2 Petulo 3 - Chiyawo Bible

Cilanga cakwika soni kwa Ambuje

¹ Ŵakunonyelwa acimjangu mwa Ambuje, aci sambano cili cikalata cangu caŵili cilembele kwa jemanja. Mu yikalata yosopeyi sacile mkulimbisya mitima jemanja kuti mkoleje nganisyo sisyesyene.

² Mkumbucile maloŵe giŵaŵecete ŵakulocesya ŵaswela ŵakala, nambo soni lilamusi lya Ambuje ni Mkulupusyo jwetu liŵampele jemanja ŵandumetume.

³ Nambo pandanda mkwenela kumanyilila kuti pa masiku gakumalisya ŵandu ŵane taciyika nipo taciŵa ŵakumbila kutenda yakusaka yawo acimsyene. Tacimnyosya

⁴ nipo tacimlalatila ni kuŵecetaga kuti, “Ana eti Ambuje ŵatesile cilanga* kuti taciyika soni? Nambi ali kwapi? Kekala kalakala kiŵawile acinangolo ŵetu, nambo yosope yili mpela muŵayipanganyicisye Mlungu pandanda pala.”

⁵ Taciŵeceta yeleyi ligongo akusaka kuliŵalila kuti kalakala kwinani ni cilambo capasi capanganyidwe ni Mlungu pagamba kuŵeceta maloŵe. Ni maloŵe gakwe ŵalekangenye cilambo capasi kutyocela ku mesi ni kuwutyosya mkuli m'mesimo,

⁶ ni mesi gagogo cilambo capasi cajonanjidwe ni mesi gatutumule.

⁷ Nambo Mlungu akulamwile kwinani ni cilambo capasi ca masiku agano kuti yisunjidwe kuti tayijoce ni moto. Akuyisunga mpaka pa lisiku litacilamula ni kwajonanga ŵandu wosope ŵangakusamala ya jwalakwejo.

⁸ Ŵakunonyelwa acimjangu mwa Ambuje, mkaliŵalila cindu cimpepe, kuti yaka 1,000 yili mpela lisiku limo pameso pa Ambuje.

⁹ Ambuje ngakucelewa kutenda yiŵasasile kuti taciyitenda, mpela mwakusaganicisya ŵane, cakuwona cili cakuti jwalakwejo agambile kuwusimana mtima, ligongo lyakuti ngakusaka kuti ŵane ajonanjidwe, nambo kuti apitikuce mtima.

¹⁰ Lisiku lya Ambuje tiliciyika mpela jwawiyi. Pa lisiku lyelelo ya kwinani tiyicijonasika mtande wa lisegwe lyakogoya. Yindu yosope tiyicipya ni moto ni kunyelenyenduka, soni cilambo capasi ni yosope yili mwelemo tiyicipya.

¹¹ Yosope yene tiyicijonasika mwa litala lyeleli, ana jemanja timciŵa ŵandu ŵamtuli? Ma umi genu gaŵeje geswela ni kulipeleka kwa Mlungu.

¹² Mjembeceleje lisiku lyele Mlungu litacajamuka ŵandu wosope, myoyo mlinjilileje kuti lisikuli liyice sampano. Lyele lisikulyo kwinani tikucipya ni konanjidwa, soni yindu yosope tiyicinyelenyenducila m'motomo.

¹³ Nambo pakukuya cilanga ca Mlungu, tukwembecela kwinani kwa sambano ni cilambo capasi casambano, mwele timuciŵa m'mangwakwe mwa cilungamo.

¹⁴ Myoyo ŵakunonyelwa acimjangu, pakuti mkwembecela yeleyi, mtendeje mlinjilileje kuti Ambuje tamsimane mli ŵangali liŵala kapena liŵasi lililyose nambo soni mli mkutama pa mtendele ni Ambujewo.

¹⁵ Mkaliŵalila kuti Ambuje ali ŵakuwusimana mtima ni cakulinga cakuti jemanja mkulupuce. Paulo, mlongo mjetu jwakunonyeledwa jula, nombe najo ŵamlembele jemanja ya yeleyi ni lunda luŵampele Mlungu jwalakwejo.

¹⁶ Paulo mu yikalata yakwe akusaŵeceta ya syele nganisi. Mwelemo mwana yine yakusawusya kuyipikanicisya, nambo ŵandu ŵangalijiganya ni ŵalunda lwangatamilicika akusayipotosya yeleyi mwakusapotocesya Malemba gane.

¹⁷ Sambano jemanja ŵakunonyeledwa, pakuti sambano myimanyi yeleyi, mkalamuce kuti yakulemwa ya ŵandu yitakumsokonesya ni kugwa.

¹⁸ Nambo mkule mu canasa ni mu umanyilisi wa Yesu* Klistu,* Ambuje ni Mkulupusyo jwetu. Jwalakwejo aŵe ni lumbili kutandila sambano mpaka kalakala. Ami.*