2 Mbi 2 - Chiyawo Bible

Kuliŵicila cile kutaŵa Nyumba ja AMBUJE

¹ Mwenye Solomoni ŵaganisisye yakuti ataŵe Nyumba jakwalambililamo AMBUJE,* ni kutaŵa soni nyumba jakwe ja ucimwene.

² Ŵalembile ŵasengo ŵakwana 70,000 ŵakuti ajigaleje katundu, soni ŵalembile ŵamasengo ŵane ŵakwana 80,000 kuti akaseje maganga ku cilambo ca matumbi. Ŵapali soni acikapitawo ŵakwana 3,600 kuti aloleleje masengogo.

³ Solomoni ŵatumisye maloŵe kwa Mwenye Hilamu jwa ku Taya gakwasalila kuti, “Mpela mumwatendele kwa Daudi* baba ŵangu, pakwatumicisya yitela ya mkungusa kuti ataŵile nyumba jawo, myoyo une soni ngumŵenda kuti mundumicisye yitela.

⁴ Une ngusaka kuti nacimbicisye AMBUJE pakwataŵila ŵalakwewo Nyumba. Tigaciŵa malo geswela kwele une pamo ni ŵandu ŵangu tucimlambilamo jwalakwejo pakututumisya ya liwungo lyakununjila pameso pa AMBUJEWO, ni kupelecelamo soni mkate wa AMBUJE ndaŵi syosope. Tucipelecelagamo soni mbopesi syakutinisya kundaŵi ni ligulo lililyose, pa masiku ga sabato, pa cindimba ca kuwoneka kwa mwesi wasambano, ni masiku gane ga kwacimbicisya AMBUJE, Mlungu jwetu. Ŵalamwile Aisalaeli kuti atendeje yeleyi mpaka kalakala.

⁵ Nyumba jitindaŵejo tijiŵe jekulungwa, ligongo Mlungu jwetu ali jwamkulungwa kupunda milungu jesope.

⁶ Ana ŵani wa mpaka apakombole kwataŵila nyumba, pakuti kwinani atamose cilambo capasi pano AMBUJE ngaŵa mkwanila? Ana une ndili ŵani ŵakuti nataŵile nyumba jakwakwanila, jakupunda malo gakutinicisya ubani* pameso pa Mlungu?

⁷ Sambano andumicisye mundu jwali m'misili jwa kusepa, jwakumanyilila kukamulisya masengo golidi,* silifa,* bulonsi ni cisyano ca ayiloni, nguwo jecejewu, sya mtundu wa papo, ni ja mtundu wa buluwu. Tacikamulaga masengogo ni ŵandu ŵane ŵakumanyilila masengo ŵa ku Yuda ni ku Yelusalemu ŵiŵambele une Daudi baba ŵangu.

⁸ Mundumicisye soni yitela ya mkungusa, yitela ya mlombwa, ni matabwa ga citela ca m'baŵa wa ku Lebanoniko. Ngumanyilila kuti acacanda ŵenu ŵa maceka akusamanyilila kukata yitela ku Lebanoniko, nipo acacanda ŵangu tacakamusya acacanda ŵenu,

⁹ kuti angatile une yitela yejinji, pakuti nyumba jingusaka kuti ndaŵijo tijiciŵa jekulungwa nambo soni jakusalala.

¹⁰ Acacanda ŵenu ŵa macekawo tinjalipila matani gakwana 2,000 ga tiligu, matani ga balele* gakwana 2,000, finyo jwakwana malita 400,000, ni mawuta ga olifi* gakwana malita 400,000.”

¹¹ Mwenye Hilamu jwa ku cilambo ca Taya ŵalembele Solomoni cikalata cakwajanga kuti, “AMBUJE akusiŵanonyela ŵandu ŵakwe, ali ni ligongo lyakwe amŵisile m'mwejo kuti mŵe mwenye jwa ŵanduwo.

¹² Acimbicikwe AMBUJE, Mlungu jwa Isalaeli juŵapanganyisye kwinani ni cilambo ca pasi, juŵampele Mwenye Daudi mwanace jwalunda, jwagumbala ni umanyilisi, soni jwakupikanicisya cenene yindu, jwele jutataŵe Nyumba ja AMBUJE soni nyumba jakwe ja ucimwene.

¹³ Ngumtumicisya m'misili jwalunda, soni jwakugamanyilila masengo, lina lyakwe Hulamu,

¹⁴ jwele mamagwe ŵaliji ŵa lukosyo lwa Dani nipo babagwe ŵaliji ŵa ku Taya. Jwalakweju akugamanyilila cenene masengo ga golidi, silifa, bulonsi, cisyano ca ayiloni, maganga ni matabwa, nguwo syecejewu, nguwo sya mtundu wa papo, ni nguwo sya bafuta. Akusapakombola soni kugoba, ni masengo gane galigose. Mwakunde kuti akamule masengo pamo ni amisili ŵenu ni ŵandu ŵane ŵiŵakamwile masengo pamo ni Mwenye Daudi baba ŵenu.

¹⁵ Sambano mtutumicisye tiligu, balele, finyo ni mawuta ga olifi, yimwatusalile kuti cimtupe.

¹⁶ Uwe citukate yitela ya mkungusa yimkuyisaka ya ku matumbi ga ku Lebanoni, nipo cituyitaŵe pamo ni kuyijajaŵasya pa wato m'nyasa kwawula nayo ku Yopa, kuti jemanja takayijigale yitelayo ku Yopako ni kwawula nayo ku Yelusalemu.”

Masengo gakutaŵa Nyumba ja AMBUJE gakutandidwa soni

¹⁷ Mwenye Solomoni ŵalembile mena ga ŵandu wosope ŵa cilendo ŵaŵatamaga mcilambo ca Isalaeli, mpela muŵatendele Daudi babagwe pa ndaŵi jiŵaliji mwenye. Mcilambomo ŵapali ŵandu ŵa cilendo ŵakwana 153,600.

¹⁸ Solomoni ŵasagwile ŵandu ŵakwana 70,000 sikati ja jemanjajo kuti akamuleje masengo gakujigala yindu yakulekanganalekangana yakutaŵila nyumbajo, ŵasagwile soni ŵandu ŵane ŵakwana 80,000 kuti akamuleje masengo gakukasa maganga kwitumbi, ŵasagwile soni ŵane ŵakwana 3,600 kuti aŵe acikapitawo ŵakwalolela ŵandu ŵiŵakamulaga masengo gakutaŵa nyumba.