2 Mbi 35 - Chiyawo Bible

Yosiya ŵasangalalile cindimba ca Pasaka ku Yelusalemu

¹ Yosiya ŵatesile Pasaka* ku Yelusalemu pakwacimbicisya AMBUJE. Pa lyuŵa lya 14 lya mwesi wandanda ŵawuleje ŵanace ŵangondolo ŵa cindimba ca Pasaka.

² Ŵasagwile ŵakutaga mbopesi kuti akamuleje masengo gawo ni kwalimbisya mitima jemanjajo kuti akamuleje cenene masengogo.

³ Ŵasalile soni Alefi ŵiŵajiganyaga Aisalaeli, ŵele ŵiŵaliji ŵaswela mnope kwa AMBUJE* kuti, “Mŵice Libokosi lya Cilanga* m'nyumba jiŵataŵile Solomoni mwanace jwa Mwenye Daudi.* Mkasilinyakulaga soni pa makoyo genu, nambo mwatumicileje AMBUJE, Mlungu jwenu ni ŵandu ŵakwe Aisalaeli.

⁴ Mŵe m'makuga genu pakukuya maŵasa gimkutyocela, malinga ni ma udindo giŵampele Mwenye Daudi ni Solomoni mwanace jwawo.

⁵ Mŵe m'makuga genu, pakukuya maŵasa ga acalongo acimjenu ŵanganaŵa Alefi, nipo liŵasa lililyose lya Alefi liŵe mbali jakwe.

⁶ Mwulaje ŵanace ŵangondolo ŵa Pasaka, mliswejesye mwacimsyene nipo mwakamusye acalongo acimjenu kuti yikwanilile yiŵaŵecete AMBUJE kupitila mwa Mose.”*

⁷ Yosiya ŵapelece ngondolo 30,000, ŵanace ŵangondolo, ni mbusi sya ŵana, ni ng'ombe sya mikambako 3,000, kutyocela mwicinga mwakwe.

⁸ Nombe nasyo nduna sya mwenye syapelece mwa lisosa lyawo kwa ŵandu, ŵakutaga mbopesi ni Alefi kuti akamulisye masengo. Nipo Hilikiya, Sakaliya, ni Yehiyele ŵiŵaliji acakulungwakulungwa ŵa ku Nyumba ja AMBUJE ŵapele ŵakutaga mbopesi yindu ayi kuti atendele Pasaka: ŵanace ŵangondolo ni ŵa mbusi 2,600 ni ng'ombe sya mikambako 300 kuti yiŵe ya mbopesi ndaŵi ja cindimba.

⁹ Acimlongola ŵa Alefi ŵakuyicisyaŵa nombe nawo ŵapelece ŵanace ŵangondolo ni ŵa mbusi 5,000, ni ng'ombe sya mikambako 500 kwa Alefi kuti apelece mbopesi: Kenaniya, Shemaya, ni Netanele mlongo mjakwe, Hashabiya, Yeiyeli, ni Yosabadi.

¹⁰ Cindimba cosope ca Pasaka picaliji tayale, ŵakutaga mbopesi ni Alefi ŵajimi m'malo mwawo pakukuya ulamusi wa mwenye.

¹¹ Piŵamasile kuwulaga ŵanace ŵangondolo ni ŵa mbusi, Alefi ŵakusile mapende ga yinyamayo nipo ŵakutaga mbopesi ŵapocele miasi kutyocela kwa Alefi jele panyuma pakwe ŵajimisile pa malo pakupelecela mbopesi.

¹² Kaneko ŵaŵisile pambali mbopesi syakutinisya, kuti asipelece kwa ŵandu pakukuya makuga ga maŵasa ga ŵandu, ŵapeleka mbopesi syawo kwa AMBUJE mpela muyalembedwele mu buku ja Mose. Ŵatesile soni myoyo ni ng'ombe sya mikambako sila.

¹³ Alefi ŵajocile nyama ja mwanace jwangondolo jwa Pasaka jula pamoto, nipo ŵatokotesye nyama jila mu mipika, mu mapoto ni mu yiwaya, kaneko ŵajipelece mwacitema nyamajo kwa ŵandu wosope ŵele nganaŵa Alefi.

¹⁴ Panyuma pa yeleyi, Alefi ŵalinganyaga acimsyene nyama syawo sya Pasaka ni sya ŵakutaga mbopesi ŵanace ŵa Aloni,* pakuŵapo ŵakutaga mbopesi ŵapicisikwe ni kutinisya yinyama ni koca mawuta mpaka cilo.

