2 Mbi 19 - Chiyawo Bible

Jwakulocesya Yehu ŵamjamwice Yehoshafati

¹ Mwenye Yehoshafati jwa ku Yuda ŵawujile cenene ku nyumba jakwe ja ku Yelusalemu.

² Jwakulocesya* Yehu, mwanace jwa Hanani ŵajile kuwonegana nawo nipo ŵasalile mwenyewo kuti, “Ana akuganisya kuti cili cindu cambone kwakamucisya ni kuŵa nawo mbali jimo ŵandu ŵakusakala ni ŵakuŵengana ni AMBUJEŴA? Ligongo lya yeleyi lutumbilo lwa AMBUJE* tiluŵe pa wawo.

³ Nambo atamose yili myoyo, pana yindu yine yambone yiŵatesile wawo. Wawo ŵagwisisye yilandanyo ya milungu ja Ashela jele ŵandu ŵajilambilaga, nipo wawo alinjile kukuya lisosa lya Mlungu.”

Yehoshafati ŵakolosisye mapopelo

⁴ Atamose kuti Yehoshafati ŵatamaga ku Yelusalemu, kaŵilikaŵili ŵajendelaga ŵandu kutandilila ku Belesheba mpaka ku cilambo ca matumbi ga Efelemu, ni cakulinga cakusaka kuti ŵandu ayice kwa AMBUJE, Mlungu juŵalambilanga acinangolo ŵawo.

⁵ Ŵasagwile nduna kutyocela m'misinda jesope jakulupucilamo ku Yuda,

⁶ nipo ŵasalile ŵakulamulawo kuti: “Mkwenela kusamala pa ndaŵi jimkupeleka cilango, pakuŵapo ngamkulamula mu lina lya mundu, nambo mu lina lya AMBUJE nipo jwalakwejo ali ni jemanja ndaŵi syosope pamkulamula magambo.

⁷ Msamalile pa yele yimkutenda soni mwacimbicisyeje AMBUJE, ligongo AMBUJE, Mlungu jwetu jwangalola mbali pakusaka kupeleka cilango, jwangali lusagu, soni jwalakwejo jwangapocela mbote ja cilo.”

⁸ Ku Yelusalemuko, Yehoshafati ŵasagwile Alefi, ŵakutaga mbopesi, ni acimlongola ŵa maŵasa ga Isalaeli kuti alamuleje magambo ga kukasa Malamusi ga AMBUJE kapena magambo gakukangana sikati ja ŵanduwo.

⁹ Ŵapele jemanjajo misyungu aji: “Mkamuleje masengo mwakwajogopa AMBUJE, mwakulupicika soni ni mtima wenu wesope.

¹⁰ Naga pana magambo gakuwulaga sikati ja acalongo acimjenu ŵamkutama nawo m'misindamo, kapena magambo ga kukasa malamusi, jemanja mkwenela kwajiganya jemanjajo ndaŵi syosope kuti akamlemwecesyaga AMBUJE. Myoyo lutumbilo lwa AMBUJE ngasiluŵa pa jemanja ni acalongo acimjenuwo. Nambo pamkutenda masengogo mkalemwa soni.

¹¹ Amaliya jwamkulungwa jwa ŵakutaga mbopesi* ni jutaciŵa jwakwalongolela jemanja pa magambo gosope gakwayana ni AMBUJE. Sebadiya mwanace jwa Ishimaeli, jwamkulungwa jwa ku Yuda, ni jutaciŵa jwakulolela magambo gosope gene gakwayana ni ayimwene. Nipo Alefi tacimtumicilaga jemanja mpela nduna. Myoyo mŵe ŵakulimba mtima pakutenda yeleyi nipo AMBUJE aŵe ni jemanja ŵakulungama.”