2 Mbi 14 - Chiyawo Bible

Mwenye Asa ŵapundile ŵandu ŵa ku Ifiyopiya

¹ Mwenye Abiya ŵawile nipo ŵasicile ku malembe ga mu msinda wa Daudi.* Kaneko Asa mwanagwawo Abiya ŵajinjile ucimwene nipo pa ndaŵi jiŵalamulilaga ku Yuda, nipo kweleko kwapali mtendele kwa yaka 10.

² Asa ŵatesile yambone yakwasangalasya AMBUJE,* Mlungu jwakwe.

³ Jwalakwejo ŵagumwile malo gakupelecela mbopesi kwa milungu ja cilendo, ni malo gakulambilila milunguji, nipo ŵagumwile cilandanyo ca Ashela mlungu jwakusepa.

⁴ Kaneko Mwenye Asa ŵalamwile ŵandu ŵa ku Yuda kuti atendeje lisosa lya AMBUJE, Mlungu juŵalambilanga acinangolo ŵawo, kuti soni agapikanileje ni malamusi ni yigakwiganya.

⁵ Cilambo ca Yuda caliji pa mtendele pa ndaŵi jiŵalamulilaga Mwenye Asa, ligongo lyakuti ŵagumwile malo gakulambilila milungu jakusepa ni malo gakupelecela mbopesi.

⁶ Ŵataŵile misinda jakulupucilamo ku Yuda, ligongo lyakuti cilamboco caliji pa mtendele. Mwenye Asa nganaputa soni ngondo pa ndaŵi jelejo, pakuŵapo AMBUJE ŵampele mtendele.

⁷ Ŵasalile ŵandu ŵa ku Yuda kuti, “Kwende tujicinjilicisye misindaji pakujitaŵila mapupa ni sanja, soni tupanganye matanga ni mbugalilo syakwe. Cilamboci ni cetu, ligongo tutesile lisosa lya AMBUJE, Mlungu jwetu. Atucinjilicisye uwe ni kutulolela kutyocela kwa amagongo ŵetu.” Myoyo ŵandu ŵala ŵataŵile yeleyo nipo yajendelaga cenene.

⁸ Mwenye Asa ŵakweti asilikali ŵa ngondo ŵakwana 300,000 ŵakutyocela ku Yuda, asilikaliŵa ŵakweti yakucijila ni mipamba, ŵapali soni asilikali ŵane ŵa ku Benjamini ŵakwana 280,000 ŵele ŵiŵakweti yakucijila ni mawukunje. Asilikali wosopewo ŵaliji ŵamacili soni ŵakulimba mitima.

⁹ Sela jwa ku Ifiyopiya ŵajile kuputa ngondo ni asilikali wa ku Yuda, jwalakweju ŵajigele likuga lyakwe lya asilikali ŵakwana 1,000,000, ni mageleta 300 nipo ŵajile kwika mpaka ku Malesha.

¹⁰ Asa ŵajile kumenyana nawo nipo asilikali ŵambali syosope ŵaliŵicile cile kuti kuputa ngondo ku Ciŵata ca Shefata ku Malesha.

¹¹ Nipo Asa ŵapopesile kwa AMBUJE kuti, “AMBUJE, Mlungu, pangali ŵane ŵakwapunda wawo ŵa mpaka atukamusye uwe sikati ja ŵandu ŵamacili ni ŵandu ŵangali macili. AMBUJE, Mlungu, atukamusye uwe pakuŵapo tukulupilila mwa wawo, nipo uwe tuyice kuputa ngondo ni asilikali ŵamaciliŵa mu lina lya wawo. AMBUJE, wawo ni Mlungu jwetu, pangali mundu jwa mpaka ŵapunde wawo.”

¹² AMBUJE ŵamkamucisye Asa pamo ni asilikali ŵakwe wa ngondo pakwapunda ŵandu ŵa ku Ifiyopiya nipo ŵatisile.

¹³ Nambo Asa pamo ni asilikali ŵakwe ŵa ngondo ŵatopwesye jemanjajo mpaka kuja kwika ku Gelali. Asilikali ŵa ngondo ŵa ku Ifiyopiya ŵawulajidwe wosope mwakuti pangali ni jumo jose juŵaliji cijumi. AMBUJE ŵagonjesye jemanjajo pamo ni asilikaliŵawo ŵa ngondo nipo asilikali ŵa Asa ŵajigele yindu yosope yiyaliji ya asilikali ŵa ku Ifiyopiya.

¹⁴ Kaneko ŵajonasile misinda jesope jakusyungulila ku Gelali, ligongo ŵandu ŵaŵatamaga m'misindamo ŵajogopaga AMBUJE. Asilikali ŵa ngondo ŵa Mwenye Asa ŵasumwile katundu m'misinda jesope, pakuti mwaliji mwana yindu yejinji.

¹⁵ Ŵajile soni kukwatanda ŵakucinga yilangwa kumalo kuŵatamaga, nipo ŵapasulenye macinga gawo, nipo ŵajigele ngondolo, mbusi, ni ngamila* syejinji. Kaneko ŵawujile ku Yelusalemu.