¹⁵ Ŵandu ŵakwimba nyimbo ŵa liŵasa lya Asafu ŵaliji ali atemi m'malo mwawo pakukuya lilamusi lya Daudi, Asafu, Hemani ni Yedutuni jwakulocesya* jwa mwenye. Acilonda wosope ŵaliji pa yipata yosope, nipo jemanjajo nganaŵajilwa kutyoka pa masengo gawo, pakuŵapo Alefi ŵane ŵalinganyicisye Pasaka acalongo acimjawo.

¹⁶ Myoyo masengo gosope gakwatumicila AMBUJE gatendekwe pa lyele lyuŵalyo, ŵandu ŵatesile Pasaka ni kupeleka mbopesi syakutinisya pa malo gakupelecela mbopesi ga AMBUJE, pakukuya lilamusi lya Mwenye Yosiya.

¹⁷ Aisalaeli ŵaŵaliji pelepo ŵasangalalile cindimba ca Pasaka ni cindimba ca mkate wangali cakusasaŵilisya* kwa masiku msano ni gaŵili.

¹⁸ Citandilile ndaŵi ja jwakulocesya Samuele Pasaka nganajisangalalileje mpela jeleji. Sikati ja ayimwene ŵa ku Isalaeli nganasimanikweje ni jumo jose juŵatesilepo Pasaka mpela aji jiŵatesile Mwenye Yosiya pamo ni ŵakutaga mbopesi, Alefi, ŵandu ŵa ku Yuda, Aisalaeli wosope, ni alukosyo wosope ŵa ku Yelusalemu.

¹⁹ Pasakaji jatendekwe mcaka ca 18 ca ucimwene wa Yosiya.

Kumala kwa ucimwene wa Yosiya

²⁰ Panyuma pa yeleyi, Yosiya piŵalinganyisye Nyumba ja AMBUJE, Mwenye Neko jwa ku Iguputo ŵalongolele asilikali kuja kuputa ngondo ku Kakameshi ku Lusulo lwa Yufuleti. Yosiya ŵapite kuti akamenyane nawo,

²¹ nambo Neko ŵatumisye ŵa mitenga ŵakwe kwa Yosiya kukwasalila kuti: “Ngondo jinguputa uneji ngajikumŵandika m'mwejo, mwenye jwa ku Yuda. Une nganiyika akuno kuputa ngondo ni m'mwejo, nambo yice kukumenyana ni amagongo ŵangu, nipo Mlungu asalile une kuti njanguye. Mlungu ali ni une, myoyo mlece kulimbana ni une, kogopela kuti jwalakwe tacimjonanga m'mwejo.”

²² Nambo Yosiya ŵasacile mnope kuputa ngondojo. Jwalakwe ŵakanile kupikanila yele yiŵaŵecetaga Mlungu kupitila mwa Mwenye Neko, myoyo ŵawete yakuwala yakwe ya ku ngondo nipo ŵajile kuputa ngondo kwilambo lya Megido.

²³ Pandaŵi jiŵamenyanagajo msilikali jwa ku Iguputo ŵaponyisye mpamba nipo ŵamsomile Yosiya. Yosiya ŵalamwile ŵakutumicila ŵakwe kuti, “Mundyosye malo agano, pakuti mbulele mnope!”

²⁴ Ŵakutumicila ŵakwewo ŵamtyosisye Yosiya pa ligeleta lyakwe, nipo ŵamkwesisye mu ligeleta lyakwe, ni ŵajile nawo ku Yelusalemu kuŵawilile. Kweleko ŵasicile m'malembe ga acinangolo ŵakwe, nipo ŵandu wosope ŵa ku Yuda ni ku Yelusalemu ŵamlilile Yosiya.

²⁵ Jwakulocesya Yelemiya ŵalembile nyimbo ja malilo pakusaka kumcimbicisya Yosiya. Kutyocela ndaŵi jelejo, acalume ni acakongwe ŵa ku Yuda ŵakusalila ciwa ca Yosiya akusajimba nyimbo jelejo. Nyimboji jikusimanikwa mu buku ja nyimbo sya malilo.

²⁶ Masengo gosope gambone giŵatesile Yosiya, pakukuya yiyalembedwe m'buku ja Malamusi ga AMBUJE,

²⁷ ni masengo gakwe gandanda ni gakumalisya, gosopego galembedwe mu Buku ja Mbili ja Ayimwene ŵa ku Isalaeli ni ku Yuda.