2 Mbi 25 - Chiyawo Bible

Mwenye Amasiya jwa ku Yuda

¹ Amasiya ŵajinjile ucimwene pa ndaŵi jiŵaliji ni yaka 25, nipo ŵalamulile ku Yelusalemu yaka 29. Mamagwe ŵaliji Yehowadini ŵa ku Yelusalemu.

² Amasiya ŵatesile yakulungama pameso pa AMBUJE* nambo ngaŵa ni mtima wakuwona.

³ Myoyo jwalakwe piŵajinjile ucimwene, ŵasiwuleje nduna syakwe syele sisyawuleje babagwe.

⁴ Nambo ŵanace ŵa ndunasyo nganiŵawulaga pakukuya malemba galembedwe m'buku ja malamusi ga Mose* gakuti: “Acinangolo akasawulajidwa ligongo lya ulemwa* wa ŵanace ŵawo, soni ŵanace akasawulajidwa ligongo lya ulemwa wuŵatesile acinangolo ŵawo, nambo mundu jwalijose awulajidwe ligongo lya ulemwa wuŵawutesile msyene.”

Asilikali ŵa Amasiya ŵamenyene ni asilikali ŵa ku Edomu

⁵ Mwenye Amasiya ŵasongenye pamo acalume wosope ŵa lukosyo lwa Yuda ni Benjamini nipo ŵaŵisile m'makuga ga ŵandu ŵakwana 10 mwakulingana ni ngosyo syawo, nipo ŵapele soni acimlongola ŵa ŵandu ŵa makuga 100 ni 1,000. Ŵasongenye acalume wosope kupwatikapo soni acacanda ŵaŵaliji ŵa yaka 20 nipo wosope ŵene ŵakwanile 300,000. Jemanjaji ŵaliji acalume ŵakumanyilila kuputa ngondo pakamulisya masengo mapanga ni yakucijila.

⁶ Ŵalembile soni masengo asilikali ŵa ngondo ŵamacili ŵa ku Isalaeli, ciŵalanjilo cawo cakwanile 100,000 pa mtengo wa makilogalamu 3,400 ga silifa.*

⁷ Nambo jwakulocesya* jwine ŵajile kwa mwenye kukwasalila kuti, “Wawo ambuje akasajawula yalumo ni asilikali ŵa ku Isalaeli ŵa. AMBUJE nganaŵa ni jemanjaji ŵanace ŵa Efelemuŵa.

⁸ Akasaganisya kuti naga akulongana ni asilikaliŵa wawo taŵe ŵakulimbangana, nambo Mlungupe ni jwakwete macili gakumpundisya kapena kumlepelesya mundu.”

⁹ Amasiya ŵamwusisye jwakulocesyajo kuti, “Nambi tiyiŵe uli kumbali ja silifa junalipile kala jemanjajo?” Jwakulocesyajo ŵajanjile kuti, “AMBUJE komboleka kumpa m'mwejo yejinji kupunda yeleyo!”

¹⁰ Myoyo Amasiya ŵatyosisye asilikaliwo nipo ŵasalile kuti ajawuleje kumangwawo. Asilikaliwo ŵatumbilile ŵandu ŵa ku Yuda.

¹¹ Amasiya ŵalimbile mtima nipo ŵalongolele asilikali wakwe kwawula ku Ciŵata ca Njete kuŵaputile ngondo ni kwawulaga asilikali ŵa ngondo ŵa ku Edomu ŵakwana 10,000,

¹² ŵakamwile soni asilikali ŵane ŵa ku Edomuko ŵakwana 10,000. Kaneko ŵakwesile nawo asilikaliwo penani pa lwala, ni ŵatutile pasi asilikaliwo nipo ŵawile.

¹³ Nambo likuga lya asilikali ŵa ku Isalaeli lila liŵaliwusisye kuti likajawula ku ngondo lila, lyajile kuputa ngondo ni ŵandu ŵa ku misinda ja ku Yuda kutandilila ku Samaliya mpaka ku Beti Holoni, kweleko ŵawuleje ŵandu ŵakwana 3,000, soni ŵajigele katundu jwamjinji.

¹⁴ Amasiya piŵawusile kuŵapite kukwawulaga ŵandu ŵa ku Edomu kula, ŵalakwewo ŵayice ni milungu ja ŵandu ŵa kweleko, nipo ŵajijimice kuti jiŵe milungu jawo. Ŵajilambilaga ni kujitutumicisya ubani.*

¹⁵ Yeleyi yasakalisye AMBUJE, nipo ŵamtumile jwakulocesya kuti ajawule kwa Amasiya kukwawusya kuti, “Ana ligongo cici mkujilambila milungu ja cilendo jakuti nganijipakombola kwakulupusya ŵandu wakwe m'magasa mwa jemanja?”

