2 Mbi 20 - Chiyawo Bible

Ngondo jakulimbana ni Aedomu

¹ Piyamasile yeleyi asilikali ŵa ngondo ŵa ku Mowabu ni ku Amoni pamo ni Ameuni ŵane ŵayice kuputa ngondo ni Yehoshafati.

² Ŵandu ŵane ŵayice kukwasalila Mwenye Yehoshafati kuti, “Likuga lyekulungwa lya asilikali ŵa ngondo ŵa ku Edomu likwisa kuputa ngondo ni wawo kutyocela lisi line lya nyasa. Jemanjajo asumwile kala msinda wa Hasasoni Tamala.” (Ali ni lina line lya Enigedi).

³ Yehoshafati ŵatesile woga mnope nipo ŵaganisisye yakuti aŵende lunda kwa AMBUJE.* Kaneko jwalakwe ŵajenesye ku cilambo cosope kuti ŵandu ŵa mcilambomo alijime kulya.

⁴ Ŵandu ŵa m'misinda jesope ja ku Yuda ŵasongene ku Yelusalemu kukuŵenda lunda kwa AMBUJE,

⁵ nipo Yehoshafati pamo ni ŵandu ŵala ŵasongene malo gamo pa luŵala lwa mkati mwa Nyumba ja AMBUJE. Kaneko Mwenye Yehoshafati ŵajimi sikati ja ŵanduwo

⁶ nipo ŵapopesile kuti, “AMBUJE, Mlungu jwa acinangolo ŵetu, jwakulamulila kwinani ni ngosyo syosope sya pa cilambo capasi. Wawo ali ŵamacili soni ali ŵakupunda, nipo pangali mundu jwa mpaka asisyane ni wawo.

⁷ Wawo ali AMBUJE ŵetu. Aisalaeli piŵayice ku kutama mcilambo muno, wawo ŵatopwesye ŵandu ŵa mitundu jine* ŵaŵatamaga mcilambo muno nipo wawo ŵapelece cilamboco kwa yisukulu ya Abulahamu* kuti ciŵe cawo mpaka kalakala.

⁸ Jemanjajo ŵatamaga mcilambo muno nipo ŵataŵile nyumba ja ŵalakwe pakwacimbicisya wawo, pakuŵa ŵayimanyi kuti

⁹ naga cakusakala cilicose cikwayicilila jemanjajo mu litala lya cilango, mpela ngondo, yilwele, kapena sala, jemanjajo akomboleka kwika ni kwima pameso pa nyumba ajino kwele kwakulambilidwa wawo. Tacipopela kwa wawo ya yisawusyo yawo, nipo wawo tacapikana ni kwakulupusya jemanjajo.

¹⁰ “Sambano ŵandu ŵa ku Amoni, Mowabu, ni Edomu ŵatujimucile uwe. Piŵatyosile acinangolo ŵetu mcilambo ca Iguputo, wawo nganiŵakunda jemanjajo kuti ajinjile mu yilambomo, myoyo acinangolo ŵetu ŵalesile ŵandu wosopewo ngajonanga.

¹¹ Nambo sambano jemanjajo akutuwucisya mbusyo uwe pakututopola mcilambo ciŵatupele wawo kuti ciŵe cetu.

¹² Wawo ali Mlungu jwetu! Ŵape cilango jemanjajo, pakuti uwe nganitukola macili gakuti mpaka tulimbane ni likuga lyekulungwa lya asilikali lyele likulimbana ni uwe. Tusoŵile yakuti, nambo tukwaŵenda wawo kuti atukamusye.”

¹³ Pandaŵi jeleji acalume wosope ŵa ku Yuda, pamo ni aciŵamkwawo ni ŵanace ŵaliji ali ajimi ku Nyumba ja AMBUJE.

¹⁴ Msimu wa AMBUJE ŵamyicilile mundu jwine jwa ci Lefi juŵaliji mwikugamo. Lina lyakwe lyaliji Yahasiyele mwanace jwa Sakaliya; jwalakweju ŵaliji jwa mwiŵasa lya Asafu juŵapagwile kupitila mwa Mataniya, Yeiyeli, ni Benaya.

¹⁵ Yahasiele ŵatite kuti, “Ŵakucimbicikwa mwenye pamo ni ŵandu wosope ŵa ku Yuda ni Yelusalemu, AMBUJE akuŵeceta kuti jemanja mkajasa mtima kapena kutenda woga ni likuga lya asilikali ŵa ngondoli. AMBUJE taciputa ngondo m'malo mwa jemanja.

¹⁶ Malaŵi mkamenyane nawo jemanjajo pitaciyikaga kupitila ku Sisi. Timkasimangane nawo kumbesi kwa ciŵata cakungopoko lyuŵa kwa cipululu ca Yeluwele.

¹⁷ Nganikuŵa kwakusosekwa kuti jemanja mpute nawo ngondoji. Cakusacikwa cili cakuti mkagambe kwima m'malo mwenu, nipo timkawone AMBUJE ali kumpundisya jemanja. Jemanja mkajasa mtima kapena kutenda woga. Malaŵi mjawule kuputa ngondo nipo AMBUJE taciŵa ni jemanja!”

¹⁸ Kaneko Mwenye Yehoshafati ŵajinamile pasi, nipo ŵandu wosope ŵajineme nawo nipo ŵalambile AMBUJE.

