2 Mbi 3 - Chiyawo Bible

¹ Mwenye Daudi,* babagwe Solomoni ŵaliji ali akolosisye kala malo gakutaŵa Nyumba ja AMBUJE ku Yelusalemu, Petumbi lya Moliya, pele AMBUJE ŵawonecele kwa Daudi, pa malo gakupwagulila tiligu ga Olinani m'Yebusi.

² Mwenye Solomoni ŵatandite masengo gakutaŵa nyumbajo pa mwesi waŵili mcaka ca mcece pa ndaŵi jiŵaliji mwenye.

³ Mcilewu mwa Nyumba ja AMBUJEJO mwaliji mamita 27, nipo mcijipi mwakwe mwaliji mamita 9.

⁴ Ulewu wa lipenu lya ku meso kwa nyumbajo waliji mamita 9 kulandana ni mcijipi, nipo msingu wa lipupa lya pepenupo lyalewipe ni mamita 54. Mkati mwa nyumbajo ŵamusalalisye ni golidi.*

⁵ Mkati mwa cipinda cekulungwa ca nyumbaji ŵacinjilemo ni matabwa ga mkungusa, soni ŵasalalisye mcipindamo ni golidi, nipo m'mapupamo ŵajambwilemo yitela ya kanjesa ni ceni celuceluce.

⁶ Nyumbaji ŵajisalalisye pakukamulisya masengo maganga gakusalala ga mtengo wapenani, ni golidi jwakutyocela ku cilambo ca Pelafaimu.

⁷ Pakusaka kusalalisya mapupa ga mkati mwa nyumbajo, matanga, mafelemu, ni migomba jakwe, ŵamasengo ŵa Solomoni ŵagobile cilandanyo ca akelubi.

⁸ Cipinda ca mkati mwa nyumbajo cakolanjidwaga kuti, Cipinda Ceswela Mnope, nipo ulewu wakwe waliji mamita 9, soni mcijipi mwakwe mwaliji mamita 9. Mkati mwa mapupa ga mcipinda caciswela mnopeco, ŵasalalisyemo ni golidi jwa matani gakupunda 20,

⁹ ni golidi jwakusitopa 570 galamu juŵakamulisye masengo gakupanganyicisya misomali, ni kusalalicisya mapupa ga yipinda ya mwinani.

¹⁰ Mwenye Solomoni ŵalamwile ŵamasengo ŵakwe kuti apanganye akelubi ŵaŵili ŵa golidi ni kwaŵika ku cipinda caciswela mnopeko,

¹¹ kuŵajimice mwakulolegana. Mapapiko ga akelubiwo naga ali agatambasukwile gakwanaga mamita msano ni mcece. Lipapiko limo lya mkelubi jumo lyalewupaga mamita gakupunda gaŵili nipo lyakwayaga lipupa lya nyumbajo. Nombe nalyo lipapiko line lya mkelubi jwinejo lyalewupaga mamita gakupunda gaŵili nipo lyakwayanaga ni lipapiko lya mkelubi mjakwejo.

¹² Lipapiko limo lya mkelubiju lyakulewupa mamita gaŵili lyakwayaga lipupa lya nyumba, nipo lipapiko lyakwe line lyakulewuka mamita gaŵili, lyalumbikene ni lya mkelubi jwandanda jula.

¹³ Mapapiko ga akelubi ŵaŵiliŵa gakwanaga mamita msano ni mcece naga ali agatambaswile pamo, nipo ŵajimi mwakulola ku cipata cakwinjilila m'nyumbajo.

¹⁴ Solomoni ŵasalile ŵandu kuti ajigele nguwo jecejewu, jine ja papo, ni jine ja bafuta, ni apanganyisye likatani lyakucinjila ku Cipinda Ceswela Mnope nipo ŵapetile panguwopo yitusitusi ya akelubi.

Njalamila siŵili sya bulonsi

¹⁵ Solomoni ŵapanganyisye njalamila siŵili sya bulonsi, ulewu wa njalamila jilijose waliji mamita 15 ni hafu nipo njalamilasi ŵasiŵisile ku meso kwa nyumbaji. Penani pa lucalamila lulilose paliji pa mamita gaŵili.

¹⁶ Penani pa njalamilasyo ŵasalalisyepo pakuŵikapo ceni celuceluce cakulandana ni ca m'Nyumba ja AMBUJE cila. Ŵapanganyisye soni yindu yine yakuwoneka mpela yisogosi ya aposi nipo ŵayiŵisile pa ma cenipo.

¹⁷ Ŵaŵisile njalamilasyo mu mbali mwa mlango wakwinjilila m'Nyumba ja AMBUJE, nipo lucalamila lumo lwaliji kumbali ja kum'mwela nipo ŵalukolasile kuti Yakini, soni lwine lwaliji mbali ja kumpoto nipo ŵalukolasile kuti Bowasi.