2 Mbi 26 - Chiyawo Bible

Mwenye Usiya jwa ku Yuda

¹ Piŵawile Mwenye Amasiya, ŵandu ŵa ku Yuda ŵamjinjisye ucimwene Usiya juŵaliji mwanace jwawo, atamose kuti jwalakwejo jwaliji jwa yaka 16.

² (Jwalakweju ŵataŵile msinda wa Elati ni kuwuwucisya ku Yuda mwenye ali ajasice).

³ Piŵajinjilaga ucimwene Usiya ŵakwete yaka 16 nipo ŵalamulile ku Yelusalemu yaka 52. Mamagwe ŵaliji Yekoliya ŵa ku Yelusalemu.

⁴ Jwalakweju ŵatesile yakulungama pameso pa AMBUJE* mpela muŵatendelaga Amasiya babagwe.

⁵ Sakaliya piŵaliji pungu jwa Amasiya, ŵamjigenye jwalakwejo kuti ampikanileje Mlungu. Myoyo Sakaliya piŵaliji cijumi, Usiya ŵatumicilaga AMBUJE mwakulupicika, nipo AMBUJE ŵajaliwasisye ŵelewo.

⁶ Usiya piŵaliji mwenye asilikali ŵakwe ŵajile kumenyana ni asilikali ŵa Afilisiti. Usiya ŵagwisisye mapupa ga misinda ja Gati, Yabine ni Ashidodi, kaneko ŵataŵile soni misinda ja ku Ashidodi ni mbali sine mcilambo ca Afilisiti.

⁷ Mlungu ŵamkamucisye Usiya kuti ŵapunde Afilisitiwo, ni Aluya ŵele ŵatamaga ku Gulibaala, ni Ameuni.

⁸ Aamoni ŵakomaga msongo kwa Mwenye Usiya, nipo mbili jakwe japikanice mpaka ku malile kwa cilambo ca Iguputo.

⁹ Usiya ŵataŵile sanja ku Yelusalemu pa Cipata ca Pandumba, ciŵandika ni cipata ca ku ciŵata, pele pilyakotele lipupa kwinjilila mkati.

¹⁰ Ŵataŵile soni sanja mu cipululu, soni ŵasokwele yisima yejinji pakuti ŵakwete yilangwa yejinji mungulugulu mwa matumbi ni ku yiŵata. Ŵalakwewo ŵanonyelaga kulima myoyo ŵalembile ŵamasengo kuti asamalileje migunda ja mipeleya jijaliji ku matumbi ga cajila mnope.

¹¹ Asilikali ŵa Usiya ŵaliji ŵacile kuputa ngondo. Yeiyeli ni Maaseya ŵaliji acimlembela ŵaŵalembaga ya ciŵalanjilo ca asilikaliwo mwakulamulilidwa ni Hananiya jumo mwa nduna sya mwenye.

¹² Ciŵalanjilo cosope ca acimlongola ŵamacili ni ŵakulimba mitima caliji 2,600.

¹³ Acimlongola ŵeleŵa ŵalamulilaga likuga lya asilikali ŵakwana 307,500 ŵele ŵaliji ŵakumanyilila kuputa ngondo mwamacili ni kwakamusya mwenye pakulimbana ni amagongo ŵakwe.

¹⁴ Usiya ŵapele asilikaliwo yakucijila, mipamba, yipewa yakuwala kungondo, yakuwala ya ku ngondo ya cisyano, mawukunje ni maganga ga legeni.

¹⁵ Ku Yelusalemu ŵandu ŵa umanyilisi ŵapanganyisye macini gele ŵagaŵikaga penani pa sanja ni pa ndumba syosope kuti ŵandu aponyeje mipamba pakamulisya masengo maganga gekulungwa, kutyocela pa yipilalayo ni pa ndumba sya lipupalyo. Kupikanika kwawo kwajenele cilambo cosope soni ŵaŵele ŵamacili ligongo lya cikamucisyo ciŵapocele kwa Mlungu.

Usiya akupegwa cilango ligongo lya kulinonyela

¹⁶ Usiya ŵatandite kulinonyela ligongo lya macili giŵakwete, yeleyi yatendesye kuti alepele. Ŵalakwewo ŵaliji ŵangakulupicika kwa AMBUJE, Mlungu jwawo, lyuŵa line ŵajinjile m'Nyumba ja AMBUJE kukutinisya ubani* pa malo gakutinicisya ubani.

¹⁷ Jwakutaga mbopesi Asaliya pamo ni ŵakutaga mbopesi ŵane ŵakulimba mtima ŵakwana 80 ŵajinjile panyuma pa Usiyawo.

¹⁸ Ŵakutaga mbopesiwo ŵamlekasisye Mwenye Usiya nipo ŵamsalile kuti, “Pepani mwenye, wawo ngakuŵajilwa kututumisya ubani kwa AMBUJE. Nambo ŵakutaga mbopesi ŵaŵaliji ŵanace ŵa Aloni, ni ŵaŵasagulidwe kuti atutumisyeje ubani. Atyoce pa Cipinda Ceswela Mnopeci. Wawo ŵalemwecesye AMBUJE nipo ngasiŵajaliwasya wawo.”

¹⁹ Pandaŵi jeleji Usiya ŵaliji ali ajimi pambali pa malo gakutinicisya ubani, nipo ŵajigele cakututumicisya ubani myala mwawo. Piŵatumbilile ŵakutaga mbopesiwo, ndaŵi jijojo ulwele wa matana wakopwece pa usyo pakwe ŵakutaga mbopesi ŵala ali mkulola m'Nyumba ja AMBUJE.

²⁰ Myoyo Asaliya pamo ni ŵakutaga mbopesi ŵane ŵalolite pa usyo pa jwalakwejo mwakusimonga nipo kaneko ŵamkopwesye Usiya kusa nipo ŵakopwece kusa mwakwanguya ligongo lyakuti AMBUJE ŵampele jwalakwejo cilango.

²¹ Mwenye Usiya ŵaliji ciŵela ŵa matana mpaka pa lyuŵa lya kuwa kwawo. Pakuŵapo kuti ŵaliji ŵa matana ŵalakwewo ŵatamaga m'nyumba ja jika, ligongo lyakuti ŵaliji ali ŵatyosisye ku Nyumba ja AMBUJE. Nipo Yotamu mwanace jwawo ni juŵalolelaga ya ku nyumba ja mwenye, nambo soni ŵalamulilaga ŵandu ŵa mcilambomo.

²² Masengo gosope giŵatesile Usiya kutandilila pandanda mpaka pambesi, galembedwe ni jwakulocesya* Yesaya mwanace jwa Amosi.

²³ Usiya ŵawile nipo ŵasicile mwilembe, nambo ligongo lya ulwele wawo wa matana nganiŵasika welewo m'malembe ga ayimwene. Nipo Yotamu mwanagwawo Usiya, ni juŵajinjile ucimwene m'malo mwa babagwe.