2 Mbi 18 - Chiyawo Bible

Jwakulocesya Mikaya akumkalamusya Ahabu

¹ Yehoshafati mwenye jwa ku Yuda jwasicile mnope, nipo jwaliji jwakupikanika, jwalakwe jwatesile mkamulano wa ulombela wa mwanace jwakwe ni mwanace jwamkongwe jwa Mwenye Ahabu.

² Pali papite yaka yejinji Yehoshafati ŵajile kukunguluka ku Samaliya kwa Mwenye Ahabu. Nambo Ahabu pakusaka kulosya ucimbicimbi kwa Mwenye Yehoshafati, jwalakwe ŵawuleje ngondolo ni ng'ombe sya cindimba. Ŵakwete cakulinga cakuti ŵanyenjelele Yehoshafati kuti asilikali ŵakwe apwatikane ni likuga lya asilikali ŵa Ahabuwo nipo akapute ngondo ni ŵandu ŵa mu msinda wa Lamoti.

³ Ahabu ŵamwusisye Mwenye Yehoshafati kuti, “Ana citujawule kukumenyana ni ŵandu ŵa mu msinda wa Lamoti?” Yehoshafati ŵajanjile kuti, “Une pamo ni asilikali ŵangu tuli cile kwawula ni jemanja.”

⁴ Kaneko ŵatite, “Kwende tuŵende lunda kwa AMBUJE.”*

⁵ Myoyo Ahabu ŵaŵilasile ŵakulocesya wakwe wosope 400, nipo ŵawusisye jemanjajo kuti, “Ana une njawule kuputa ngondo ni ŵandu ŵa mu msinda wa Lamoti, kapena ngajawula?” Ŵakulocesyawo ŵajanjile kuti, “Ajawule, pakuti AMBUJE takapundisye wawo.”

⁶ Nambo Yehoshafati ŵawusisye kuti, “Ana akuno kwangali jwakulocesya* jwa mpaka akatuŵendele lunda kwa AMBUJE?”

⁷ Ahabu ŵajanjile kuti, “Apali jwine jwa mpaka akatuŵendele lunda kwa AMBUJE, lina lyakwe Mikaya mwanace jwa Imula. Nambo une ngusaŵengana najo pakuŵapo jwalakwejo jwangalocesya yambone yakwamba une; nambo m'malo mwakwe akusalocesya yakusakala ndaŵi syosope.” Yehoshafati ŵajanjile kuti, “Iyayi mwenye akaŵeceta myoyo.”

⁸ Kaneko Mwenye Ahabu ŵajiŵilasile nduna jakwe nipo ŵajisalile kuti, mjawule mkaŵilanje Mikaya ni myice nawo akuno.

⁹ Ayimwene ŵaŵiliwo ŵawete mikanjo jawo ja ucimwene nipo ŵatemi pa yitengu yawo pa malo gakupwagulila tiligu kusa kwa cipata ca ku Samaliya, nipo pa ndaŵiji ŵakulocesya wosope ŵaliji mkulocesya pameso pa ayimwenewo.

¹⁰ Jumo mwa ŵakulocesyawo, ŵaliji Sedekiya mwanace jwa Kenana ŵapanganyisye msengo wa cisyano nipo ŵasalile Ahabu kuti, “AMBUJE akuŵeceta kuti, ‘Naga wawo akukamulisya masengo msengo awu, wawo takapunde ŵandu ŵa ku Asiliya.’ ”

¹¹ Ŵakulocesya wosopewo ŵalocesye mwakulandana, nipo ŵasalile Ahabu kuti, “Ajawule kuputa ngondo ku Lamoti nipo takapunde. AMBUJE takapundisye jemanja pakumenyanako.”

¹² Nduna jijapite kukumŵilanga Mikaya jwamsalile jwalakwejo kuti, “Ŵakulocesya wosope alocesye yindu yambone yakwamba mwenye, soni m'mwejo mkalocesye yambone yakwamba mwenyewo.”

¹³ Nambo Mikaya ŵajanjile kuti, “Une ngulumbila pameso pa Mlungu jwangu jwa cijumi kuti tingaŵecete yitakasalile AMBUJE, Mlungu jwangu.”

¹⁴ Piŵayice kwa Mwenye Ahabu, mwenyejo ŵamwusisye jwalakwejo kuti, “Mikaya, ana tujawule ku Lamoti kuputa ngondo, kapena tukajawula?” Mikaya ŵajanjile kuti, “Ajawule! AMBUJE takapundisye jemanjajo pakumenyanako.”

¹⁵ Nambo Ahabu ŵajanjile kuti, “Msaleje yakuwona yisyesyene mu lina lya AMBUJE, pa ndaŵi jimkuŵeceta ni une. Ana namlumbilisye kalingwa kuti msaleje yakuwona?”

