2 Mbi 16 - Chiyawo Bible

Yisawusyo ku cilambo ca Isalaeli

¹ Mcaka ca 36 ca kulamulila kwa Asa, Mwenye Basha jwa ku Isalaeli ŵaputile ngondo ni cilambo ca Yuda nipo ŵasumwile msinda wa Lama, kaneko ŵatandite kutaŵa lipupa kuwusyungulila msindawo, ni cakulinga cakwalekasya ŵandu kuti akajinjila kapena kukopoka mcilambo ca Yuda.

² Asa ŵajigele golidi* ni silifa* jujwaliji m'Nyumba ja AMBUJE* ni jujwaliji ku nyumba jakwe, nipo ŵayitumisye ku Damasiko kwa Mwenye Beni Hadadi ŵa ku Siliya, pamo ni maloŵe aga gakuti,

³ “Kwende tutende mkamulano sikati ja m'mwejo ni une, mpela muŵatendelaga baba ŵangu ni baba ŵenu. Ngumtumicisya silifa ni golidi kuti yiŵe mtuka wenu. Sambano ngumŵenda kuti m'masye mkamulano wenu ni Mwenye Basha ŵa ku Isalaeli, kuti ŵelewo alece kumenyana ni une.”

⁴ Mwenye Beni Hadadi ŵakamulene nayo yiŵaŵecete Mwenye Asa yila, nipo ŵatumile acimlongola ŵa asilikali ŵa ngondo kuti ajawule ku cilambo ca Siliya kuti akapute ngondo ni ŵandu ŵa m'misinda ja ku Isalaeli. Pakumenyanako asilikali ŵa Mwenye Beni Hadadi ŵasumwile misinda ja Iyoni, Dani, Abele Maimu ni misinda jesope jiŵasunjilagamo katundu ku Nafutali.

⁵ Mwenye Basha piŵapikene yeleyi, ŵalesile kutaŵa lipupa lyakucinjilicisya msinda wa Lama nipo ŵagalesile masengogo.

⁶ Kaneko Mwenye Asa ŵaŵilasile ŵandu wosope ŵa mcilambo ca Yuda kuti ayice kukukamusya kunyakula maganga ni matabwa giŵakamulisyaga masengo Mwenye Basha pakutaŵa lipupa lyakucinjilicisya msinda wa Lama. Asa ŵakamulisye soni masengo matabwa ni maganga gagogo piŵataŵaga lipupa lyakucinjilicisya misinda ja Geba, ni Misipa.

Jwakulocesya Hanani

⁷ Pandaŵi jelejo jwakulocesya* Hanani ŵajile kwa Mwenye Asa ŵa ku Yuda kukwasalila kuti, “Ligongo lyakuti mwaŵisile cikulupi cenu mwa mwenye jwa ku Siliya m'malo mwakuŵika cikulupi cenu mwa AMBUJE, Mlungu jwenu, likuga lya asilikali ŵa ngondo ŵa ku Isalaeli limtisile.

⁸ Ana ŵandu ŵa ku Ifiyopiya ni ŵa ku Libiya nganaŵa mu likuga lyekulungwa lya asilikali ŵa ngondo, lyele lilyakwete mageleta gejinji ni ŵandu ŵakwela pa mahaci? Pakuŵapo mwaŵisile cikulupi cenu mwa AMBUJE, jwalakwejo ampundisye jemanja.

⁹ AMBUJE akusacilolela cilambo cosope, soni akusapeleka macili kwa ŵandu wosope ŵakusampikanila jwalakwe. Mtesile yakuloŵela, nipo kutandila sambano jino mpaka msogolo timciŵa mli kuputa ngondo.”

¹⁰ Maloŵega gamsakalisye Mwenye Asa myoyo ŵamkamwile ni kumtaŵa Hanani nipo ŵamŵisile mu ukayidi. Kaneko Asa ŵatandite kwatendela ŵandu ngalwe.

Kuwa kwa Mwenye Asa

¹¹ Masengo gosope giŵatesile Asa pa ndaŵi jiŵaliji mwenye kutyocela pandanda mpaka pambesi galembedwe m'buku ja Mbili ja Ayimwene ŵa ku Yuda ni ku Isalaeli.

¹² Mcaka ca 39 Asa piŵaliji mwenye, ŵalemele ligongo lya ulwele wa sajo; nambo atamose kuti ŵalwalaga ŵelewo nganaŵenda cikamucisyo kwa AMBUJE, nambo m'malo mwakwe ŵaŵendaga cikamucisyo kwa asing'anga.

¹³ Asa ŵawile mcaka ca 41 ca kulamulila kwakwe

¹⁴ nipo ŵaŵisile mwilembe liŵasosile asyene pa ndaŵi jiŵaliji cijumi mu msinda wa Daudi.* Ŵagonece mtembowo pa macila piŵaŵisile yakununjila yakulekanganalekangana yiŵapanganyisye ŵandu ŵakusapanganya mawuta gakununjila, nipo ŵapambile cilangali ca moto ni cakulinga cakusaka kupeleka ucimbicimbi kwa jwalakwejo.