2 Petulo 1 - Chiyawo Bible

¹ Cikalataci cikutyocela kwa une Simoni* Petulo,* jwakutumicila ni ndumetume* jwa Yesu* Klistu.* Cikalataci cikuja kwa ŵandu ŵiŵapocele cikulupi citwapocele uwe soni. Jemanja soni ŵacipocele ligongo lya cilungamo ca Mlungu ni Mkulupusyo jwetu Yesu Klistu.

² Umbone mtima wa Mlungu ni mtendele wapawinji yiŵe pa jemanja pakum'manyilila jwalakwejo nambo soni Yesu Ambuje ŵetu.

Aklistu akwenela kutama mpela ŵandu ŵaŵilanjidwe ni kusagulidwa ni Mlungu

³ Mlungu mwamacili gakwe ŵatupele yosope yakutukamucisya kutama ni umi ni mu utame wa kwa Mlungu, pakutumanyisya ya jwalakwejo juŵatuŵilasile ku lumbili ni umbone wakwe wakupunda.

⁴ Mwa litala lyeleli jwalakwejo atupele uwe upile wekulungwa ni wamtengo wapenani yiŵatusalile kuti tacitupa. Ŵatesile myoyo kuti mpocele umi wakwe wa Mlungu, pitimcikulupuka ku yindu yakusakala ya pa cilambo capasi ligongo lya yilakolako yakusakala.

⁵ Kwa lyele ligongoli mtende yakomboleka kuti mjonjecesye utame wambone pa cikulupi cenu, ni lunda lusyesyene pa ndamo syenu syambonesyo.

⁶ Mjonjecesyepo kuligosa pa lunda lwenulo, kulimbicila pa kuligosa kwenu, nambo soni kumlambila Mlungu pakulimbicila kwenuko.

⁷ Pakumlambilapo mjonjecesyepo canasa ca pa acanasi, nipo pa canasa ca pa acanasico mjonjecesyepo cinonyelo.

⁸ Naga yosopeyi yikuŵa mwa jemanja, ni kutupaga, ngasimŵa ŵakulepela ni ŵangali mate pa lunda lwakwamanyililila Ambuje ŵetu Yesu Klistu.

⁹ Kwa mundu jwanganakola yeleyi ali jwamtatale, soni ngaŵa mkulola pakutalika, soni aliŵalile kuti ŵamcapile ulemwa* wakwe wakala.

¹⁰ Ni ligongo lyakwe acalongo acimjangu ŵakulupilila, mtende citema kupunda kala kusimicisya kuti Mlungu ŵamŵilasile soni ŵamsagwile. Naga mkutenda myoyo ngasimgwa mu ulemwa.

¹¹ Mwa litala lyeleli tacimwugulila litala lyakwinjilila mu Ucimwene wangamala wa Ambuje ni Mkulupusyo jwetu, Yesu Klistu.

¹² Ni ligongo lyakwe cakulinga cangu cili cakuti nimkumbusyeje yeleyi ndaŵi syosope, atamose mkuyimanyilila ni kulupilila ni mtima wosope cakuwona cisyesyene cimwapocele.

¹³ Une nguganisya kuti cili cambone, pindili cijumi, kuti sisimusye mitima jenu pakumkumbusya yeleyi.

¹⁴ Pakuti ngumanyilila kuti ndaŵi jiŵandicile jakuciwula cilu acino, mpela mwamanyicisye Ambuje ŵetu Yesu Klistu.

¹⁵ Tilinjilile kumbali jangu kuti pitinjityoka, timpakombole kuyikumbucila yeleyi ndaŵi syosope.

Mboni sya lumbili lwa Klistu

¹⁶ Uwe nganitukuya ndano syagamba kupeka, pitwam'manyisye ya macili ni kwisa soni kwa Ambuje ŵetu Yesu Klistu. Twatesile kuwuwona ni meso getu ukulungwa wakwe.

¹⁷ Jwalakwejo ŵapocele ucimbicimbi wa Mlungu Atati, nipo gamyicilile maloŵe gakutyocela kwa Atati ŵa lumbiliwo kuti, “Aju ni mwanangu jwakunonyeledwa, jwele jungusasangalala najo.”

¹⁸ Maloŵe gelega twagapikene kutyocela kwinani ligongo twaliji najo pampepe petumbi lyeswela lila.

¹⁹ Mwakuti tukumanyilila sambano kuti maloŵe ga ŵakulocesya gala gali gakuwona. Kuli kwambone kuti mlolecesye mpela nyali jakuŵala m'malo ga cipi, kuyicila pa ndaŵi jijikutanda kuca, pele ndondwa ja mng'andu pitijicitanda kuŵala m'mitima mwenu.

²⁰ Nambo pandanda mpikanicisye kuti mundu pajikape ngaŵa mkomboleka gopolela maloŵe ga ŵakulocesya gakulembedwa m'Malemba.

²¹ Pajatu maloŵe ga ŵakulocesya nganigayika mwa lisosa lya mundu, nambo Msimu Ŵaswela ŵaŵecetekasisye jemanjajo maloŵe gakutyocela kwa Mlungu.