2 Mbi 15 - Chiyawo Bible

Yiŵayisindile Asa

¹ Msimu wa AMBUJE ŵamyicilile Asaliya mwanace jwa Odedi.

² Ŵelewo ŵajile kuwonegana ni Mwenye Asa nipo ŵasalile kuti, “Wawo mwenye, pamo ni Ayuda wosope, ni Abenjamini, ambikanile une. AMBUJE taŵeje ni jemanja naga akupitilisya kwapikanila. Naga mkwasosasosa AMBUJE timwasimane, nambo naga mkwaleka nombe nawo tacimleka.

³ Kwa ndaŵi jelewu Aisalaeli nganakola Mlungu jusyesyene, nganakola soni ŵakutaga mbopesi ŵakuti ŵajiganyeje jemanjajo ya Mlungu, nipo nganakola malamusi.

⁴ Nambo mu ndaŵi ja yakusawusya, ŵaŵendaga cikamucisyo kwa AMBUJE, Mlungu juŵamlambilaga Aisalaeli. Ŵamsosaga nipo ŵamsimanaga.

⁵ Masiku gelego kwaliji kwangali mtendele mcilambo ca Isalaeli mwakuti kwaliji kwakusawusya kuti mundu ajinjile kapena kuti akopoce mcilambo ca Isalaeli.

⁶ Ŵanduwo ŵajimucilene mwakuti mtundu wine waliji mkumenyana ni ujakwe, msinda waliji mkumenyana ni msinda ujakwe, pakuti AMBUJE ni ŵaŵatendesye kuti yisawusyo yakulekanganalekanganayi yipagwe.

⁷ Jemanja mkwenela kulimba mitima ni kulimbicila, ligongo timcipocela mbote pa masengo gimkutendaga.”

⁸ Asa piŵapikene maloŵe gakulocesya giŵaŵecete Asaliya, mwanace jwa Odedi, ŵalimbile mtima. Ŵatyosisye milungu jesope jakusepa jijaliji kucilambo cosope ca Yuda ni ku Benjamini ni jine soni jijaliji m'misinda jiŵasumwile ku cilambo ca matumbi ca Efelemu. Ŵalinganyisye soni malo gakupelecela mbopesi kwa AMBUJE gigaliji pasogolo pa lipenu lya Nyumba ja AMBUJE.

⁹ Asa ŵaŵilasile pampepe ŵandu ŵa ku Yuda, ni ku Benjamini, ni ŵandu ŵa ku Efelemu, Manase, ni Simiyoni ŵele ŵaŵatamaga nawo ku Yuda. Ŵandu ŵajinji ŵaliji ali atilile kwa Mwenye Asa, ligongo lyakuti jemanjajo ŵayiweni kuti AMBUJE ŵaliji nawo Asa.

¹⁰ Ŵanduwo ŵasongene ku Yelusalemuko pa mwesi watatu mcaka ca 15 ca ucimwene wa Asa.

¹¹ Pa lyuŵa lyelelo ŵapelece mbopesi ja ng'ombe 700, ni ngondolo 7,000 kwa AMBUJE.*

¹² Ŵatesile soni cilanga* cakuti tiŵalambileje AMBUJE, Mlungu juŵamlambilaga acinangolo ŵawo mwakulupicika.

¹³ Ŵakamulene soni kuti mundu jwalijose jwangakwalambila AMBUJE, Mlungu juŵamlambilaga Aisalaeli akwenela kuwulajidwa.

¹⁴ Ŵanduwo ŵalumbile mu lina lya AMBUJE kuti tacisunga cilanga, kaneko ŵajimbile mwa kukwesya maloŵe nipo ŵajimbile malipenga.

¹⁵ Ŵandu wosope ŵa ku Yuda ŵasangalele ligongo ŵatesile cilangaci mwakulupicika. Ŵatandite kwalambila AMBUJE nipo panyuma pakwe AMBUJE ŵapele jemanjajo mtendele sikati ja amagongo ŵawo.

¹⁶ Mwenye Asa ŵatyosisye Maaka mama ŵawo mwenye pa udindo, soni ŵaŵaliji angangagwe ligongo lyakuti ŵelewo ŵapanganyisye cilandanyo ca mlungu jwakusepa lina lyakwe Ashela. Asa ŵagumwile cilandanyo ca Mlungu jwakusepajo, ŵacikasile, kaneko ŵajile kukucijoca ku Ciŵata ca Kidiloni.

¹⁷ Atamose kuti Asa nganajonanga malo gosope gakujilambila milungu mcilambomo, ŵelewo ŵakulupicice pameso pa AMBUJE pa masiku gosope ga umi wakwe.

¹⁸ Ŵayice ni mituka ja silifa,* ja golidi,* ni yindu yine yele Asa pamo ni babagwe ŵayipelece ku Nyumba ja AMBUJE.

¹⁹ Wapali mtendele mcilambo ca Yuda mpaka mcaka ca 35 ca ucimwene wa Asa.