2 Mbi 1 - Chiyawo Bible

Mwenye Solomoni ŵaŵendile lunda

¹ Solomoni mwanace jwa Mwenye Daudi,* ŵatamilicice pa ucimwene wa ku Isalaeli, nipo AMBUJE,* Mlungu jwakwe ŵampele upile jwalakwejo ni ŵamtesile kuŵa mwenye jwamacili mnope.

² Mwenye Solomoni ŵaŵecete ni Aisalaeli wosope, acimlongola ŵakulolela makuga ga ŵandu 1,000, ni makuga ga ŵandu 100, ŵakulamula ŵa boma, acimlongola wosope ŵa ku Isalaeli, ni acakulungwa ŵa maŵasa,

³ kuti ajawule pamo ni jwalakwejo ku malo gakulambila ku Gibiyoni. Ŵanduwo ŵapite kweleko ligongo ni kujaliji tenti ja AMBUJE, jiŵapanganyisye Mose* jwakutumicila jwa AMBUJE mu cipululu.

⁴ (Mkinijikwane ndaŵi jeleji Daudi ŵaliji ali alijigele Libokosi lya Cilanga ca AMBUJE kutyoka nalyo ku Kiliyati Yelimu, nipo ŵajile kukuliŵika ku malo giŵalinganyisye Daudi, pakuti ŵajimice Tenti ku Yelusalemuko).

⁵ Malo gakupelecela mbopesi ga bulonsi giŵapanganyisye Besalele mwanace jwa Uli, cisukulu ca Huli galiji ku Gibiyoni kukoko pasogolo pa Tenti ja AMBUJE. Mwenye Solomoni pamo ni ŵandu wosope ŵalambilaga kweleko.

⁶ Solomoni ŵapite ku malo gakupelecela mbopesi ga bulonsi, gigaliji ku tenti jakusimanilana ja AMBUJE, nipo ŵalambile AMBUJE pa malopo. Ŵawuleje yinyama 1,000 ni kuyipeleka mpela mbopesi jakutinisya.

⁷ Cele ciloco Mlungu jwalilosisye kwa Solomoni, nipo ŵamwusisye kuti, “Ana mkusaka kuti Une nimpe cici?”

⁸ Solomoni ŵajanjile kuti, “AMBUJE, wawo ŵalosisye cinonyelo cekulungwa kwa baba ŵangu Daudi, nambo sambano wawo ambisile une kuti m'mbe mwenye m'malo mwa baba ŵangu.

⁹ AMBUJE, Mlungu, wawo akwanilisye cilanga* ciŵatesile kwa baba ŵangu. Pakuti wawo andesile une kuŵa mwenye jwakwalamulila ŵandu ŵajinjiŵa,

¹⁰ sambano ngwaŵenda kuti ambe lunda ni umanyilisi yele yinguyisoŵa kuti nalamulile cenene ŵandu ŵawoŵa. Nambi naga ngakola lunda, ana tinipakombole uli kwalamulila ŵandu ŵawoŵa?”

¹¹ Nipo Mlungu ŵamjanjile Solomoni kuti, “Msagwile cenene. M'malo mwakuŵenda katundu, yipanje, ucimbicimbi, ciwa ca amagongo ŵenu, kapena umi welewu, m'mwejo mŵendile lunda ni umanyilisi kuti mwalamulile ŵandu ŵangu cenene, ŵinampele m'mwejo kuŵa mwenye jwawo.

¹² Sambano, tinampe lunda ni umanyilisi, nipo kupwatika pa yeleyi tinjimpa katundu, yipanje, ni ucimbicimbi kwapunda ayimwene wosope ŵaŵapali m'mwejo mkanimŵe mwenye, nambo soni ngasawoneka soni mwenye jutacikola yosopeyi msogolo mwenu.”

Yipanje ni macili ga Mwenye Solomoni

¹³ Myoyo Solomoni ŵatyosile ku malo gakulambila gala ku Gibiyoni, kujaliji Tenti ja AMBUJE, nipo ŵawujile ku Yelusalemu, kuŵalamulile Aisalaeli.

¹⁴ Solomoni ŵasongenye mageleta 1,400 ni asilikali 12,000 ŵakwela pa mahaci ŵaŵatamaga nawo ku Yelusalemu, ni ŵane ŵaŵatamaga ku misinda jine ja asilikali ŵa ngondo.

¹⁵ Solomoni piŵaliji mwenye jwa cilambo ca Isalaeli, golidi* ni silifa* jwasimanikaga jwejinji, soni yitela ya mkungusa yasimanikwaga yejinji mpela yitela wamba ya mikuju ja mwilambo.

¹⁶ Ŵandu ŵa malonda ŵa Solomoni ŵasumaga mahaci kutyocela ku Iguputo ni ku Kuwe.

¹⁷ Ŵasumaga yigeleta kutyocela ku Iguputo pa mtengo wa mbiya sya silifa syakwana 600, ni haci pa mtengo wa mbiya sya silifa syakwana 150. Panyuma pakwe ŵandu ŵa malondaŵa ŵasumisyaga mahaci ni mageletago kwa ayimwene ŵa ku Hiti ni ku Siliya.