2 Mbi 30 - Chiyawo Bible

Kuliŵicila cile pa cindimba ca Pasaka

¹ Hesekiya ŵatumisye utenga ku cilambo cosope ca Isalaeli ni ku Yuda, soni ŵalembile yikalata yakwawula kwa Efelemu ni kwa Manase yakwaŵilanga kuti ayice ku Nyumba ja AMBUJE* ku Yelusalemu, kukutenda cindimba ca Pasaka* ja AMBUJE, Mlungu juŵamlambilaga Aisalaeli.

² Mwenye Hesekiya pamo ni nduna syakwe ŵakamulene yakuti atendeje cindimba ca Pasaka pa mwesi waŵili.

³ Ayi yaliji myiyi ligongo lyakuti Pasakajo nganajitendaga mu ndaŵi jakwe pakuti ŵakutaga mbopesi ŵajinji ŵaliji mkanaliswejesye, soni ŵandu ŵaliji mkanasongane ku Yelusalemu.

⁴ Mwenye pamo ni ŵandu wosope ŵasengwile ligongo lya yiŵakamuleneyi.

⁵ Myoyo ŵanduwo ŵajenesye utenga ku cilambo cosope ca Isalaeli kutyocela ku Belesheba mpaka ku Dani wakwasalila ŵanduwo kuti akasongane ku Yelusalemu kukusangalalila cindimba ca Pasaka ja AMBUJE, Mlungu juŵamlambilaga Aisalaeli, pakuti ŵandu ŵajinji nganatendaga nawo cindimba ca Pasakajo mwakulingana ni lilamusi lya AMBUJE.

⁶ Ŵandu ŵa mitenga ŵala ŵajile ku cilambo ca Isalaeli ni Yuda ali ajigele yikalata yakutyocela kwa mwenye ni kwa nduna syakwe acitiji kuti: “Ŵandu ŵa ku Isalaeli, mkulupwice ku kusumulidwa kwa cilambo ni Asiliya. Sambano mwujile kwa AMBUJE, Mlungu juŵamlambilaga Abulahamu,* Isaki ni Yakobo* nipo jwalakwe tawujile kwa jemanja.

⁷ Mkasimŵa mpela acinangolo ŵenu ni acalongo acimjenu ŵanganakulupilila mwa AMBUJE, Mlungu jwawo. Myoyo ŵapele cilango jemanjajo mpela mumkuyiwonela ni meso genu.

⁸ Mkasimŵa ŵandu ŵakumusya mitima jenu mpela muŵatendelaga acinangolo ŵenu, nambo jemanja mwapikanileje AMBUJE. Myiceje ku Nyumba ja AMBUJE jajiswejesye mpaka kalakala, nipo mwatumicileje ŵelewo kuti lutumbilo lwawo lutyoce pa jemanja.

⁹ Naga jemanja mkuwujila kwa AMBUJE, ni kuti acalongo acimjenu ŵele ŵaŵakamwile kwawula ku ukapolo tacatendela jemanjajo canasa, nipo acalongo acimjenuwo taciwujila kumangwawo. AMBUJE, Mlungu jwenu ali jwambone mtima ni jwa canasa, ngasamleka jemanja naga mkuwujila soni kwa jwalakwe.”

¹⁰ Ŵandu ŵa mitenga ŵala ŵajile ku misinda jesope ja lukosyo lwa Efelemu ni Manase mpaka kuja kwika ku Sebuloni. Nambo ŵandu ŵasekaga ni kwanyosya jemanjajo.

¹¹ Ŵapali ŵandu ŵane ŵa lukosyo lwa Asha, Manase ni Sebuloni ŵaŵasacile mnope kuwujila ku Yelusalemu.

¹² Mlungu ŵakamucisye ŵandu ŵa ku Yuda, nipo wosopewo ŵaliji ŵa mtima umpepe wakutenda yele yiŵalamulaga mwenye ni nduna syakwe, mpela muŵaŵecetele AMBUJE.

Akusangalalila cindimba ca Pasaka

¹³ Ŵandu ŵajinji ŵayice ku Yelusalemu pa mwesi waŵili kusangalalila cindimba ca mkate wangali cakusasaŵilisya.*

¹⁴ Ŵatandite masengo, nipo ŵatyosisye malo gakupelecela mbopesi ni gakutinicisya ubani* ku Yelusalemu nipo ŵajile kuyijasa ku Ciŵata ca Kidiloni.

