2 Mbi 5 - Chiyawo Bible

¹ Solomoni piŵamasile masengo gakutaŵa Nyumba ja AMBUJE, jwalakwejo ŵaŵisile myipinda yakusunjilamo katundu yindu yosope yiŵapelece Daudi* babagwe kwa AMBUJE, ŵaŵisilemo soni silifa,* golidi* ni yindu yine.

Libokosi lya Cilanga akwika nalyo ku Nyumba ja AMBUJE

² Panyuma pakwe Mwenye Solomoni ŵasalile acimlongola wosope ŵa ngosyo ni ŵa maŵasa ga Aisalaeli kuti akasongane ku Yelusalemu ni cakulinga cakuti akajigale Libokosi lya Cilanga ca AMBUJE kutyoka nalyo ku Siyoni,* msinda wa Daudi ni kwawula nalyo ku Nyumba ja AMBUJE.

³ Ŵandu wosope ŵa ku Isalaeliko ŵasongene pa ndaŵi ja cindimba ca masakasa.*

⁴ Myoyo piŵasongene acimlongola wosope, Alefi ŵanyakwile Libokosi lya Cilanga lila,

⁵ nipo ŵajile kukuliŵika ku Nyumba ja AMBUJE. Ŵakutaga mbopesi pamo ni Alefi ŵayice nalyo libokosi lya cilanga* pamo ni tenti jakusimanilana ni yindu yosope ya ku Nyumba ja AMBUJE yiyaliji mu tentimo.

⁶ Mwenye Solomoni pamo ni Aisalaeli wosope ŵasongene pameso pa AMBUJE, nipo ŵajimi pasogolo pa Libokosi lya Cilangalyo nipo kaneko ŵapelece mbopesi syejinji sya ng'ombe ni ngondolo.

⁷ Kaneko ŵakutaga mbopesi ŵajinjile mkati mwa nyumbajo ali anyakwile Libokosi lya Cilanga, ni ŵayice nalyo ku Cipinda Ceswela Mnopeco ni ŵaliŵisile kusi kwa mapapiko ga akelubi,

⁸ ŵele mapapiko gawo gawunicilaga libokosilyo ni mbiko syakunyakulila libokosilyo.

⁹ Mbikosyo syaliji syelewu mnope mwakuti songa sya mbikosyo syawonecelaga naga mundu ali ajimi mwamandunji ni Cipinda Ceswela Mnopeco, nambo kusa kwa nyumbaji nganisiwonecelaga. Yeleyi yili kukoko mpaka lelo jino.

¹⁰ Mkati mwa libokosimo mwaliji mwangali cilicose akaŵe maganga gaŵili giŵaŵisilemo Mose* Kwitumbi lya Sinayi, kwele AMBUJE ŵatesile cilanga ni Aisalaeli ndaŵi jiŵakopwece kutyocela mcilambo ca Iguputo.

Lumbili lwa AMBUJE

¹¹ Ŵakutaga mbopesi wosope ŵaŵapali pa ndaŵi jelejo ŵaliswejesye acimsyene kuti aŵe ŵakundidwa pameso pa AMBUJE, pangaŵalanjila kuti ŵaliji ku likuga kuŵatyocelaga.

¹² Alefi wosope mpela Asafu, Hemani, Yedutuni ni ŵane ŵa m'maŵasa mwawo ŵajimbaga nyimbo ali awete yakuwala yeswela mbee. Ŵajimi ciŵandika ni malo gakupelecela mbopesi mbali ja kungopoko lyuŵa, ŵajigele micekece, ni yida yakwimbila ya ngonji, nipo ŵakutaga mbopesi ŵosope ŵaŵajimbaga nyimbo ŵakwanile 120.

¹³ Masengo ga ŵandu ŵakwimba malipenga ni ŵandu ŵakwimba nyimbo galiji gakuti ajimbeje yalumo pakwalumba ni kwatogolela AMBUJE, ŵajimbaga nyimbojo ni kulisyaga micekece, malipenga ni yida yine, pakwalumba AMBUJE ni maloŵe gakuti, “Twatogolele AMBUJE pakuti ali ŵambone, nipo cinonyelo cawo cili cangamala.” Mwacisisimucila liwunde lyagumbele m'nyumbamo,

¹⁴ nipo ŵakutaga mbopesi ŵalepelaga kuti akamule masengo gawo ligongo lumbili lwa AMBUJE lwagumbele m'nyumbamo.