2 Sam 11 - Chiyawo Bible

Kulemwa kwa Daudi

¹ Pa ndaŵi jakusipucila yitela, ndaŵi jiŵanonyelaga ayimwene kwawula kukuputa ngondo, Daudi* ŵamtumile Yowabu ni ŵakulongolela ŵakwe ni asilikali ŵa ngondo ŵa Aisalaeli wosope, ŵiŵapundile pa ngondo jakulimbana ni Aamoni, ŵawusyungulile msinda wa Laba. Nambo Daudi ŵasigele ku Yelusalemu.

² Lisiku line ca kwigulo, Daudi ŵajimwice pa cindanda cakwe, ni ŵajendaga pacanya pa msakasa ŵa nyumba jakwe ja ucimwene. Ali pa msakasapo, ŵam'weni jwamkongwe jwine ali mkoga. Jwamkongwejo ŵaliji jwakusalala mnope.

³ Myoyo Daudi ŵamtumile mundu kuti akawusye ya jwamkongwejo kuti ŵaliji ŵani. Mundu jula ŵamsalile Daudi kuti, “Jwamkongwe julatu ali Betisheba, mwanace jwa Eliyamu, ŵamkwawo ŵa Uliya Muhiti.”

⁴ Myoyo Daudi ŵatumile ŵa mitenga kuti akamjigale jwamkongwejo. Jemanjajo ŵayice najo kwa Daudi, ni Daudi ŵagonile ni najo. Ndaŵi jelejo jwamkongwejo ŵaliji ali namalape ulwele wacikongwe wa mwesi ni mwesi. Panyuma pakwe jwamkongwe jula ŵawujile ku nyumba jakwe.

⁵ Ali amanyilile kuti jwalakwe akwete cilu, ŵatumisye utenga kwa Daudi kukumsalila kuti, “Unetu citandilile mwemula, nganimba jwambone, jwana cilu.”

⁶ Ali apikene maloŵe gelega Daudi ŵatumisye maloŵe kwa Yowabu kuti, “Mumtumisye Uliya, Muhiti jula akuno.” Yowabu ŵamtumisye Uliya jula kwa Daudi.

⁷ Ali ayice Uliya, Daudi ŵamwusisye muŵaŵelele Yowabu ni asilikali wosope ku ngondoko, soni ni mwele mujajendelaga ngondo.

⁸ Kaneko Daudi ŵamsalile Uliya kuti, “Jawulani ku nyumba jenu, mkapumule kaje panandi.” Uliya ŵakopwece ku nyumba ja mwenye, kaneko mwenyejo ŵamtumile mundu ni mtuka kuti akapelece kwa Uliya.

⁹ Uliya nginajawula kuja gona ku nyumba jakwe, nambo ŵagonile pa cipata cakwinjilila ku nyumba ja mwenye pamo ni ŵamasengo wosope ŵa ambujegwe.

¹⁰ Ŵandu ŵamsalile Daudi kuti, “Uliya jula nginajawula ku nyumba jakwe.” Daudijo ŵamwusisye Uliya kuti, “Ana m'mweji ngati mtyocele ku ulendo? Nambi uli nganimjawula ku nyumba jenu?”

¹¹ Uliya ŵamjanjile Daudi kuti, “Libokosi lya Cilanga, soni Aisalaeli ni Ayuda, akugona m'masakasa. Soni ambuje ŵangu Yowabu pamo ni asilikali ŵa ngondo ŵa mwenye akugona pasa. Ana ni komboleka une kwawula ku nyumba jangu kuti ngalyeje ni kumwa, ni kuja gona ni ŵamkwangu? Ngulumbila pali ŵalakwe ambuje, une ngatenda yeleyo.”

¹² Daudi ŵamsalile jwalakwejo kuti, “Cambone, tamani apano lelo, malaŵi tinamkunde kuti mjawuleje.” Myoyo Uliya ŵatetemye mu msinda wa Yelusalemu lyele lisikuli mpaka kundaŵi kwakwe.

