Nambo m'mwe cemwali, mwukamule mtima, mjile jii. Jwalakwe jula mlumbu gwenu. Yeleyi mkalaga nayo mu mtima.” Myoyo Tamala ŵatamaga mpela mundu jwakuwilwa ku nyumba ja Abisalomu, mlumbugwe.

²¹ Daudi ali ayipikene yindu yeleyi, ŵapile nayo mtima kwabasi.

²² Nambo Abisalomu nginaŵeceta kandu kalikose kambone kapena kakusakala kwa Aminoni ligongo lyakuti ŵamkanganicisye Tamala mlumbugwe kutenda najo yindu yakusakala.

Abisalomu akumwulaga Aminoni

²³ Pali papite yaka yiŵili yamtundu, Abisalomu ŵaliji ni ŵandu ŵakwe ku masengo gakusenga manyunya ga ngondolo ku Baala Hasoli, maloga gali mwakuŵandikana ni msinda wa Efelemu. Ni ŵaŵilasile ŵanace ŵosope ŵacalume ŵa mwenye kuti akaŵe ali kweleko.

²⁴ Abisalomu ŵajawile kwa mwenye, ni ŵamsalile kuti, “mwenye, une jwakutumicila jwenu, ngwawula kuja kukamula masengo gakusenga manyunya ga ngondolo ni ŵandu ŵangu. Ni ngwaŵenda kuti naga yikomboleka akatame nowe, ŵalakwe mwenye pamo ni ŵakutumicila ŵawo.”

²⁵ Nambo mwenye ŵamsalile Abisalomu kuti, “Iyayi, mwanangu, tukajawula wosope nimkaŵa kuja kumlagasya.” Atamose kuti Abisalomu ŵalinjile kumkanganicisya amu namumu, nambo Daudi ŵakanile kwawula nawo, m'malo mwakwe ŵagambile kumpa upile Abisalomujo.

²⁶ Abisalomu ni ŵatite kuti, “Yambone, naga ŵalakwe ngakwawula, akunde kuti longane najo mpwanga Aminoniju.” Mwenye ni ŵawusisye kuti, “Ana ligongo cici mkusosa kuti jwalakweju mlongane najo?”

²⁷ Nambo Abisalomu ŵalimbicilepe, mpaka Daudi ŵakundile kuti Aminoni pamo ni ŵanace wosope ŵacalume ŵa mwenye ajawule nawo.

²⁸ Abisalomu ŵalamwile ŵamasengo ŵakwe kuti, “Mlolecesye kuti ndaŵi jitaŵe Aminoni ali akolelwe finyo. Naga ngumsalila kuti ‘Mumcanyande Aminoni,’ ndaŵi jijojo mumwulaje. Mkatenda woga, ngati une ni junamlamulile? Mlimbe mtima, ni mtende ya cilumelume.”

²⁹ Myoyo ŵakutumicila ŵa Abisalomu ŵamtesile Aminoni mpela muŵalamulile Abisalomu. Yili yitendekwe yeleyi, ŵanace wosope ŵacalume ŵa mwenye ŵajimwice, jwalijose ŵakwesile bulu jwakwe, ni ŵatisile.

³⁰ Nambo ŵanduwo ali ciŵela mwitala, ngani jaliji jili jimyice Daudi kuti, Abisalomu ŵawuleje ŵanace wosope ŵacalume ŵa mwenye, pangali jumo jwakulupwice ni umi.

³¹ Mwenye ŵajimwice, ni ŵapapwile yakuwala yakwe, ni ŵaligwisisye pasi. Ŵakutumicila ŵa mwenye ŵiŵaŵandikene nawo, ŵapapwile yakuwala yawo nombe nawo.

³² Nambo Yehonadabu, mwanace jwa Shimeya, mkulugwe jwa Daudi, ŵatite kuti, “Ambuje, akaganisya kuti ŵanace wosope ŵa ŵalakwe mwenye awulajidwe, Aminonipe ni ŵawulajidwe. Ayi yitendekwe myoyo pakuŵa Abisalomu ŵasimicisye mu nganisyo syakwe kutenda yeleyi, kutandila lisiku lyele Aminoni liŵamkamulile Tamala, mlumbugwe jwa Abisalomu.

³³ Ni ligongo lyakwe sambano ŵalakwe mwenye jwangu, akusalaga ni nganisyo syakuti ŵanace ŵawo wosope ŵacalume awulajidwe. Aminonipe ni ŵawulajidwe.”

³⁴ Ndaŵi jeleji Abisalomu ŵaliji ali atisile. Nambo msilikali jwakulondela pa cipata piŵalolite, ŵagambile kwawona ŵandu ŵajinji ali mkwisa kutyocela ku msewo wa Holonayimu, mungulugulu litumbi.

³⁵ Ali apikene yeleyi Yehonadabu ŵamsalile mwenye kuti, “Ŵanace ŵenu ŵacalume ayice. Ambuje, yijesile mulamula mpela munaŵecetele mula.”

³⁶ Ali namalape Yonadabu kuŵeceta, ŵagambile kwawona ŵanace ŵacalume ŵa mwenye ŵala ali mkwisa, ni ŵanacewo ŵatandite kulila malilo. Papopo mwenye pamo ni ŵakutumicila ŵawo, nombe nawo, ŵatandite kulila mnope.

^37-38 Nambo Abisalomu ŵatisile ni ŵapite kwika kwa Talimai, mwanace jwa Amihudi, mwenye jwa ku Geshu. Daudi ŵalisile malilo ga Aminoni mwanace jwakwe kwa ndaŵi jelewu. Abisalomu ŵatemi ku Geshu yaka yitatu.

³⁹ Mwenye Daudi camkamwile canasa cakusosa kumkuya Abisalomu. Ndaŵi jeleji ni kuti ŵandu ali amyalesye Daudi ya ciwa ca Aminoni.