2 Mbi 23 - Chiyawo Bible

Ŵamasengo ŵa ku Nyumba ja AMBUJE ŵamjimucile Ataliya

¹ Piŵajembecele kwa yaka msano ni cimo ŵakutaga mbopesi ŵaganisisye kuti cine cakwe cikwenela kutendeka. Yehoyada ŵatesile mkamulano ni acimlongola msano ŵa asilikali ŵakuyicisyaŵa ŵele ŵalolega makuga ga ŵandu 100: Asaliya mwanace jwa Yelohamu, Ishimaeli mwanace jwa Yehohanani, Asaliya mwanace jwa Obedi, Maaseya mwanace jwa Adayiya, ni Elishafati mwanace jwa Sikili.

² Jemanjaji ŵajesile m'misinda jesope ja ku Yuda nipo ŵawusile ni Alefi ni acimlongola wosope.

³ Ŵandu wosopeŵa ŵasongene ku Nyumba ja AMBUJE,* kwele kuŵatesile cilanga* ni Yowashi mwanace jwa mwenye. Yehoyada ŵatite kuti, “Sambano mwanaceju akwenela kuŵa mwenye, mpela muŵaŵecetele AMBUJE mu cilanga cakwe kuti ŵanace ŵa Mwenye Daudi* taciŵa ayimwene.

⁴ Jemanja mkwenela kutenda ayi: Sikati ja jemanja Alefi ni ŵakutaga mbopesi ŵataŵeje ali mkutumicila pa lyuŵa lya sabato, mgaŵane makuga gatatu, kuti likuga line tililondeleje pa yipata,

⁵ likuga line tililondeleje ku nyumba ja mwenye, nipo likuga line tililondeleje pa mlango wa cipata cekulungwa. Ŵandu wosope tacisongana ku luŵala lwa mkati mwa Nyumba ja AMBUJE.

⁶ Mundu jwalijose akasajinjila m'Nyumba ja AMBUJE akaŵe Alefi ni ŵakutaga mbopesi ŵakutumicila pa lyuŵa lyelelo. Jemanjajo akomboleka kwinjila, ligongo lyakuti ali ŵaswejesedwe, nambo ŵandu ŵane wosope akwenela kugapikanila Malamusi ga AMBUJE.

⁷ Alefi akwenela kwima ku mkono wamlyo ni ku mkono wamciji wa mwenye, jwalijose ali anyakwile cida myala mwakwe; nipo jwalijose jutajinjile m'nyumbamo awulajidwe.”

⁸ Alefi pamo ni ŵandu ŵa ku Yuda ŵatesile yosope yene mpela muŵalamulile Yehoyada. Mundu jwalijose jwayice ni ŵandu ŵakwe ŵaŵaliji pa masengo pa sabato jelejo ni ŵandu ŵane soni ŵaŵajawulaga kupumula pa masengo gawo gakutumicila pakuŵapo kuti Yehoyada nganiŵakunda jemanja kuti atyoce.

⁹ Myoyo Yehoyada ŵapele acimlongola ŵala yakucijila ni mapanga yiyaliji ya Mwenye Daudi, nipo yasunjidwaga m'Nyumba ja AMBUJE.

¹⁰ Ŵajimice asilikaliwo m'malo mwawo ali anyakwile mapanga myala mwawo ni cakulinga cakuti ŵacinjilicisyeje mwenye. Ŵajimi kutyocela mbali ja kumpoto mpaka kum'mwela kwa Nyumba ja AMBUJEJO.

¹¹ Kaneko Yehoyada ŵamkopwesye mwanace jwa mwenye, nipo ŵam'wecice cisoti ca ucimwene, soni ŵampele buku ja malamusi ga ucimwene. Yehoyada pamo ni ŵanace ŵakwe ŵatasile mawuta pa mtwe pa Yowashi nipo ŵamjinjisye ucimwene. Ŵandu wosope ŵagumisile kuti, “Akole umi welewu mwenye!”

¹² Ataliya piŵapikene masegwe gakumlumba mwenyego, jwalakwe ŵajile ku Nyumba ja AMBUJE kuŵasongene ŵanduwo.

¹³ Piŵalolite, ŵam'weni mwenye jwasambanojo ali ajimi pa cipilala ciŵandika ni pa mlango nipo acimlongola ŵa asilikali ŵa ngondo ni ŵandu ŵakwimba malipenga ŵajimi ciŵandika ni mwenyewo. Ŵandu wosope ŵaliji ŵakusangalala mnope aku ali mkwimba malipenga, nipo ŵandu ŵakwimba nyimbo m'Nyumba ja AMBUJE ŵalongolelaga cisangalaloco. Papopo Ataliya ŵapapwile yakuwala yakwe nipo ŵagumisile kuti, “Akunjimucila! Akunjimucila!”

¹⁴ Yehoyada ŵasalile acimlongola ŵa ngondo ŵala kuti mkasimwawulajila m'Nyumba ja AMBUJE muno, “Mwatyosyani pa sikati pa misela jimjimijo, nipo jwalijose jutalinje kumkulupusya jwalakweju nombe najo awulajidwe.”

¹⁵ Myoyo asilikali ŵala ŵamkamwile Ataliya jula, nipo piŵayikaga nawo ku nyumba ja mwenye pa mlango wakolanjidwa Cipata ca Haci, ŵamwulajile pelepo.

Yehoyada ŵatesile cilanga ni ŵandu

¹⁶ Kaneko Yehoyada ŵatesile cilanga sikati ja ŵalakwewo ni ŵandu wosope ŵa ku Yuda ni Mwenye Yowashi kuti jemanjajo aŵe ŵandu ŵakulupicika kwa AMBUJE.

¹⁷ Ŵandu wosopewo ŵajile ku nyumba jiŵampopelelaga Baala* nipo ŵajigwisisye nyumbajo. Ŵagumwile soni malo gakupelecela mbopesi ni milungu jakusepa jijaliji kweleko, pakumalisya pakwe ŵamwuleje Matani juŵaliji jwambopesi jwa Baala.

¹⁸ Yehoyada ŵaŵisile Alefi ni ŵakutaga mbopesi kuti aloleleje Nyumba ja AMBUJE kuti soni apeleceje mbopesi syakutinisya kwa AMBUJE, mpela muŵayilembele m'buku ja malamusi ga Mose. Jemanjaji ŵalongolelaga soni nyimbo sya pa cisangalalopo.

¹⁹ Ŵaŵisile alonda pa yipata ya Nyumba ja AMBUJE kuti jwalijose juŵaliji jwangaswejesedwa akajinjila.

²⁰ Pakumalisya Yehoyada ŵajigele acimlongola ŵa asilikali, nduna, acibwanamkubwa ni ŵandu wosope ŵa mcilambomo, jemanjaji ŵampecesye mwenye kutyocela ku Nyumba ja AMBUJE mpaka kuja kwinjila ku nyumba jakwe ja ucimwene. Ŵanduwo piŵajinjile pa cipata cekulungwa, mwenye ŵatemi pa mpando wakwe wa ucimwene.

²¹ Ŵandu wosope ŵaliji ali agumbalilwe ni lukondwa, nipo mu msindamo mwaliji mwana bata, ligongo lyakuti Ataliya ŵaliji ali awulajidwe.