2 Mbi 12 - Chiyawo Bible

Aiguputo ŵaputile ngondo ni cilambo ca Yuda

¹ Lehobowamu piŵamasile kuwutamilisya ucimwene wakwe, jwalakwe pamo ni Aisalaeli wosope ŵalesile kupikanila lilamusi lya AMBUJE.*

² Myoyo mcaka ca msano ca ucimwene wakwe, AMBUJE ŵapele cilango Aisalaeliwo ligongo lya ungakulupicika wawo, nipo ŵamkundile Mwenye Shishaki jwa ku Iguputo kuti ajinjile mcilambomo ni kuwusumula msinda wa Yelusalemuwo.

³ Piŵasumulaga msindawo, Mwenye Shishaki ŵayice ni mageleta 1,200 ni asilikali ŵakwela pa mahaci ŵakwana 60,000 ni asilikali ŵane ŵangaŵalanjika ŵiŵayice nawo kutyocela ku Libiya, ku Sukimu, ni ku Ifiyopiya.

⁴ Ŵasumwile misinda ja kulupucilamo ja ku Yuda, nipo ŵajesile mpaka ku Yelusalemu.

⁵ Jwakulocesya* Shemaya ŵajile kwa Mwenye Lehobowamu ni kwa acimlongola ŵa ku Yuda ŵele ŵasongene ku Yelusalemu ligongo lyakwatila Sisaki, nipo ŵasalile jemanjajo kuti, “AMBUJE akuŵeceta namwe kuti: ‘Pakuŵapo jemanja mlesile kumbikanila une, none jwakwe nimlesile jemanja, soni ngasinamkamucisya patim'menyaneje ni Shishaki.’ ”

⁶ Kaneko mwenye pamo ni acimlongola ŵa ku Isalaeli ŵala ŵajiticisye kuti alemwisye, ni ŵatite kuti, “AMBUJE ali ŵakulungama.”

⁷ AMBUJE piŵaweni kuti ŵanduwo ajiticisye ulemwa* wawo, ŵasalile Shemaya kuti, “Pakuŵapo ŵanduŵa ajiticisye ulemwa wawo, Une ngasinajonanga jemanjaji, nambo m'malo mwakwe tinjakulupusya myala mwa Shishaki soni ngasimbika lutumbilo lwangu pa msinda wa Yelusalemu,

⁸ nambope taciŵa acikapolo ŵa Shishakiwo, kuti amanyilile ni kulekanganya umbone wakumtumicila Mlungu, ni kusakala kwa kwakwatumicila ayimwene ŵa yilambo yine.”

⁹ Mwenye Shishaki ŵawujimucile msinda wa Yelusalemu, nipo ŵajigele yipanje yosope ya m'Nyumba ja AMBUJE ni ya ku nyumba ja mwenye. Ŵajigele yindu yosope kupwatikapo yakucijila ya golidi* yiŵapanganyisye Mwenye Solomoni.

¹⁰ Panyuma pakwe Lehobowamu ŵapanganyisye yakucijila ya bulonsi, m'malo mwa yakucijila ya golidi yiyajigalidwe yila, nipo ŵayipelece kwa acikapitawo ŵa alonda ŵiŵalondelaga pa yipata ya ku nyumba ja mwenye.

¹¹ Ndaŵi syosope mwenye piŵajinjilaga m'Nyumba ja AMBUJE, alondawo ŵanyakulaga yakucijilayo, nipo kaneko ŵayiwucisyaga mcipinda ca alonda.

¹² Pandaŵi jiŵalinondiye Lehobowamu, AMBUJE nganiŵajonanga ŵelewo mu lutumbilo lwawo, nipo yindu yatandite kwenda soni cenene ku Yudako.

Ya ucimwene wa Lehobowamu

¹³ Mwenye Lehobowamu ŵakwete yaka 41 yakupagwa pa ndaŵi jiŵatandaga kulamulila, nipo ŵalamulile ku Yelusalemu yaka yakwana 17, msinda wele AMBUJE ŵawusagwile sikati ja ngosyo syosope sya ku Isalaeli kuti ŵalambileje AMBUJE kweleko. Mamagwe Lehobowamu ŵaliji Naama ŵakutyocela ku Amoni.

¹⁴ Lehobowamu ŵatesile yakusakala pameso pa AMBUJE pakuti nganasosa kwapikanila AMBUJE.

¹⁵ Masengo gosope giŵatesile Lehobowamu pa ndaŵi jiŵaliji mwenye, mbili ja liŵasa lyakwe, yilembedwe m'mabuku ga ŵakulocesya ŵaŵili aŵa: Shemaya ni Ido. Kaŵilikaŵili Lehobowamu ŵamenyanaga ngondo ni Yelobowamu.

¹⁶ Piŵawile Mwenye Lehobowamu, ŵasicile mwilembe mu msinda wa Daudi,* nipo Abiya ŵajinjile ucimwene m'malo mwa babagwe.