2 Mbi 11 - Chiyawo Bible

Kulocesya kwa Shemaya

¹ Mwenye Lehobowamu piŵayice ku Yelusalemu, ŵaganisisye soni yakuti apute ngondo ni Aisalaeli ni cakulinga cakuti alamulileje soni cilamboco. Myoyo ŵasongenye asilikali ŵakwana 1,800 kutyocela ku ngosyo sya Yuda ni Benjamini.

² Nambo AMBUJE ŵaliji ali amsalile jwakulocesya* Shemaya

³ kuti akasale utengawu kwa Mwenye Lehobowamu ni kwa ŵandu wosope ŵa lukosyo lwa Yuda ni Benjamini kuti:

⁴ “Mkajawula kuputa ngondo ni Aisalaeli. Mundu jwalijose ajawuleje kumangwakwe. Pakuti yeleyi yitendece ligongo lya lisosa lyangu.” Ŵanduwo ŵagapikanile maloŵe ga AMBUJE nipo nganajawula kuputa ngondo.

Lehobowamu ŵataŵile ndenje kusyungulila misinda

⁵ Lehobowamu piŵayice ku Yelusalemu, ŵataŵile misinda jakulicenjela jakuyicisyaji ku Yuda:

⁶ Betelehemu, Etamu, Tekowa,

⁷ Beti Suli, Soko, Adulamu,

⁸ Gati, Malesha, Sifi,

⁹ Adolayimu, Lakishi, Aseka,

¹⁰ Sola, Aiyaloni, ni Hebuloni. Misinda jesopeji jaliji ku cilambo ca Yuda ni Benjamini.

¹¹ Ŵataŵile mapupa gakulimbangana, nipo mu msinda uliwose ŵamŵisile mlongola jwa ngondo. Ŵaŵisilemo soni yakulya, mawuta ga olifi,* ni finyo.

¹² Ŵaŵisilemo soni yakucijila pa ngondo ni mipamba, mwalitala lyeleli misinda ja Yuda ni Benjamini jaliji jakulimbangana nipo Lehobowamu ŵalamulilaga ŵandu ŵa ku Yuda ni ku Benjamini.

Ŵakutaga mbopesi ni Alefi akwika ku Yuda

¹³ Ŵakutaga mbopesi pamo ni Alefi ŵa ku Isalaeli ŵayice kum'mwela ku Yuda kutyocela kuŵatamaga kumkuya Lehobowamu.

¹⁴ Alefi ŵalesile malo gawo gakulicisya yilangwa ni misinda jawo nipo ŵajile kutama ku Yuda ni ku Yelusalemu ligongo lyakuti Mwenye Yelobowamu ŵa ku Isalaeli pamo ni ayimwene ŵaŵajinjile m'malo mwakwe ŵatyosisye Alefi pa masengo gawo ga umbopesi kwa AMBUJE.

¹⁵ Myoyo Lehobowamu ŵasagwile ŵakutaga mbopesi ŵakweŵakwepe kuti akamuleje masengo atumicileje ku malo gakujilambililako milungu ja cilendo, ni malo gane kuŵalambilaga misimu ja kusakala ni tumilungu twakusepa tuŵatupanganyisye mcilandanyo ca ŵanace ŵa ng'ombe.

¹⁶ Nambo ŵandu ŵane ŵaŵasimicisye m'mitima mwawo kuti tiŵalambileje AMBUJE, Mlungu juŵamlambilaga Aisalaeli, ŵakuyaga Alefi ŵala mpaka ku Yelusalemu kuti akapelece mbopesi kwa AMBUJE, Mlungu juŵalambilanga acinangolo ŵawo.

¹⁷ Jemanjajo ŵawutendesye ucimwene wa Yuda kuti uŵe ŵakulimbangana, nipo ŵamkamucisye Lehobowamu mwanace jwa Solomoni kwa yaka yitatu soni ŵakuyaga ndamo ja Daudi* ni Solomoni.

Liŵasa lya Lehobowamu

¹⁸ Ŵamkwawo Lehobowamu ŵaliji Mahalati, mwanace jwamkongwe jwa Yelimoti juŵaliji mwanace jwa Daudi. Mamagwe ŵaliji Abihayilo mwanace jwamkongwe jwa Eliyabu mwanace jwa Yese.

¹⁹ Lehobowamu ni Mahalati ŵakwete ŵanace ŵatatu, mena gawo galiji Yeushi, Shemaliya ni Sahamu.

²⁰ Kaneko Lehobowamu ŵalombile Maaka, mwanace jwamkongwe jwa Abisalomu, nipo ŵakwete ŵanace mcece, mena gawo galiji Abiya, Atayi, Sisa, ni Shelomiti.

²¹ Lehobowamu ŵanonyelaga mnope Maaka mwanace jwamkongwe jwa Abisalomu kwapunda aciŵamkwakwe wosope. Ŵalombele acakongwe ŵakwana 18, nambo soni ŵakwete acakongwe ŵane ŵapambali ŵakwana 60, nipo ŵakwete ŵanace ŵacalume ŵakwana 28, ni ŵacakongwe ŵakwana 60.

²² Ŵamsagwile mwanace jwawo jwamkulungwa lina lyakwe Abiya jwele juŵaŵelecedwe ni Maaka kuti aŵe mwenye.

²³ Lehobowamu ŵaliji ŵalunda mnope, nipo ŵasagwile ŵanace ŵakwe ŵane kuti aŵe ŵakulolela misinda jakulupucila ku madela ga Yuda ni Benjamini mu ucimwene wakwe. Ŵapaga yakulya yosope yiŵasakaga nambo soni ŵasosele jemanjajo acakongwe ŵakuti alombele.