¹⁶ Mikaya ŵajanjile kuti, “Kupitila m'mesomkulola ginakwete, naweni asilikali ŵa ngondo ŵa ku Isalaeli ali amwasikene pa matumbi mpela ngondolo syangali jwa mkucinga. Nipo AMBUJE ŵaŵecete ni une acitiji kuti, ‘Ŵanduŵa ŵangali mbujegwawo; ŵalece ajawuleje kumangwawo mwamtendele.’ ”

¹⁷ Ahabu ŵasalile Yehoshafati kuti, “Ngati namsalile une kuti ŵeleŵa ŵangalocesya yindu yambone yakwamba une nambo akaŵe yacabepe.”

¹⁸ Mikaya ŵapitilisye kuŵeceta kuti: “Sambano apikane yakuŵeceta AMBUJE! Une naweni AMBUJE ali atemi pa citengu cawo ca ucimwene kwinani, nipo malayika gawo gosope gajimi ku mkono wamlyo, gane ku mkono wamciji.

¹⁹ AMBUJE ŵawusisye kuti, ‘Ana ŵani ŵatajawule kukwanyenjelela Ahabu kuti ajawule ku Lamoti kutakawulajidwe?’ Malayikaga gajangaga yindu yakulekangana,

²⁰ nipo msimu wine wajimi pameso pa AMBUJE, ni ŵatite kuti, ‘Une tinjawule kukwanyenjelela Ahabuwo.’ ‘Timkanyenjelele uli?’ AMBUJE ŵawusisye myoyo.

²¹ Msimuwo wajanjile kuti, ‘Une tinjawule kwa ŵakulocesya ŵa Ahabu nipo tingasalile kuti alocesyeje ya unami.’ AMBUJE ŵaŵecete ni une acitiji kuti, ‘Mjawule ni mkamlambusye jwalakwejo nipo tiyikakombolece.’ ”

²² Myoyo Mikaya ŵamalisisye pa kuŵeceta maloŵe gakuti: “AMBUJE aŵisile msimu wa unami mwa ŵakulocesya ŵenuŵa. Pakuŵapo AMBUJE asyene aŵecete kuti wawo taliwone likungu.”

²³ Kaneko jwakulocesya Sedekiya jwapite piŵaliji Mikaya nipo ŵamputile likofi ku ngope, ni ŵamwusisye kuti, “Ana mkuganisya kuti msimu wa AMBUJE mpaka uŵecete ni m'mwejo kundeka une?”

²⁴ Mikaya ŵajanjile kuti, “Timcimanyilila lyuŵa lyele litimcijinjila kukujuŵa mcipinda ca mkati mwa nyumba.”

²⁵ Kaneko Mwenye Ahabu ŵajilamwile nduna jakwe jimo kuti, “Mwataŵe Mikaya nipo mjawule nawo kwa Amoni, jwamkulungwa jwa msinda, ni kwa Yowashi mwanace jwa mwenye.

²⁶ Mkasalile jemanjajo kuti akamŵice munduju mu ukayidi, nipo akampeje mkate ni mesi panandi, mpaka pitinjiwuja une mwamtendele.”

²⁷ Mikaya ŵaŵecete kuti, “Naga wawo akuwuja mwamtendele, ni kuti AMBUJE nganaŵeceta kupitila mwa une.” Soni ŵapitilisye kuŵeceta kuti, “Ŵandu wosope mpikanile maloŵe gimbecetega.”

Ciwa ca Ahabu

²⁸ Kaneko Mwenye Ahabu ni Mwenye Yehoshafati jwa ku Yuda pamo ni asilikali ŵakwe ŵa ngondo ŵajile ku Lamoti.

²⁹ Ahabu ŵasalile Yehoshafati kuti, “Une timbwale yakuwala ya usilikali, nipo wawo awale mkanjo wawo wa ucimwene.” Myoyo Ahabu ŵapite ku ngondo ali awete yakuwala ya usilikali.

³⁰ Mwenye jwa ku Siliya ŵalamwile ŵandu ŵaŵalamulilaga mageleta kuti akaputa ngondo ni mundu jwalijose nambo akalimbane ni mwenye jwa ku Isalaeli.

³¹ Ŵandu ŵakulamulila mageleta ŵala piŵam'weni Yehoshafati ŵaganisisye kuti jwalakwejo ŵaliji mwenye jwa ku Isalaeli, nipo ŵajile kukulimbana nawo. Yehoshafati ŵagumisile mnope, nipo AMBUJE, Mlungu ŵamkulupwisye jwalakwejo pakwalekasya asilikali ŵa ku Siliyawo.

³² Ŵakulamulila mageletawo piŵaweni kuti jwelejo nganaŵa mwenye jwa ku Isalaeli ŵalesile kumtoposya.

³³ Msilikali jwa ku Siliya ŵaponyisye mpamba uwasomile pakulumbikana pa cakuwala ca cisyano ca Mwenye Ahabu. Papopo ŵalisile nipo ŵamsalile juŵajendesyaga ligeleta lya Ahabuwo kuti, “Mgalawuce, nipo mundyosye pa malo ga ngondo gano, pakutipo ambulesye.”

³⁴ Kumenyanako kwapelengenye mpaka ligulo mwakuti Mwenye Ahabu ŵaliji citamile mu ligeleta lyakwe, mwakulolegana ni asilikali ŵa ku Siliya mpaka ligulo. Pilyakapilaga lyuŵa ŵawile.