2 Mbi 6 - Chiyawo Bible

Solomoni akuŵeceta ni ŵandu

¹ Mwenye Solomoni ŵapopesile kuti, “AMBUJE* ŵetu, wawo asagwile kutama m'malo gangawoneka

² Nambo sambano, une nataŵile wawojo nyumba ja ucimbicimbi, jakuti wawo atamejemo mpaka kalakala.”

³ Kaneko mwenye ŵagalawucile ŵandu ŵala nipo ŵaŵendele upile ga kutyocela kwa Mlungu kuti gaŵe pa jemanjajo.

⁴ Mwenyejo ŵaŵecete kuti, “Acimbicikwe AMBUJE, Mlungu jwakusamlambila Aisalaeli, jwasunjile cilanga* ciŵatesile ni Daudi* baba ŵangu, pa ndaŵi jele Mlungu jiŵaŵecete ni Daudiwo kuti,

⁵ ‘Kutandilila mu ndaŵi jinakopwesye ŵandu ŵangu kutyocela mcilambo ca Iguputo mpaka sambano jino, une nganisagula msinda uliwose sikati ja ngosyo syosope sya Aisalaeli kuti andaŵilemo nyumba jakulambilamo une. Nganisagula soni mundu jwalijose kuti ŵalongolele ŵandu ŵangu Aisalaeli.

⁶ Nambo sambano sagwile msinda wa Yelusalemu kuti ataŵeko nyumba jangu ni kulambila une kweleko, soni nasagwile Daudi kuti ŵalamulileje ŵandu ŵangu.’ ”

⁷ Nipo Solomoni ŵapitilisye kuŵeceta kuti, “Pandaŵi jele baba ŵangu jiŵasosaga kutaŵa nyumba jakwalambilamo AMBUJE, Mlungu jwakusamlambila Aisalaeli,

⁸ AMBUJEWO ŵasalile baba ŵanguwo kuti, ‘Mwatesile cenene pakuganisya yakuti mundaŵile une nyumba.

⁹ Nambo m'mwejo nganimŵa ŵakuti mundaŵile une nyumba, nambo mwanagwenu jutimciŵeleka ni jutacindaŵila une nyumba.’

¹⁰ “Sambano AMBUJE atesile yiŵaŵecete, pakuti une ni junjinjile ucimwene m'malo mwa Daudi baba ŵangu, nipo ngwalamulila Aisalaeli mpela muŵaŵecetele AMBUJE, soni une ni jwele jundaŵile Nyumba ja AMBUJE, Mlungu jwetu.

¹¹ M'nyumbamo mbisile Libokosi lya Cilanga, mugali maganga gaŵili palembilepo maloŵe ga cilanga ca AMBUJE ciŵatesile ni Aisalaeli.”

Lipopelo lya Solomoni

¹² Kaneko Solomoni ŵajimi pasogolo pa malo gakupelecela mbopesi kwa AMBUJE, pameso pa ŵandu wosope ŵaŵasongene, ŵanyakwile makono gakwe ni ŵapopesile.

¹³ (Pandaŵi jeleji Solomoni ŵapanganyisye sanja ja bulonsi jiŵajiŵisile mkati mwa luŵala lwekulungwa lwa Nyumba ja AMBUJE. Mcilewu mwakwe mwaliji mamita gaŵili ni kandu kane, mcijipi mwakwe mwaliji mamita gaŵili ni kandu kane nipo msingu wakwe waliji mita jimo ni kandu kane. Kaneko ŵakwesile pa sanjapo, ŵatindiŵele ni ŵatandite kupopela pameso pa ŵandu wosope).

¹⁴ Ŵapopesile kuti, “AMBUJE, Mlungu jwa Isalaeli, pangali Mlungu jwine jwakulandana ni wawo kwinani ni pa cilambo cosope capasi. Wawo akusasunga cilanga cakusatenda ni ŵandu ŵawo, soni wawo akusalosya cinonyelo kwa jwalijose jwakusiŵapikanila wawo mwakulupicika.

¹⁵ Wawo atesile yiŵasalile Daudi baba ŵangu, jwakutumicila jwawo,

¹⁶ sambano, AMBUJE, Mlungu jwele Aisalaeli ŵamlambilaga, akwanilisye cilanga ciŵatesile ni baba ŵangu, wawojo piŵasalile kuti, ‘Mwiŵasa mwangu ngasimusoŵa mundu jwakwinjila ucimwene wa cilambo ca Isalaeli, naga ŵanangu akupitilisya kutenda ndamo jawo jambone ni kusunga malamusi ga wawo mpela muŵatendele baba ŵanguwo.’

¹⁷ Sambano ngwaŵenda wawo AMBUJE kuti akwanilisye cilanga ciŵatesile ni Daudi kuti ciŵe cakuwona.

¹⁸ “AMBUJE, ana mpaka akombolece kutama ni ŵandu pa cilambo capasi pano? Ana kwinani kwangali malo gakwanila gakuti mpaka atameko, nambi sambano ana tiyikombolece uli kuti wawo atame pa cilambo capasi pano m'nyumba jindaŵile une?

¹⁹ AMBUJE, ngwaŵenda kuti apikane ni kwanga lipopelo lyangu, une jwakutumicila jwawo.

²⁰ Aji jili nyumba jiŵasagwile wawo kuti uwe twalambilejemo. Myoyo ngwaŵenda kuti ajiloleleje Nyumbaji ni kupikana lipopelo lya une jwakutumicila jwawo.

²¹ Agapikaneje mapopelo gangu pamo ni mapopelo ga ŵandu ŵawoŵa Aisalaeli, pa ndaŵi jakwika kupopela pa malo gegano. Kwinani kwali wawoko atupikanileje ni kutukululucila ulemwa* wetu.

