2 Mbi 28 - Chiyawo Bible

Mwenye Ahasi jwa ku Yuda

¹ Ahasi ŵajinjile ucimwene pa ndaŵi jiŵaliji ni yaka 22, nipo ŵalamulile ku Yelusalemu yaka 16. Jwalakwe nganatenda yakulungama pameso pa AMBUJE* mpela muŵatendele Daudi* babagwe.

² M'malo mwakwe ŵakuyisye matala gakusakala ga ayimwene ŵa ku Isalaeli, ŵapanganyisye yilandanyo ya milungu ja Baala.*

³ Ŵatutumisye soni ubani* ku Ciŵata ca Benihinomu, ni kwapeleka ŵanace ŵakwe kuŵa mbopesi jakutinisya, pakujisyasya misyungu jakusakala ja ŵandu ŵa mitundu jine* jiŵajitopwele AMBUJE mcilambomo pa ndaŵi jiŵayikaga Aisalaeli.

⁴ Ahasi ŵapelekaga mbopesi, ni kutinisya ubani pa malo gakulambila milungu jine ja cilendo ku matumbi ni pasi pa yitela.

Kumenyana sikati ja Asiliya ni Aisalaeli

⁵ Pakuŵapo Mwenye Ahasi ŵalemwisye, AMBUJE, Mlungu jwakwe ŵapele ŵalakwewo cilango pakwakunda asilikali ŵa mwenye jwa ku Siliya kuti ŵapunde ŵalakwewo ni kwajigala ukapolo ŵandu ŵajinji kwawula nawo ku Damasiko.

⁶ Kaneko Mlungu ŵamkundile Mwenye Peka jwa ku Isalaeli kuti ampunde Ahasi nipo ŵawuleje asilikali ŵakulimba mitima ŵa ku Yuda ŵakwana 120,000 pa lyuŵa limpepe, ligongo lyakuti jemanjajo ŵalesile kwapikanila AMBUJE, Mlungu juŵamlambilaga acinangolo ŵawo.

⁷ Sikili, msilikali jwa ku Isalaeli ŵamwuleje Maaseya mwanace jwa Mwenye Ahasi, Asikilamu nduna ja ku nyumba ja mwenye, ni Elikana jwaŵili kwa mwenye.

⁸ Asilikali ŵa ku Isalaeli ŵakamwile ŵandu ŵa ku Yuda ŵakwana 200,000 ŵaŵaliji acalongo acimjawo kupwatikapo acakongwe, ŵanace ŵacalume ni ŵacakongwe, nipo ŵajile nawo ku ukapolo. Ŵajigele soni yindu yejinji nipo ŵajile nawo ku Samaliya.

Jwakulocesya Odedi

⁹ Ku Samaliya kwapali jwakulocesya* jwa AMBUJE lina lyakwe Odedi. Jwalakwejo ŵayice ku kuwonegana ni asilikali ŵa ku Isalaeli ŵaŵaliji ku Samaliyako. Ŵasalile jemanjajo kuti, “AMBUJE, Mlungu jwakusamlambila acinangolo ŵenu ampundisye jemanja ligongo lyakuti Mlungu ŵatumbilile ŵandu ŵa ku Yuda nipo amkundile jemanja kuti mwapunde jemanjajo. Nambo jwalakwe apikene mwele mumwawulajile jemanjaji.

¹⁰ Nambo sambano mkusaka kwatenda ŵandu ŵa ku Yuda ni Yelusalemu kuti aŵe acikapolo ŵenu. Ana ngamkumanyilila kuti nomwe ŵakwe mwalemwecesye AMBUJE, Mlungu jwenu?

¹¹ Sambano mumbikanile une! Acikapoloŵa ali acalongo acimjenu. Mwakundeni ajawuleje kumangwawo pakuti AMBUJE atumbile nayo yimtesileyi.”

¹² Pa ndaŵi jeleji Asaliya mwanace jwa Yehohanani, Belekiya mwanace jwa Meshilemoti, Yehisikiya mwanace jwa Shalumu ni Amasa mwanace jwa Hadilayi ŵaŵaliji acimlongola ŵa ku Isalaeli, ŵakamulene nayo yiŵaŵecete Odedi kuti asilikali ŵa ku Isalaeli ŵalemwisye.

¹³ Jemanjaji ŵatite kuti, “Mkuyika nawo acikapolowo akuno, pakuti jemanja mkusaka kuti uwe tupitilisye kwalemwecesya AMBUJE, konjecesya pa ulemwa* wetu wutukwete kala. Lutumbilo lwa AMBUJE luli pa ŵandu wosope ŵa ku Isalaeli.”

