2 Mbi 36 - Chiyawo Bible

Yehowahasi mwenye jwa ku Yuda

¹ Ŵandu ŵa mcilambo ca Yuda ŵamjigele Yehowahasi mwanace jwa Yosiya nipo ŵamjinjisye ucimwene ku Yelusalemu.

² Yowahasi ŵaliji ni yaka 23 piŵajinjilaga ucimwene ŵa ku Yuda, nipo ŵalamulile ku Yelusalemuko kwa miesi jitatu.

³ Mwenye Neko ŵa ku Iguputo ŵamkamwile ukapolo Mwenye Yehowahasi nipo ŵacilamwile cilambo ca Yuda kuti cikome msongo ŵakwanila makilogalamu 3,400 ga silifa,* ni makilogalamu 34 ga golidi.*

⁴ Myoyo Mwenye Neko ŵamŵilasile Eliyakimu mpwakwe jwa Yowahasi, kuti aŵe mwenye jwakulamulila ku Yuda ni ku Yelusalemu nipo ŵasindile lina lyakwe kuŵa Yehoiyakimu. Yohowahasi ŵajigalidwe kwawula ku Iguputo ni Mwenye Neko.

Mwenye Yehoiyakimu jwa ku Yuda

⁵ Yehoiyakimu ŵaliji ni yaka 25 piŵajinjilaga ucimwene ŵa ku Yuda, nipo ŵalamulile ku Yelusalemu yaka 11. Ŵelewo ŵalemwisye pameso pa AMBUJE,* Mlungu jwawo.

⁶ Mwenye Nebukadinesa ŵa ku Babiloniya ŵayice kumenyana ni ŵandu ŵa mcilambo ca Yuda, ŵamkamwile Yehoiyakimu nipo ŵamjigele jwalakwejo kwawula najo ku Babiloniya ali amtaŵile ni ma unyolo.

⁷ Nebukadinesa ŵajigele yida ya m'Nyumba ja AMBUJE nipo ŵajile kuyiŵika m'nyumba jakwe ja ucimwene ku Babiloni.

⁸ Masengo gosope giŵatesile Yehoiyakimu, ni yakusakala yiŵatesile, yilembedwe mu Buku ja Mbili ja Ayimwene ŵa ku Isalaeli ni ku Yuda. Nipo Yehoiyakini ŵajinjile ucimwene m'malo mwa babagwe.

Mwenye Yehoiyakini jwa ku Yuda

⁹ Yehoiyakini ŵaliji jwa yaka 18 pa ndaŵi jiŵajinjilaga ucimwene, nipo jwalamulile ku Yelusalemu kwa miesi jitatu ni masiku 10. Ŵelewo ŵatendaga yakusakala pameso pa AMBUJE.

¹⁰ Pakutanda kwa caka, Mwenye Nebukadinesa ŵajigele Yehoiyakini kwawula nawo ku ukapolo ku Babiloniya, ŵajigele soni yida yamtengo wapenani ya m'Nyumba ja AMBUJE. Kaneko Nebukadinesa ŵamjigele Sedekiya mjombagwe, nipo ŵatesile ŵelewo kuŵa mwenye jwa ku Yuda ni ku Yelusalemu.

Mwenye Sedekiya jwa ku Yuda

¹¹ Sedekiya ŵaliji ni yaka 21 piŵajinjilaga ucimwene, nipo ŵalamulile ku Yelusalemu yaka 11.

¹² Ŵelewo ŵatesile yakusakala pameso pa AMBUJE, Mlungu jwawo. Nganampikanila jwakulocesya* Yelemiya, juŵaŵecetaga maloŵe ga AMBUJE.

Konasika kwa msinda wa Yelusalemu

¹³ Sedekiya ŵamjimucile Mwenye Nebukadinesa juŵamkanganicisye Sedekiyajo kuti alumbile mu lina lya Mlungu kuti tacapikanila ŵalakwewo. Sedekiya ŵajumwisye mtima wakwe ni cakulinga cakuti akapitikuka mtima ni kuwujila kwa AMBUJE, Mlungu juŵamlambilaga Aisalaeli.