²² “Naga mundu akumlemwecesya mjakwe, nipo mundu jwakulemwajo akwima pasogolo pa malo gakupelecela mbopesi m'nyumba muno kuti alumbile naga yili yisyene kuti jwalakwejo nganalemwa,

²³ wawo AMBUJE, kwinani kwali wawoko apikane, nipo ŵalamule ŵakutumicila ŵawo. Apelece cilango kwa mundu jwakulemwajo, nambo mundu jumkinalemwajo amsalile kuti nganakola magambo, nipo ampe mbote jakwe mwakulingana ni kulungamika kwakwe.

²⁴ “Naga ŵandu ŵenu Aisalaeli akugomecedwa ni amagongo ŵawo ku ngondo ligongo lyakuti ŵalemwecesye wawo, nambo kaneko akwika kukwalambila wawo ni kuŵenda cikululucilo kwa wawo,

²⁵ pelepo, apikanile kuŵenda kwawoko, nipo akululuce ulemwa wosope wa Aisalaeli ni kwawucisya ku cilambo ciŵapele jemanjajo pamo ni acinangolo ŵawo.

²⁶ “Naga wawo akuwugala kwinani kuti ula jikagwa ligongo lyakuti ŵandu ŵalemwecesye wawo, nambo kaneko akupitikuka mitima jawo ni kwaŵenda wawo,

²⁷ ŵapikanile jemanjaji ni kwakululucila ulemwa wawo ni kwajiganya kutenda yindu yakulungama. Kaneko atumisye ula ku cilambo cecino ciŵacipelece kuti ciŵe ca ŵandu ŵawo.

²⁸ “Mwine mwakwe mcilambo timuciŵa mwana cilala, yilwele yakulekanganalekangana, konasika kwa mbeju ligongo lya mbepo kapena sombe, kapena kuti amagongo ŵawo ŵasyungulile jemanjaji, kapena yilwele sikati ja jemanjajo,

²⁹ tukwaŵenda kuti apikane kuŵenda kwawoko. Naga mundu jwalijose akulitendela canasa msyene ni kupopela kwa wawo AMBUJE, Mlungu,

³⁰ ampikane ni kumjanga mapopelo gakwe. Pakuŵapo wawojo ali Mlungu jwakusamanyilila nganisyo sya mu mtima mwa mundu jwalijose. Ajanje mapopelo ga mundu jwalijose pakukuya ndamo jakwe.

³¹ Myoyo ŵanduwo tiŵacimbicisyeje ni kwapikanila wawo ndaŵi syosope, pakutama mcilamboci ciŵapelece wawo kwa acinangolo ŵawo.

³² “Ŵandu ŵa yilambo yine pitacipikana ya ukulungwa wa wawo, ŵane mwa ŵanduwo taciyika kukupopela ni jemanjaji ku Nyumba jejino,

³³ Wawo ŵapikane mapopelo gawo kwinani kwali wawoko ni kwatendela yaŵendileyo kuti ŵandu ŵa cilambo capasi cino amanyilile ni kwapikanila wawo mpela mwakusatendela Aisalaeli nipo amanyilile kuti Nyumba jindaŵileji jili jakwalambililamo wawo.

³⁴ “Pandaŵi jakwawula ŵandu ŵenu kuputa ngondo ni amagongo ŵawo, naga akupopela aku alimkulola ku msinda awuno wele wawo ŵawusagwile, soni naga akulola ku Nyumba ajino jinataŵile wawo,

³⁵ ŵajanje mapopelo gawo kutyocela kwinani kwali wawoko nipo ŵapundisye jemanjaji.

³⁶ “Mundu jwalijose akusalemwa, pakuti pangali mundu jwangalemwa, naga wawo awatumbilila jemanjaji ni kwaleka kuti alepele kwa amagongo ŵawo nipo ajigalidwe mpela acikapolo kwawula nawo ku yilambo yine, ŵajanje mapopelo gawo.

³⁷ Pandaŵi jali acikapolo ku cilambo ca cilendoco, naga akukumanyilila kulemwa kwawo, kaneko ni kugalawuka mitima jawo ni kupopela kwa wawo mwakulinandiya pakwiticisya ulemwa wawo, ŵajanje mapopelo gawo.

³⁸ Ŵanduwo naga akugalawuka kusyesyene mtima mwawo ni kutanda kupopela ali alolite ku cilambo ciŵacipelece wawo kwa acinangolo ŵetu, ku msinda uŵawusagwile wawo, soni ku Nyumba ajino jinataŵile wawo AMBUJE,

³⁹ wawo kwinani kwali wawoko ajanje mapopelo gawo, ni kwatendela canasa pa kwakululucila ulemwa wawo wosope.

⁴⁰ “Wawo AMBUJE, atulole uwe ni kugapikana mapopelo getu m'nyumba ajino.

⁴¹ AMBUJE, Mlungu, ajinjile m'nyumba mwawo, mutuŵisile Libokosi lya Cilanga, cele cili cimanyisyo ca macili gawo, soni atameje m'nyumba muno mpaka kalakala. Ŵajaliwasye ŵakutaga mbopesi ŵawo, soni ŵakutumicila ŵawo asengweje ndaŵi syosope pa yambone ya wawo kuti aŵeje ŵakusangalala pa masengo gosope gakusatenda, ligongo lya umbone wa wawo AMBUJE.

⁴² AMBUJE akamtumbilila mwenye juŵamsagwile wawo. Akumbucile cinonyelo ciŵakwete pa jwakutumicila jwawo Daudi.”