2 Mbi 32 - Chiyawo Bible

Senakelibu ŵaputile ngondo ni ŵandu ŵa cilambo ca Yuda

¹ Panyuma pakwe pigamasile masengo gakwatumicila AMBUJE* mwakulupicika, Senakelibu mwenye jwa ku Asiliya ŵayice kuputa ngondo ni ŵandu ŵa ku cilambo ca Yuda, nipo ŵajisyungulile misinda jijaliji mkati mwa mapupajo aciganisyaga kuti tiŵakamulememo ŵandu wosope.

² Hesekiya piŵaweni kuti Senakelibu ayice kusumula msinda wa Yelusalemu,

³ jwalakwe pamo ni nduna syakwe ŵaganisisye yakuti akawugale nduluko sya mesi sisyaliji kusa kwa msindawo ni cakulinga cakuti Asiliya akagasimana mesi pitaciyika ciŵandika ni ku Yelusalemu.

⁴ Ndunasyo syalongolele ŵandu ŵajinji nipo ŵajile kukuwugala nduluko sya mesisyo, mwakuti pangali soni mesi gagakopwece mwelemo.

⁵ Kaneko Mwenye Hesekiya ŵalimbisye citetelo ca msindawo pakulinganya soni lipupa, ni sanja penani pa lipupalyo, ŵataŵile soni lipupa lya kusa. Kupwatika soni pelepo, ŵalinganyisye soni lipupa lya citetelo pa malo ga mbali ja kungopoko lyuŵa kwa Yelusalemu. Ŵapanganyisye soni mipamba ni yakucijila yejinji.

⁶ Ŵasagwile soni acimlongola ŵa ngondo kuti ŵalamulileje ŵandu, ni kwasonganya jemanjajo pa luŵala lwa cipata cakwinjilila mu msindamo, nipo ŵasalile kuti,

⁷ “Mŵe ŵamacili ni ŵakulimba mtima, mkasimwajogopa mwenye ŵa ku Asiliya ni likuga lyawo lya asilikali ŵali nawoŵa, pakuti uwe tuli ŵamacili kwapunda jemanjajo.

⁸ Ŵelewo akwete likuga lya ngondo lya ŵandu, nambo uwe tuli ni AMBUJE, Mlungu jwetu jwakutukamusya, soni ni jwakutuputila ngondo syetu.” Ŵandu ŵakulupilile maloŵe ga Hesekiya mwenye jwa ku Yuda.

⁹ Piyamasile yeleyi, pa ndaŵi jele Mwenye Senakelibu jwa ku Asiliya pamo ni asilikali ŵakwe ŵaŵasyungulile msinda wa Lakishi, ŵatumisye utenga wakuyicisyawu kwa Hesekiya ni kwa ŵandu ŵa ku Yuda ni ŵaŵaliji nawo ku Yelusalemu wakwasalila kuti:

¹⁰ “Une, Senakelibu, mwenye jwa ku Asiliya, ngumwusya kuti, ana cimkulimbisya mtima jemanja ni cici kuti mkanilileje kutama ku Yelusalemu kuno ni kusyungulilidwa ni asilikali?

¹¹ Hesekiya akumsalila jemanja kuti AMBUJE, Mlungu jwenu tacimkulupusya kutyocela myala mwa mwenye jwa ku Asiliya, nambotu Hesekiya akumlambusya jemanja nipo tacimleka jemanja kuti m'we ni sala ni njota.

¹² Jwalakweju ni juŵatyosisye malo gakulambila ni malo gakupelecela mbopesi, nipo kaneko ŵasalile ŵandu ŵa ku Yuda ni ku Yelusalemu kuti alambileje ni kutinisya ubani* pa malo gampepe basi.

¹³ Ana jemanja ngamkumanyilila yele une ni acinangolo ŵangu yitwatesile kwa ŵandu ŵa mitundu jine?* Ana milungu ja ŵandu ŵa mitundu jine jakulupwisye ŵandu ŵawo kutyocela myala mwa mwenye jwa ku Asiliya?

¹⁴ Ana sikati ja milungu jesope ja mitundu jine ja ŵanduwo jele baba ŵangu jiŵajijonasile, ana nduni juŵapakombwele kwakulupusya ŵandu ŵakwe m'magasa mwangu? Ana cikumtendesya ni cici kuti mganisyeje kuti mlungu jwenu akomboleka kumkulupusya jemanja?

¹⁵ Sambano mkasimumkunda Hesekiya kuti amlambusye jemanja kapena kumsokonesya mwamti myoyo. Mkasimwakulupilila ŵelewo! Pangali mlungu jwa mtundu uliwose wa ŵandu juŵapakombwele kwakulupusya ŵandu ŵakwe kutyocela myala mwa mwenye jwa ku Asiliya. Myoyo jwele mlungu jwenujo ngakomboleka kumkulupusya jemanja!”

¹⁶ Nduna sya mwenye jwa ku Asiliya syaŵecete yejinji yakusakala yakwamba AMBUJE, Mlungu pamo ni Hesekiya, jwakutumicila jwawo.

