2 Mbi 31 - Chiyawo Bible

Hesekiya ŵajilekasisye milungu ja cilendo

¹ Picamasile cindimba, ŵandu wosope ŵa ku Isalaeli ŵajile ku misinda ja Yuda, nipo ŵakasile yipilala ya maganga, ŵagwisisye milungu ja cilendo ja Ashela, soni ŵajonasile malo gakupelecela mbopesi ni malo gakujilambilila milungu jawojo, ku cilambo cosope ca Yuda, ni ku madela ga Benjamini, Efelemu ni Manase; kaneko Aisalaeli wosope ŵawujile kumangwawo.

² Mwenye Hesekiya ŵaŵisile ŵakutaga mbopesi ni Alefi m'makuga, mwakulingana ni masengo gawo. Kaneko ŵasagwile ŵandu ŵane kuti apeleceje mbopesi syakutinisya ni mbopesi sya mkamulano, ŵane ŵaŵisile kuti atumicileje ku Nyumba ja AMBUJE, ni kuti ŵatogoleleje ni kwalumba AMBUJE.

³ Mwenye Hesekiya ŵapelece yilangwa yejinji kuti yiŵe mbopesi jakutinisya kundaŵi ni ligulo lililyose, pa masiku ga sabato, ni pa ndaŵi jiwukuwoneka mwesi, ni pa yindimba yine mpela mwayilembele m'Malamusi ga AMBUJE.

⁴ Nipo mwenye ŵalamwile ŵandu ŵa ku Yelusalemu kuti ayiceje nayo yakupeleka yawo kwa ŵakutaga mbopesi ni kwa Alefi, kuti jemanjajo akole ndaŵi jakwatumicila AMBUJE.

⁵ Ŵanduwo piŵapikene yiŵasakaga mwenye, ŵatandite kupeleka mituka jawo ja yisogosi yandanda kukomala ya m'migunda ya tiligu, finyo, mawuta ga olifi,* uci, ni yosope ya ku migunda, ŵapelece soni ca likumi ca yindu yosope yiŵakwete.

⁶ Ŵandu wosope ŵaŵatamaga ku misinda ja ku Yuda ŵayice kupeleka ca likumi ca ng'ombe ni ngondolo, nambo soni ŵayice ni mituka jiŵajipelece kwa AMBUJE, Mlungu jwawo.

⁷ Ŵandu ŵatandite kuwunjika mbuwa sya mituka kutandilila pa mwesi ŵatatu mpaka pa mwesi msano ni jaŵili.

⁸ Mwenye Hesekiya pamo ni nduna syakwe piŵayice ni kusiwona mbuwasyo, ŵalumbile AMBUJE pamo ni ŵandu ŵakwe Aisalaeli.

⁹ Hesekiya ŵawusisye ŵakutaga mbopesi ni Alefi ya mituka jila,

¹⁰ nipo Asaliya jwamkulungwa jwa ŵakutaga mbopesi* ŵa mwiŵasa lya Sadoki, ŵajanjile kuti, “Citandilile ŵanduŵa kwika ni yakupeleka yawo ku Nyumba ja AMBUJE, tuŵele ni yakulya yejinji nambo soni yakwanila. Tukwete yakulya yejinji ligongo lyakuti AMBUJE ŵapele upile ŵandu ŵawo.”

¹¹ Kaneko Mwenye Hesekiya ŵalamwile ŵandu kuti alinganye malo gakusunjilamo katundu m'Nyumba ja AMBUJE.

¹² Piŵamasile kulinganya yipindayo ŵayice ni mitukajo mwakulupicika, cakupeleka ca likumi, ni yindu yakupelecedwa kwa AMBUJE. Kapitawo jwawo jwamkulungwa ŵaliji Kenaniya jwa ci Lefi, nipo jwaŵili jwakwe ŵaliji Shimeyi mpwakwe jwa Konaniya.

¹³ Alefi ŵakuyicisyaŵa ŵakamulaga masengo mwakulamulidwa ni jemanjajo: Yehiyele, Asasiya, Nahati, Asahelo, Yelimoti, Yosabadi, Eliyele, Isimakiya, Mahati ni Benaya. Yosopeyi yatendekwe pasi pa ulamusi wa Mwenye Hesekiya ni Asaliya jwamkulungwa jwa ŵakutaga mbopesi.

¹⁴ Nipo Kole mwanace jwa Imina ŵa ci Lefi juŵalondelaga pa cipata cakungopoko lyuŵa kwa Nyumba ja AMBUJE, ni juŵaliji jwakupocela mituka jakupelecedwa kwa AMBUJE ni kujigaŵanya mituka kwa ŵandu.

¹⁵ Ŵapali soni Alefi ŵane msano ni jumo, ŵaŵakamucisyaga mwakulupicika ku misinda ja ku Yuda, pakupeleka yakulya kwa acalongo acimjawo mwakulingana ni masengo gawo. Alefi ŵeleŵa ŵaliji Edeni, Miniyamini, Yeswa, Shemaya, Amaliya ni Shekaniya.

¹⁶ M'lefi ni jwakutaga mbopesi julijose jwakupunda yaka 30 jwele ŵakamulaga masengo m'Nyumba ja AMBUJE, ŵapocele mbuwa ja yakupeleka yeleyi mwakulingana ni masengo gawo.

¹⁷ Ŵakutaga mbopesiŵa, ŵalembaga mena pakukuya maŵasa ga acinangolo ŵawo. Alefi ŵalembaga mena ŵandu kutandilila ŵa yaka 20 mpaka msogolo, pakukuya masengo gawo, ni makuga gawo.

¹⁸ Ŵakutaga mbopesi ŵalembedwe mena pamo ni aciŵamkwawo, ŵanace ŵacalume ni ŵacakongwe, ni wosope ŵa mwiŵasamo, pakuti jemanjajo ŵaŵajilwe kuliswejesya mwakulupicika.

¹⁹ Hesekiya ŵasagwile soni acalume ŵane kuti akapeleceleje yakulya ni yindu yine kwa ŵakutaga mbopesi ni Alefi ŵaŵatamaga ku malo gakulicisya yilangwa kusyungulila misinda ja ku Yuda ni ŵakutaga mbopesi ŵanace ŵa Aloni ni ŵa mwiŵasa lya Alefi ŵele mena gawo galembedwe.

²⁰ Hesekiya ŵatesile yeleyi ku cilambo cosope ca Yuda, mwakuti ŵatesile yakulungama ni yakwanonyelesya AMBUJE, Mlungu jwawo.

²¹ Masengo gosope mwakukuya malamusi, nipo ŵakwete upile.