2 Petulo 2 - Chiyawo Bible

Aciŵalimu ŵa unami

¹ Kalakala ŵapali soni ŵakulocesya ŵa unami atamose sikati ja Aisalaeli. Myoyo soni sikati jenu tipaciwoneka aciŵalimu ŵa unami. Jemanjajo tacijinjisya mwa asili majiganyo ga unami ni gakonanga, atamose kumkana kwene Mbuje gwawo juŵamwombwele, pakutenda myoyo taciliŵilanjila conasiko mwacitema.

² Ŵajinji tacikuya yitendo yangalumbana nipo ŵandu tacinyosya litala lya usyesyene ligongo lya jemanjajo.

³ Ligongo lyakunonyela mnope yipanje, jemanjajo tacilinga kupata cakupata pakumsalila jemanja maloŵe ga unami. Nambo cilango cawo cili pakuŵandika.

⁴ Pakuti Mlungu nganagakululucila malayika* gigalemwisye gala, nambo ŵagaponyisye mu ng'aso ja moto, m'masimbo ga cipi mwele muli ŵandu ŵataŵidwe ŵakwembecela camuko.

⁵ Mu ndaŵi ja Nowa, Mlungu nganiŵalecelela ŵandu ŵakala ŵala, nambo ŵamsunjile Nowape juŵalalicile ya cilungamo, pamo ni acimjakwe msano ni ŵaŵili pa ndaŵi jiŵayikesye cikumba ca mesi pa cilambo ca ŵandu ŵangasamala ya Mlungujo.

⁶ Mlungu ŵapelece cilango ku misinda ja Sodomu ni Gomola pakujijoca ni moto, ni kujitenda jalakwejo kuŵa cisyasyo cakwakalamusya ŵandu ŵitaciŵa ŵangasamala ya Mlungu.

⁷ Ŵamkulupwisye Loti, mundu jwakulungama, juŵalagaga ni ndamo syakulilecelela sya ŵandu ŵakusakala ŵala.

⁸ Mundu jwakulungama jula piŵaliji mkutama pasikati pawo ŵaliji mkupikana ni kusiwona ndamo syawo syakusakala sila, mwakuti lisiku ni lisiku mtima wakwe wakulungama ula waliji mkulaga.

⁹ Ayi yikulosya kuti Ambuje akusamanyilila kwakulupusya ŵandu ŵangalungama kwineku ali mkwembeceya lisiku lyakuti alamulidwe.

¹⁰ Mnopemnope tacipeleka cilango kwa ŵandu ŵakusakuya ya cilu ni kunyosyaga ulamusi. Aciŵalimu ŵa unami ni ŵakulikwesya, ŵele ŵangasamala ya mundu jwalijose, ŵele ŵangajogopa kwatenda cipongwe ŵa lumbili ŵakwinani.

¹¹ Atamose kuti malayika, gele gigali gakulimbangana ni gamacili mnope kupunda aciŵalimu ŵa unamiŵa, ŵangalalatila ŵa lumbiliwo mwacipongwe pameso pa Ambuje.

¹² Ŵandu ŵeleŵa ali mpela yilombo yangali lunda, yiyapagwile kuti yikamulidweje ni kuwulajidwa. Akusayinyosya mwacipongwe yindu yangakuyimanyilila. Nambo yitendo yawo yakusakalayo tiyicajonanga acimsyenewo,

¹³ nipo tacipegwa cilango ligongo lya ungalumbana wawo. Cele cikusacasangalasya cili gambaga kutenda yicindu yakutesya soni ni yakusakala, ligongo pa ndaŵi jakulya ni jemanja pa yindimba akusasangalala kutenda yakusakalayo.

¹⁴ Yakusaganisya yili kutenda cikululu ni acalume kapena acakongwe ŵa ŵandu ŵane; soni ŵangasaka kuleka yitendo yawo yakusakalayo. Akusiŵanyenjelela ŵandu ŵa mtima wangatamilicika. Akwete mtima wakusyoŵelela kukanilila yipanje. Jemanjajo ali ŵalwesece.

¹⁵ Ŵalesile kukuya litala lyakulungama soni asokonecele pakukuya litala lya Balamu mwanace jwa Bewoli, ŵele ŵiŵasakaga kuti apate mbote pakutenda yindu yangalumbana.

¹⁶ Nambo bulu jwamjamwice jwalakwejo ligongo lyakutenda yindu yangalumbana. Jwaŵecete mpela mundu, ni kulekasya yakuloŵela ya jwakulocesyajo.

¹⁷ Ŵandu ŵeleŵa ali mpela yisima yangali mesi soni ali mpela liwunde lyakututidwa ni mbungo jamacili. Mlungu ŵasalacisye jemanjajo cipi camti bii.

¹⁸ Jemanjajo akusaŵeceta maloŵe gakulikwesya gakuloŵela, ni yilakolako yakusakala ya cilu akusiŵanyenjelela ŵandu ŵagambile kulupuka kwene sikati ja acimjawo ŵakusakala ŵala.

¹⁹ Akusalanganaga nawo ya ufulu kwa mundu jwalijose, citamileco acimsyenewo ali acikapolo ŵa ndamo syakonanga. Pakuti mundu akusaŵaga kapolo jwa cacikumlamulila jwalakwejo.

²⁰ Mundu naga akukulupuka ku yakusakala ya cilambo capasi pano pakum'manyilila Yesu* Klistu* Ambuje ni Mkulupusyo jwetu, panyuma pakwe ni kusimanikwa kuti akutendaga yakusakala ni kugomecedwa ni yakusakalayo, ni kuti pambesi pakwe taciŵa ŵakusakala mnope kupunda muŵaŵelele pandanda.

²¹ Yikaliji yambone yikaŵe kuti jemanjajo ngakulimanyilila litala lya cilungamo, kulekangana ni kulileka ali amanyilile lilamusi lyeswela liŵapelece Mlungu kwa jemanjajo.

²² Yiyatendekwe kwa jemanjajo yikulosya kuti misyungu jila jili jakuwona jele jikusatiji kuti: “M'mbwa jiwujile ku matapisi gakwe” ni wine ula wakuti, “Liguluŵe lilyajosile, liwujile soni ni kuja kugalagata soni m'matope.”