¹³ Daudi ŵamŵilasile Uliya kuti akalye najo yakulya. Ŵalile najo soni ŵamkolelwekasisye. Nambo ligulo Uliya ŵajawile kuja gona pa malo gakwe gala, pamo ni ŵamasengo ŵa mwenye, nginajawula kuja gona ku nyumba jakwe.

¹⁴ Kundaŵi kwakwe Daudi ŵamlembele Yowabu cikalata ni ŵampele Uliya pejo cikalataco kuti akapelece.

¹⁵ Mcikalatamo ŵalembile kuti, “Uliyajo mumŵice pasogolo pasyesyene pajijogoyisye mnope ngondo, ni mumlecele jika kuti amsome ni kuwulajidwa.”

¹⁶ Myoyo ndaŵi jiŵawusyungulilaga msinda ula, Yowabu ŵamŵisile Uliya pa malo giŵagamanyililaga kuti pana asilikali ŵa ngondo ŵamacili.

¹⁷ Asilikali ŵa ngondo ŵa mu msindawo ŵakopwece kukumenyana ni asilikali ŵa ngondo ŵa Yowabu. Myoyo asilikali ŵane ŵa ngondo ŵa Daudi ŵawulajidwe, nombe nawo soni Uliya.

¹⁸ Myoyo, Yowabu ŵamtumile mundu jwa utenga kwa Daudi kuja kumsalila yosope yiyatendekwe ku ngondoko.

¹⁹ Ŵamsalile mundu jwa utengajo kuti, “Patimkamale kwasalila mwenye mbili josope ja ngondo,

²⁰ naga mwenye akuja kupya mtima, ni kuja kumwusya kuti, ‘Ana ligongo cici mwajawile kukuputa ngondo mwakuwuŵandicila msinda? Ana nganim'manyililaga kuti takamsome kutyocela mkati mwa lipupa lyakusyungulila msindawo?

²¹ Ana Abimeleki mwanace jwa Gidiyoni ŵamwuleje ŵani? Ngati jwamkongwe ni juŵamwuleje, pakumgwicisya liganga lya lisyago kutyocela pacanya pa lipupa, kwakuti ŵawilile ku Tebesi? Ana ligongo cici mwajile kuliŵandicila lipupa?’ Pelepo m'mwejo mkasale kuti, ‘Msilikali jwenu jwa ngondo, Uliya Muhiti jula, nombe najo awulajidwe.’ ”

²² Mundu jwa utenga jula ŵajile kwika kwa Daudi, ni ŵamsalile yosope yele Yowabu ŵamtumile kuti akasale.

²³ Ŵamsalile Daudi kuti, “Amagongo ŵetu atupundile pa ngondo, ŵakopwece kuja kulimbana ni uweji kwitinji. Nambo uweji twatopwesye mpaka ku mlango wa cipata.

²⁴ Myoyo ŵandu ŵakuponya mipamba ŵaliji mkwasoma asilikali ŵenu ŵa ngondo kutyocela mluŵala lwa lipupa. Ni asilikali ŵenu ŵane ŵa mwa asilikali ŵenu ŵa ngondo ŵa ŵalakwe mwenye ŵawulajidwe. Msilikali jwawo jula, Uliya Muhiti, nombe najo ŵawulajidwe.”

²⁵ Pelepo Daudi ŵamsalile mundu jwa mtenga jula kuti, “Mkasalile Yowabu kuti, ‘Akadandawula nayo yeleyi, pakuŵa jwakuwa jwangamanyika. Mlimbicile kulimbana nawo msindawo, ni kuwupunda pa ngondo.’ Myoyo mkamlimbisye mtima Yowabujo.”

²⁶ Ŵamkwakwe Uliya piŵapikene kuti Uliya awulajidwe, ŵalisile, kwalilila ŵamkwakwe.

²⁷ Gali gamasile masiku gakulila malilo, Daudi ŵamtumile mundu kuja kumjigala jwamkongwejo, ni ŵayice najo ku nyumba ja mwenye, Daudi ni ŵamlombile. Jwamkongwejo ŵamŵelecele mwanace jwamlume. Nambo AMBUJE* nginayinonyela yiŵatesile Daudiyo.