¹⁵ Nipo pa lyuŵa lya 14 lya mwesi waŵili, ŵawuleje ŵanace ŵangondolo kuti atendele cindimba ca Pasaka. Ŵakutaga mbopesi ni Alefi ŵele nganaliswejesya ŵatesile nawo, myoyo ŵaliswejesye, nipo ŵayice ni mbopesi syakutinisya ku Nyumba ja AMBUJE.

¹⁶ Jemanjaji ŵatemi m'malo mwawo m'Nyumba ja AMBUJEJO pakukuya Malamusi ga Mose mundu jwa Mlungu. Alefi ŵapelece miasi ja mbopesi jila kwa ŵakutaga mbopesi, ŵiŵajimisile miasi jila pa malo gakupelecela mbopesigo.

¹⁷ Mu msonganomo mwapali ŵandu ŵajinji ŵele nganaliswejesya, myoyo Alefi ŵawuleje ngondolo sya Pasaka m'malo mwa ŵandu wosope ŵaŵaliji mkanaliswejesye, ni cakulinga cakuti ajiswejesye mbopesijo pameso pa AMBUJE.

¹⁸ Atamose kuti ŵandu ŵajinji ŵiŵayice kutyocela ku lukosyo lwa Efelemu, Manase, Isakala ni Sebuloni nganaliswejesya acimsyene, nambope ŵalile nawo Pasakajo mwangaganicisya lilamusi lya AMBUJE. Myoyo Mwenye Hesekiya ŵapopelele jemanjajo lipopelo ali:

¹⁹ “AMBUJE, Mlungu juŵalambilanga acinangolo ŵetu, ŵawo ali Mlungu jwambone, ŵakululucile ŵandu ŵele ŵakwalambila wawo ni mitima jawo jesope, atamose kuti jemanjajo nganaswejesedwa pakukuya msyungu wakuliswejecesya.”

²⁰ AMBUJE ŵajanjile lipopelo lya Hesekiya nipo ŵakululucile ŵanduwo.

²¹ Ŵandu ŵa ku Isalaeli ŵaŵasongene ku Yelusalemu kula, ŵatesile cindimba ca mkate wangali cakusasaŵilisya kwa masiku msano ni gaŵili mwakusangalala, nipo lyuŵa ni lyuŵa Alefi pamo ni ŵakutaga mbopesi ŵalumbaga AMBUJE mwamacili gawo gosope.

²² Hesekiya ŵatogolele Alefi wosope ligongo lyakuti jemanjajo ŵakamwile cenene masengo gosope gene gakwatumicila AMBUJE. Pigamasile masiku msano ni gaŵili gele ŵandu giŵapelekaga mbopesi pakwalumba AMBUJE, Mlungu jwele juŵalambilaga acinangolo ŵawo,

Cisangalalo caŵili

²³ ŵanduwo ŵasangalele mnope nipo ŵaganisisye soni yakuti asangalale kwa masiku gane msano ni gaŵili. Myoyo ŵasangalele mwa lukondwa.

²⁴ Mwenye Hesekiya ŵapelece kwa ŵandu ŵaŵasongenewo ng'ombe sya mikambako syakwana 1,000 ni ngondolo sya mikambako 7,000 syakuti awulaje ni kulya. Nombe nasyo nduna sya mwenye syapelece ng'ombe sya mikambako syakwana 1,000 ni ngondolo sya mikambako 10,000. Pa ndaŵiji ŵakutaga mbopesi ŵajinji ŵatesile msyungu wa kuliswejesya.

²⁵ Myoyo ŵandu wosope ŵa ku Yuda, ŵakutaga mbopesi, Alefi ni ŵandu ŵaŵatyocele ku Isalaeli ni acalendo ŵaŵatamaga mcilambo ca Isalaeli ni Yuda ŵaliji ŵakusangala.

²⁶ Ŵandu ŵa mu msinda wa Yelusalemu ŵaliji ŵa lukondwa, ligongo yindu mpela yeleyi yaliji mkaniyitendekweje kutandilila mu ndaŵi ja Mwenye Solomoni, mwanace jwa Daudi.*

²⁷ Ŵakutaga mbopesi ni Alefi ŵajimi nipo ŵapopesile kwajaliwasya ŵanduwo. Mlungu ŵagapikene mapopelogo nipo ŵajanjile jemanjajo.