¹⁴ Ŵandu wosope ŵa ku Yuda, ni ŵakutaga mbopesi ŵaŵaliji acimlongola ŵawo ŵatesile yangalumbana pakukuya cisyasyo ca yakusakala ya mitundu jine ja ŵandu, soni ŵajisakesye Nyumba jele AMBUJE ŵajitesile kuti jiŵe jeswela mnope mu Yelusalemu.

¹⁵ Nambo AMBUJE, Mlungu jwa acinangolo ŵawo ŵatendelaga jemanjaji canasa, nipo Mlungu jwapitilisye kwatumicisya ŵakulocesya kuti ŵajamuce ŵanduwo pa yakulemwa yawo.

¹⁶ Ŵanduwo ŵasekaga ni kwanyosya ŵakulocesyawo, pakugacembulusya maloŵe ga Mlungu, yeleyi yatendesye AMBUJE kuti ŵatumbilile ŵandu ŵakwe nipo paliji pangali cikalekasisye AMBUJE kwajonanga ŵandu ŵa ku Yuda ni ku Yelusalemu.

¹⁷ Myoyo AMBUJE ŵamtumile mwenye jwa ku Babiloniya kuti ajawule kumenyana ni ŵandu ŵa ku Yelusalemu, nipo Nebukadinesa ŵawuleje acacanda ŵa ku Yuda ŵiŵaliji m'Nyumba ja AMBUJE ni upanga. Ŵelewo nganakola canasa ni mundu jwalijose, mwanace kapena jwamkulungwa, ŵalume kapena ŵakongwe, ŵakulwala kapena ŵamlama. Mlungu ŵapelece wosopeŵa myala mwa Nebukadinesawo.

¹⁸ Nebukadinesa ŵajigele yida yosope yiyaliji m'Nyumba ja AMBUJE, kupwatikapo yipanje ya mwenye ni ya nduna syakwe, nipo ŵajile nayo ku Babiloniya.

¹⁹ Kaneko asilikali ŵa Nebukadinesa ŵajocile Nyumba ja AMBUJE, ŵagwisisye soni lipupa lyele lyasyungulile msinda wa Yelusalemu, ŵajocile soni nyumba syosope sya ucimwene nipo ŵajonasile yida yosope yiyaliji ya mtengo wapenani.

²⁰ Ŵandu ŵaŵakulupwice ŵala ŵajigele kwawula nawo ku ukapolo ku Babiloniya, kuŵaŵele ŵakumtumicila mwenye ni yisukulu yakwe mpela acikapolo mpaka pa ndaŵi jiŵatamilicice ucimwene wa ku Pelesiya.

²¹ Ayi yaliji myiyi kuti yikwanile yele yiŵaŵecete AMBUJE kupitila mwa jwakulocesya Yelemiya kuti, “Cilamboci ticiciŵa masame kwa yaka 70, kuti masiku ga sabato gakupumula gele nganigatendekwa gakwanile.”

Sailasi ŵakundile Ayuda kuti awujile kumangwawo

²² Mcaka candanda ca ucimwene wa Sailasi mwenye jwa ku Pelesiya, AMBUJE ŵamtendekasisye jwalakwejo kuti ajenesye utenga ku yilambo yosope yiyaliji pasi pa ucimwene wakwe, soni kuti yeleyi yilembedwe ni cakulinga cakuti maloŵe giŵaŵecete AMBUJE kupitila mwa jwakulocesya Yelemiya gakwanilisidwe. Utengawo waliji wakuti,

²³ “Mwenye Sailasi jwa ku Pelesiya akuti, AMBUJE, Mlungu jwakwinani, ambele une ma ucimwene gosope ga pa cilambo capasi, soni asagwile une kuti nataŵile Nyumba ku Yelusalemu ni ku Yuda. Sambano, jemanja wosope mli ŵandu ŵa Mlungu, nipo AMBUJE, Mlungu aŵe ni mundu jwalijose jwele jwakusaka kuwujila ku Yuda.”