¹⁶ Nambo jwakulocesyajo piŵaliji mkuŵeceta, Mwenye Amasiya ŵamwusisye jwalakwejo kuti, “Ana uwe tumtesile m'mwejo kuti mŵe pungu jwa mwenye?” Myoyo jwakulocesyajo ŵalesile kuŵeceta kwa ndaŵi panandi kaneko ŵatite kuti, “Sambano nayimanyi kuti Mlungu akalalisye yakuti ŵajonanje wawo ligongo lyakuti wawo akanile kupikanila yinasalileje une.”

Asilikali ŵa Mwenye Amasiya ŵaputile ngondo ni asilikali ŵa ku Isalaeli

¹⁷ Mwenye Amasiya ŵa ku Yuda pamo ni apungu ŵakwe ŵatesile mtemela, nipo ŵatumisye utenga kwa Mwenye Yehowashi jwa ku Isalaeli, cisukulu ca Yehu ŵakumtanda jwalakwejo pakumsalila kuti, myice akuno tumenyane.

¹⁸ Kaneko Yehowashi ŵatumisye maloŵe gakumjanga Amasiya kuti: “Kalakala kacitekete ka miŵa kakusimanikwa pacanya pa matumbi ga Lebanoni, katumisye utenga ŵakwawula ku kacitela ka mkungusa wakuti: ‘Mumbe mwanagwenu jwamkongwe kuti alombedwe ni mwanangu.’ Capitile cilombo ca mwitinji nipo caliŵete kacitekete kala.

¹⁹ Sambano m'mweji Amasiya, mkulikwesya pakuganisya kuti mkwete macili ligongo lyakuti mwapundile asilikali ŵa ku Edomu. Nambo ngumsalila kuti mtame kumangwenu peko. Ana ligongo cici mkulitandila mwasyene ni ŵandu ŵenu yisawusyo?”

²⁰ Nambo Amasiya nganapikanila yeleyo, pakuti lyaliji lisosa lya AMBUJE kuti asilikali ŵa Amasiya alepele, ligongo lyakuti jwalakwejo ŵalambilaga milungu ja Aedomu.

²¹ Myoyo asilikali ŵa Mwenye Yehowashi ŵa ku Isalaeli ŵajile kumenyana ni asilikali ŵa Mwenye Amasiya ŵa ku Yuda, ku Beti Shemeshi mcilambo ca Yuda.

²² Pakumenyanako, asilikali ŵa ngondo ŵa Mwenye Amasiya ŵa ku Yuda ŵalepele, nipo asilikaliwo ŵatisile kwawula kumangwawo.

²³ Ku Beti Shemeshiko, Mwenye Yowashi ŵamkamwile Mwenye Amasiya nipo ŵamjigele kwawula najo ku Yelusalemu. Ŵagumwile lipupa lya msinda wa Yelusalemu, mkuli wakwana mamita ciŵandika 180, kutandilila pa cipata Efelemu mpaka pa Cipata ca Pandumba.

²⁴ Ŵasumwile soni golidi* ni silifa josope, ni yida yosope ya m'Nyumba ja AMBUJE ni m'nyumba jakusunjilamo yipanje ya mwenye yiŵalolelaga Obedi Edomu. Ŵajigele soni yipanje ya m'Nyumba ja AMBUJE, ni kwakamula soni ŵandu ŵane nipo ŵawujile ku Samaliya.

²⁵ Piŵawile Yowashi mwenye jwa ku Isalaeli, Amasiya mwenye jwa ku Yuda ŵatemi cijumi yaka 15.

²⁶ Masengo gosope giŵatesile Amasiya kutandilila pandanda mpaka pambesi galembedwe m'buku ja Mbili ja Ayimwene ŵa ku Yuda ni Isalaeli.

²⁷ Kutandilila ndaŵi jele Amasiya ŵajimucile AMBUJE, ŵandu ŵane ŵa ku Yelusalemu ŵamtendele jwalakwejo mtemela, nipo ŵatilile ku msinda wa Lakishi. Nambo amagongo ŵakwewo ŵatumile ŵandu ŵane kuti ŵakuye ku Lakishi, nipo piŵamsimene ŵamwulajile kukoko.

²⁸ Mtembo wakwe ŵawujigele kwawula nawo ku Yelusalemu pa haci, nipo ŵawusicile m'malembe ga ayimwene mu msinda wa Daudi.