2 Mbi 8 - Chiyawo Bible

Yiŵatesile Solomoni

¹ Masengo gakutaŵa Nyumba ja AMBUJE ni ja Solomoni gajigele yaka 20.

² Panyuma pakwe Solomoni ŵataŵile soni misinda jele Mwenye Hilamu ŵapele welewo nipo kaneko Solomoni ŵatumisye Aisalaeli kuti akatame m'misindamo.

³ Solomoni ŵapite ku dela ja Hamati ni ku Soba nipo ŵasumwile misindajo.

⁴ Ŵataŵile lipupa lyekulungwa kusyungulila msinda wa Palimela ku cipululu. Ŵataŵile soni misinda jakusunjilamo yindu yine yakusosekwa ku Hamati.

⁵ Ŵataŵile soni msinda wakumkuli wa Beti Holoni ni wa kwiŵanda kwa Beti Holoni (misinda jesyungulilidwe ni ndenje ni yipata yakuwugalidwa cenene).

⁶ Ŵataŵile soni msinda wa Balati ni misinda jesope jakusunjilamo yindu yine, ŵataŵile soni misinda kuŵasungaga mahaci ni mageleta ni misinda jine jakutamamo ŵandu ŵakwela mahaci, ni yosope yiŵasacile kuti ataŵe ku Yelusalemu, ku Lebanoni ni madela gosope giŵalamulilaga Solomoniwo.

^7-8 Solomoni ŵayikamulisyaga masengo ga lulele yisukulu ya ŵandu ŵa ku Kenani ŵele nganawulajidwa pa ndaŵi jiŵajinjile Aisalaeli mcilambomo. Ŵandu ŵeleŵa ŵaliji Ahiti, Apelesi, Aamoli, Ahifi, ni Ayebusi ŵele yisukulu yawo yasigalile mcilambomo nipo jemanjajo ali acikapolo mpaka sambano jino.

⁹ Nambo jwalakwejo nginiŵakamulisya masengo Aisalaeli ga ukapolo, m'malo mwakwe jemanjaji ŵatumicilaga mpela asilikali ŵa ngondo, nduna, ŵakulolela mageleta ni ŵandu ŵakwe ŵakwela pa mahaci.

¹⁰ Jwalakwe ŵasagwile acakulungwa ŵakwanila 250 kuti ŵaloleleje ŵandu ŵamasengo.

¹¹ Solomoni ŵajigele ŵamkwakwe mwanace jwamkongwe jwa Mwenye jwa ku Iguputo,* kutyoka nawo ku msinda wa Daudi ni kwika nawo ku nyumba jiŵamtaŵile jwamkongwejo. Solomoni ŵatite kuti, “Ŵamkwangu akatamaga ku nyumba ja Mwenye Daudi jwa ku Isalaeli, ligongo lyakuti pa malo paliŵicile Libokosi lya Cilanga ca AMBUJE pakusaŵaga peswela.”

¹² Jwalakwejo ŵapelece mbopesi syakutinisya pa malo gakupelecela mbopesi gele giŵagataŵile kumeso kwa nyumbajo.

¹³ Ŵapelece mbopesi syakutinisya pakugakuya malamusi giŵapelece Mose* mpela muyasosedwelaga pa lyuŵa lililyose lya sabato, lyuŵa lyandanda pawuwonece mwesi, ni pa cindimba ca mkate wangali cakusasaŵilisya,* cindimba cakugungula mbeju mu mgunda, ni cindimba ca masakasa.*

¹⁴ Solomoni ŵagaŵile masengo ŵakutaga mbopesi ni Alefi pakukuya malamusi gele Daudi babagwe giŵampele jwalakwejo. Alefi ŵakamusyaga ŵakutaga mbopesi kwimba nyimbo ni masengo gane. Nombe nawo acilonda ŵaŵisile m'makuga ku Nyumba ja AMBUJE kuti akamuleje masengo gawo pa yipata ya ku nyumbajo mwakulingana ni malamusi ga Daudi mundu jwa Mlungu.

¹⁵ Jemanjaji nganakasa lilamusi lililyose lyakwamba masengo gakuti atende gakwayana ni nyumba syakusunjilamo yipanje kuti gatendekwe cenene.

¹⁶ Pandaŵiji masengo gosope galiji gali gamasile, kutandilila yilimbilimbi ja Nyumba ja AMBUJE mpaka kumala kutaŵa.

¹⁷ Kaneko Solomoni ŵapite ku Esiyoni Geba ni ku Elati mungulugulu mwa nyasa ku cilambo ca Edomu.

¹⁸ Mwenye Hilamu ŵatumicisye Solomoni sitima sya pa nyasa ni ŵandu ŵakumanyilila masengo ga pa nyasa. Ŵanduwo ŵapite kucilambo ca Ofili pamo ni ŵakutumicila ŵa Solomoni, nipo ku Ofiliko ŵajigeleko golidi* jwa makilogalamu 15,000 nipo ŵayice najo kwa Solomoni.