¹⁴ Kaneko asilikali ŵala ŵalesile acikapolo ŵala pamo ni katundu juŵajigele jula pameso pa acimlongola ni pa ŵandu wosope.

¹⁵ Nipo acimlongola mcece ŵele mena gawo tugakolasile kala, ŵayice kukwajigala acikapolowo ŵele ŵaŵaliji makonope. Ŵapele yakuwala, sapato, yakulya, mesi ni mtela ŵakutaga m'maŵanga mwawo. Acikapolo ŵaŵaliji ŵangali maciliwo ŵanyakwile pa mbunda, nipo acikapolo wosope ŵajile kukwaŵika ku dela ja Yeliko, msinda wa migwalangwa. Kaneko Aisalaeli ŵawujile kumangwawo ku Samaliya.

Ahasi ŵaŵendile cikamucisyo ku Asiliya

^16-17 Asilikali ŵa ku Edomu ŵaputile ngondo ni asilikali ŵa ku Yuda nipo asilikali ŵa ku Edomu ŵapundile asilikali ŵa ku Yuda pakumenyanako, nipo ŵakamwile ukapolo ŵandu ŵajinji. Pandaŵi jeleji Mwenye Ahasi ŵatumisye maloŵe kwa mwenye jwa ku Asiliya gakuŵenda kuti atumisye cikamucisyo.

¹⁸ Afilisiti ŵaliji mkuputa ngondo ni kusumula misinda ja ku kwiŵanda ca kungapilo lyuŵa ni kum'mwela mcilambo ca ku Yuda. Ŵasumwile soni misinda ja Beti Shemeshi, Aiyaloni, Gedeloti, ni msinda wa Soko, Timuna ni Gimiso, mwakuti Afilisitiwo ŵatamilicice kweleko.

¹⁹ AMBUJE ŵacipele yipwetesi cilambo ca Yuda ligongo lyakuti Mwenye Ahasi nganiŵapikanila AMBUJE nipo soni nganasaka kwalekasya ŵandu ŵa ku Yuda kuti alece kwalemwecesya AMBUJE.

²⁰ Myoyo Mwenye Tigilati Pilesa, jwa ku Asiliya ŵayice kukumenyana nawo Ahasi m'malo mwakwalimbikasya jemanjajo.

²¹ Ahasi ŵajigele katundu ku Nyumba ja AMBUJE, ku nyumba ja mwenye, ni ku nyumba sya nduna, ni ŵampelece katundujo kwa mwenye jwa ku Asiliya kuti aŵe mtuka. Atamose kuti Ahasi ŵatesile yeleyi, mwenye jwa ku Asiliyajo ŵakanile kwakamusya Ahasiwo.

Sambi sya Ahasi

²² Mu ndaŵi ja yisawusyo yakwe, Ahasi ŵapitilisye kwalemwecesya AMBUJE.

²³ Ŵapelekaga mbopesi kwa milungu ja ŵandu ŵa ku Siliya, jele jijalepelesye ŵalakwewo. Ŵatite kuti, “Milungu ja ku Asiliya jakamwisye jemanjajo, myoyo none jwakwe timbelece mbopesi kwa milungujo kuti jingamusye.” Awu waliji ulemwa wuwamjonasile Ahasi pamo ni ŵandu ŵa ku Yuda.

²⁴ Ahasi ŵasongenye yida yosope ya ku kicini ya ku Nyumba ja AMBUJE nipo ŵayipwanyile. Kaneko ŵawugele matanga ga Nyumba ja AMBUJE, ni ŵapanganyisye malo gakupelecela mbopesi ku Yelusalemu kwesope.

²⁵ Mu msinda uliwose wa ku Yuda, ŵataŵilemo malo gakulambila milungu ja cilendo, kwele kuŵatutumisyaga ubani kwa milungujo. Yeleyi yasakalisye mnope AMBUJE, Mlungu juŵamlambilaga acinangolo ŵawo.

²⁶ Masengo gosope giŵatesile pa ndaŵi jiŵaliji mwenye, kutandilila pandanda mpaka pambesi galembedwe mu mabuku ga Mbili ja ayimwene ŵa ku Yuda ni ku Yelusalemu.

²⁷ Mwenye Ahasi ŵawile nipo ŵasicile ku Yelusalemu, nambo ngaŵaga ku malembe ga ayimwene. Nipo Hesekiya mwanace jwawo ni juŵajinjile ucimwene m'malo mwa babagwe.