¹⁹ Alefi ŵa mwiŵasa lya Kohati, ni Kola ŵajimi nipo ŵalambile AMBUJE ni maloŵe gakwesya mnope.

²⁰ Kundaŵindaŵipe ŵanduwo ŵajile ku cipululu ca Tekowa. Pandaŵi jiŵakopokaga mu cipululumo Yehoshafati ŵasalile ŵandu ŵa ku Yuda ni Yelusalemu ŵala kuti: “Ŵandu ŵa ku Yuda ni Yelusalemu! Mkwenela kwakulupilila AMBUJE, Mlungu jwenu, nipo timcitamilicika, soni mwakulupilileje ŵakulocesya ŵakwe nipo timcipunda.”

²¹ Piŵamasile kuŵeceta ni ŵanduwo, mwenyewo ŵasagwile ŵandu ŵane kuti awale mikanjo jawo jakusawala pa yindimba ya AMBUJE nipo ajendeje pasogolo pa asilikali ŵa ngondo, ajimbeje kuti: “Twalumbe AMBUJE! Cinonyelo cawo cili cangamala!”

²² Piŵatandite kwimba, AMBUJE ŵasokonesye asilikali ŵa ngondo ŵa ku Amoni, Mowabu, ni soni asilikali ŵa ku Edomu ŵele ŵiŵayice ku kumenyana ni ŵandu ŵa ku Yuda nipo jemanjajo ŵalepele pakumenyanako.

²³ Aamoni ni Amowabu ŵajimucile asilikali ŵa ngondo ŵa ku Edomu nipo ŵawuleje wosope ŵene. Piŵamasile kwawulaga asilikali ŵa ku Edomu ŵala, kaneko ŵatandite kuwulagana acimsyenepe.

²⁴ Asilikali ŵa ku Yuda piŵayice pa sanja jijaliji mcipululu mula, ŵalolite kuŵaliji amagongo ŵawo kula nipo ŵaweni kuti wosopewo ŵaliji ali awile kala. Paliji pangali ni mundu jumo jose juŵaliji cijumi.

²⁵ Myoyo Yehoshafati pamo ni asilikali ŵakwe ŵa ngondo ŵajile ku kujigala katundu jwa ŵandu ŵaŵawilewo, kweleko ŵasimene ng'ombe syejinji, katundu, yakuwala ni yindu yine ya mtengo wapenani. Jemanjajo ŵaŵele ali mkujigala katundujo kwa masiku gatatu pakuŵa jwaliji jwamjinji.

²⁶ Pa lyuŵa lyamcece jemanjajo ŵasongene ku Ciŵata ca Belaka nipo kweleko ŵatogolele AMBUJE pa yosope yene yiŵatendele jemanjajo. Ali ni ligongo lyakwe ciŵataco cikukolanjidwa lina lyakuti “Belaka” mpaka sambano jino.

²⁷ Yehoshafati ŵalongolele asilikali ŵakwe mwa lukondwa pakuwujila ku Yelusalemu, ligongo lyakuti AMBUJE ŵakamwisye jemanjajo kuti ŵapunde amagongo ŵawo.

²⁸ Piŵayice ku Yelusalemu, jemanjajo ŵajesile kwawula ku Nyumba ja AMBUJE aku ali mkwimba yida yakwimbila ya ngonji ni malipenga.

²⁹ Nipo mitundu jesope ja ŵandu pijapikene kuti AMBUJE ŵapundisye Aisalaeli ŵakamwilwe ni woga,

³⁰ nipo Yehoshafati ŵalamulile mwa mtendele soni AMBUJE ŵaliji nawo mu yosope.

Mbesi ja kulamulila kwa Yehoshafati

³¹ Yehoshafati ŵaŵele mwenye jwa ku Yuda pa ndaŵi jiŵaliji ni yaka 35 nipo ŵalamulile ku Yelusalemu kwa yaka yakwana 25. Mamagwe ŵaliji Asuba, mwanace jwamkongwe jwa Silihi.

³² Jwalakwe ŵatesile yakulungama pameso pa AMBUJE mpela muŵatendele babagwe;

³³ nambo jwalakwejo nganagumula malo gakulambililapo milungu ja cilendo, pakuti ŵandu ŵaliji mkanagalawucile kwa AMBUJE, Mlungu juŵalambilanga acinangolo ŵawo ni mitima jawo jesope.

³⁴ Masengo gosope giŵatesile Yehoshafati pa ndaŵi jiŵaliji mwenye kutandilila pandanda mpaka pambesi, galembedwe m'buku ja Mbili ja Yehu mwanace jwa Hanani, jele jili mbali jimo ja Mbili ja Ayimwene ŵa ku Isalaeli.

³⁵ Ndaŵi jine Mwenye Yehoshafati jwa ku Yuda ŵatesile mkamulano ni Mwenye Ahasiya jwa ku Isalaeli, juŵatesile yindu yejinji yakusakala.

³⁶ Ŵakamulene yakuti apanganye yombo kuti yijawuleje ku Talishishi. Yomboyo ŵayipanganyicisyaga ku Esiyoni Geba.

³⁷ Nambo Eliyesa mwanace jwa Dodafahu ŵa ku Malesha ŵalocesye yakwamba Yehoshafatiwo kuti, “Pakuŵapo mtesile mkamulano ni Ahasiya, AMBUJE tacijonanga yombo yimpanganyisyeyo.” Myoyo yomboyo yajonasice mwakuti nganiyija kwika ku Talishishi.