¹⁷ Kaneko Mwenye Senakelibu ŵalembile yikalata yakwanyosya AMBUJE, Mlungu jwa ŵandu ŵa ku Isalaeli, nipo ŵatite kuti, “Milungu ja ŵandu ŵa mitundu jine ŵa mu yilambo yine nganijipakombola kwakulupusya ŵandu kutyocela myala mwa asilikali ŵa ku Asiliya, myoyo mlungu jwa Hesekiya ngasapakombola kwakulupusya ŵandu ŵawo m'magasa mwangu.”

¹⁸ Ndunasyo syaŵecete yosope yeneyi mu ciŵeceto ca Cihebeli kwa ŵandu ŵa mu msinda wa Yelusalemu kuti jwalijose juŵapikanilaga kutyocela pepupa lya msindawo apikanicisye cenene ni kuti atende woga kuti jemanjajo asumule msindawo mwangasawusya.

¹⁹ Ŵaŵecetaga ya Mlungu jwa ku Yelusalemu mpela muŵaŵecetelaga ya milungu ja ŵandu ŵane pa cilambo capasi pano, jele jajili jakupanganyikwa ni magasa ga mundu.

²⁰ Mwenye Hesekiya pamo ni jwakulocesya* Yesaya mwanace jwa Amosi, ŵapopesile kwa Mlungu kuŵenda cikamucisyo.

²¹ Myoyo AMBUJE ŵalitumile lilayika, ni lyawuleje asilikali wosope ni nduna sya ku Asiliya. Senakelibu jwawujile kumangwakwe juli jwa soni. Lyuŵa line piŵaliji m'nyumba ja mlungu jwawo, ŵanace ŵakwe ŵacalume ŵamwuleje jwalakwejo ni mapanga.

²² AMBUJE ŵamkulupwisye Hesekiya mwalitala lyeleli pamo ni ŵandu wosope ŵaŵatamaga ku Yelusalemu kutyocela myala mwa Senakelibu, mwenye jwa ku Asiliya, ni kwa amagongo ŵawo wosope, nipo ŵacinjilicisye jemanjajo myala mwa amagongo ŵawo.

²³ Ŵandu ŵajinji ŵayice ku Yelusalemu ali ajigele yakupeleka kwa AMBUJE, ni mituka jine ja Hesekiya mwenye jwa ku Yuda. Kutyocela ndaŵi jelejo Hesekiya ŵapocelaga ucimbicimbi kutyocela kwa ŵandu wosope.

Kulwala kwa Hesekiya ni masengo gakwe

²⁴ Pandaŵi jelejo Hesekiya ŵalwasile, nipo ŵasigele panandi kuwa, myoyo ŵapopesile kwa AMBUJE, nipo AMBUJE ŵamjanjile jwalakwejo nipo ŵampele cimanyisyo cakuti talame.

²⁵ Hesekiya ŵatandite kulinonyela pa yele Mlungu yiŵamtendele jwalakwejo, nipo AMBUJE ŵatumbilile ŵandu ŵa ku Yuda ni ku Yelusalemu.

²⁶ Pambesi pakwe, Hesekiya pamo ni ŵandu ŵaŵatamaga ku Yelusalemu ŵalinondiye acimsyene, nipo AMBUJE nganiŵapa jemanjajo cilango mpaka pa ndaŵi jiŵawile Hesekiya.

Yipanje ya Hesekiya ni lumbili lwawo

²⁷ Mwenye Hesekiya ŵasicile mnope nipo jwalijose ŵamcimbicisyaga jwalakwejo. Ŵataŵile yipinda yakusunjilamo golidi,* silifa,* magaganga ga mtengo wapenani, yakununjilisya mboga, yakucijila ni yindu yine ya mtengo wapenani.

²⁸ Ŵalinganyisye soni ngokwe syakusunjila tiligu, finyo, ni mawuta ga olifi;* ŵapanganyisye soni macinga ga ng'ombe ni ga ngondolo.

²⁹ Pakuti AMBUJE ŵamsicilisye mnope jwalakwejo nipo ŵakwete ng'ombe, ngondolo ni mbusi syejinji, mwakuti jwalakwe ŵataŵile soni misinda jawo.

³⁰ Hesekiya ni ŵaŵawugele ngalande ja mesi jakutyocela ku Lusulo lwa Gihoni nipo ŵajisepwisye ngalandejo kuti jijawule mkati mwa msinda wa Yelusalemu. Yindu yosope yamjendelaga cenene Hesekiya,

³¹ nipo atamose piŵayice ŵa mitenga ŵakutyocela ku Babiloniya kuwusya ya yindu yiyatendekwe mcilambomo, Mlungu ŵamlesile Hesekiya jika kuti amlinje ni kumanyilila yosope ya mu mtima mwakwe.

Kumala kwa ucimwene wa Hesekiya

³² Masengo gosope giŵatesile Hesekiya piŵaliji mwenye, pamo ni yambone yiŵatendaga, yilembedwe mu ngani syakwamba yiŵayiweni m'mesomkulola jwakulocesya Yesaya, mwanace jwa Amosi ni mu Mbili ja Ayimwene ŵa ku Yuda ni ku Isalaeli.

³³ Hesekiya ŵawile nipo ŵamsicile mbali ja kumkuli m'malembe ga ŵanace ŵa Daudi.* Ŵandu wosope ŵa ku Yuda ni ku Yelusalemu ŵamcimbicisye mnope jwalakwejo. Manase ni juŵajinjile ucimwene m'malo mwa babagwe.