2 Mbi 13 - Chiyawo Bible

Ngondo sikati ja Mwenye Abiya ni Yelobowamu

¹ Mcaka ca 18 ca ucimwene wa Lehobowamu, Abiya ŵajinjile ucimwene wa ku Yuda.

² Ŵaliji mwenye jwa ku Yelusalemu kwa yaka yitatu. Mamagwe ŵaliji Mikaya mwanace jwamkongwe jwa Uliyele, ŵa mu msinda wa Gibeya. Kwapali kumenyana sikati ja asilikali ŵa Abiya ni asilikali ŵa Yelobowamu.

³ Asilikali ŵa Abiya ŵapali 400,000, nipo asilikali ŵa ngondo ŵa Yelobowamu ŵapali 800,000 ŵiŵamenyanaga ni asilikali ŵa Abiya.

⁴ Asilikaliŵa ŵasongene ku cilambo ca matumbi ga Efelemu. Mwenye Abiya ŵajimi penani pa Litumbi lya Shemalayimu, ni ŵatite kuti, “M'mwe Yelobowamu pamo ni Aisalaeli wosope, mpikane maloŵe ganguga.”

⁵ “Ana ngamkumanyilila kuti AMBUJE.* Mlungu juŵamlambilaga Aisalaeli, ŵatesile cilanga* ni Daudi* cakuti tacipeleka ucimwene wa cilambo ca Isalaeli kwa Daudi ni kwa ŵanace ŵakwe mpaka kalakala?

⁶ Nambo Yelobowamu mwanace jwa Nebati ŵamjimucile Solomoni, mwenye jwawo.

⁷ Kaneko ŵandu ŵane ŵangalumbana ŵamtendele cipongwe Lehobowamu mwanace jwa Solomoni pa ndaŵi jele Lehobowamuwo ŵaliji mcanda jwangalimba mtima ni jwangamanyilila kulimbana nawo.

⁸ Sambano jemanja mkusaka kulimbana ni ucimwene wa AMBUJE wawupelece kwa ŵanace ŵa Daudi. Jemanja mkwete likuga lyekulungwa lya asilikali nambo soni mkwete milungu jakusepa ja ŵanace ŵa ng'ombe jiŵampanganyicisye Yelobowamu kuti jiŵe milungu jenu.

⁹ Jemanja mwatyosisye ŵakutaga mbopesi ŵa AMBUJE ni ŵanace ŵacalume ŵa Aloni* ni Alefi. M'malo mwakwe mwalisagulile mwacimsyene ŵakutaga mbopesi ŵenuŵenupe mpela mwakusatendela ŵandu ŵa yilambo yine. Mundu jwalijose juŵayikaga ali ajigele ng'ombe kapena ngondolo syakwana msano ni siŵili ni cakulinga cakuti akasipelece kwa AMBUJE, mundujo ŵaŵaga jwakutaga mbopesi jwakujitumicila milungu ja unami.

¹⁰ “Nambo uwe tukwatumicila AMBUJE, Mlungu jwetu, soni ngasitwaleka. Ŵanace ŵacalume ŵa Aloni akutumicilaga mpela ŵakutaga mbopesi mwakamusyana ni Alefi.

¹¹ Kundaŵi ni ligulo lililyose jemanjajo akupelekaga mbopesi syakutinisya kwa AMBUJE. Akupelekaga soni mkate wele ŵawuyikaga pa tebulo ja golidi,* nipo ligulo lililyose akupambaga nyali pa yakuŵikapo nyali yele ŵayipanganyisye ni golidi. Uwe tukusakuya Malamusi ga AMBUJE, Mlungu jwetu jumwamkanile jemanja.

¹² Mlungu jikape ali mlongola jwetu soni ŵakutaga mbopesi ŵakwe ali apano ni malipenga gawo gitacigomba pakutuŵilanga uwe kuti tuyice kuputa ngondo ni jemanja. Ŵandu ŵa ku Isalaeli, mkalimbana ni AMBUJE, Mlungu jwa acinangolo ŵenu, ligongo jemanja ngaŵa mkupunda.”

¹³ Pa jele ndaŵijo Yelobowamu ŵaliji ali atumisye kala asilikali ŵakwe ŵa ngondo kuti akalimbane ni asilikali ŵa ngondo ŵa ku Yudeya pakwapitila kunyuma jemanjajo, nipo asilikali ŵane wosope ŵaliji kusogolo.

¹⁴ Asilikali ŵa ku Yudeya ŵala piŵalolite, ŵayiweni kuti asyungulilidwe ni amagongo ŵawo. Kaneko ŵapopesile kwa AMBUJE kuŵenda cikamucisyo, nipo ŵakutaga mbopesi ŵaliji mkwimba malipenga.

¹⁵ Asilikali ŵa ngondo ŵa ku Yudeyawo ŵagumisile mnope, mwakulongoleledwa ni Abiya nipo Mlungu ŵamlepelekasisye Yelobowamu pamo ni asilikali ŵa ku Isalaeli.

¹⁶ Aisalaeli ŵatisile, nipo Mlungu ŵakamucisye asilikali ŵa ku Yuda pakwapunda Aisalaeliwo.

¹⁷ Abiya pamo ni asilikali ŵakwe ŵa ngondo ŵawuleje asilikali ŵa ku Isalaeli ŵakwana 500,000.

¹⁸ Myoyo ŵandu ŵa ku Yuda ŵapundile Aisalaeli pakumenyanako, ligongo lyakuti jemanjajo ŵakulupililaga mwa AMBUJE, Mlungu juŵalambilanga acinangolo ŵawo.

¹⁹ Abiya ŵapitilisye kwatoposya asilikali ŵa ngondo ŵa Yelobowamu nipo ŵasumwile misinda aji: Beteli, Yeshana, ni Efuloni pampepe ni misi jijaliji ciŵandika ni misindaji.

²⁰ Yelobowamu nganakola soni macili gakulamulila pa ndaŵi jiŵaliji Abiya mwenye, nipo AMBUJE ŵamwuleje Yelobowamujo.

²¹ Abiya ŵapitilisye kuŵa mwenye jwamacili soni jwakupikanika. Ŵakweti acakongwe ŵakwana 14, ŵanace ŵacalume 22, ni ŵanace ŵacakongwe 16.

²² Masengo gosope giŵatesile Abiya, ni yiŵaŵecete yilembedwe mu ngani ja jwakulocesya* Ido.