2 Ayi 4 - Chiyawo Bible

Elisha akumkamucisya jwamkongwe jwamasije

¹ Lisiku line jwamkongwe jwamasije jwa jumo jwa ŵakulocesya ŵa AMBUJE* ŵamsalile Elisha kuti, “Ŵamkwangu ŵiŵaliji ŵakutumicila ŵenu, ŵawile. Soni ŵalakwe akumanyilila kuti ŵamkwanguwo ŵaliji mundu jwakwajogopa Mlungu. Sambano ayice mundu juŵamkongwele malemu ŵamkwanguwo mbiya syakwe, nipo sambano akusosa kwajigala ŵanace ŵangu ŵaŵili ŵacalume, kuti aŵe acikapolo ŵakwe ligongo lya ngongolejo.”

² Elisha ŵamwusisye jwamkongwejo kuti, “Sambano wawo akusaka kuti natendele cici? Asale, akwete cici m'nyumba jawo?” “Nganingola kandu m'nyumba mwangu, akaŵe kabotolo kamawuta gakutelecela basi.” Jwajanjile myoyo jwamkongwejo

³ Papopo Elisha ŵamsalile jwamkongwejo kuti, “Mjawule mkajasime ulo syejinji kwa acimjenu. Patimkamale kwasima malulo gejinjigo,

⁴ m'mwejo ni ŵanace ŵenu mkajinjile m'nyumba mwenu ni mkaliwugalile. Mkapungulile mawuta m'ma ulo gosopego. Lulo lululose lutimkagumbasye ni mawuta mkaluŵiceje pambali.”

⁵ Jwamkongwejo ŵajawile kuja kwinjila m'nyumba mwakwe, ni ŵaliwugalile pamo ni ŵanace ŵakwe ŵaŵili ŵala. Ŵajigele kabotolo kamawuta kala ni ŵatandite kupungulila mawuta mlulo. Jwalakwejo ŵatiji naga ali agumbesye lulo lumo ni mawuta, ŵanace ŵakwe ŵala ŵapelekaga lulo lwine.

⁶ Ali amasile kugumbasya ulo syosope ni mawuta, jwamkongwejo ŵamsalile jumo jwa ŵanace ŵakwe kuti ajigale lulo lwine kuti ataje mawuta. Mwanacejo ŵasalile mamagwe kuti, “Pangali soni lulo lwine lusigele.” Ndaŵi jijojo mawuta galesile kopoka mkabotolo kala.

⁷ Myoyo jwamkongwe jula ŵajawile kuja kumsalila Elisha, mundu jwakulocesya* jwa Mlungu. Nipo Elisha ŵamsalile jwamkongwejo kuti, “Jawulani mkasumisye mawutago, mbiya sitimkapatesyo mkalipile ngongole syenu syosope. Mbiya syakusigalasyo sikaŵe syakumkamucisya m'mwejo ni ŵanace ŵenu.”

Elisha akumsyusya mwanace jwa jwamkongwe jwa ku Shunemu

⁸ Lisiku line Elisha ŵajawile ku Shunemu, kuŵatamaga jwamkongwe jwine jwakusicila. Jwalakwejo ŵamkalibucisye Elisha yakulya ku nyumba jakwe. Kutandila pelepo, Elisha ŵatiji naga kwika ku Shunemu, ŵalyaga yakulya ku nyumba ja jwalakweju.

⁹ Pali papite ndaŵi, jwamkongwejo ŵasalile ŵamkwakwe kuti, “Sambano ngumanyilila kuti mundu jwakusayikayika apanoju ali jwakulocesya jwa Mlungu.

¹⁰ Kwende tumtaŵile kacipinda kakanondi pacanya pa msakasa wa nyumba jetu, nipo tumŵicile cindanda, tebulo, mpando ni nyali, kuti atameje mwelemo ndaŵi jilijose jakwika kutujendela.”

¹¹ Lisiku line Elisha ŵayice soni ku Shunemu, ŵajinjile mkacipinda mula kuti akapumule.

¹² Ŵamsalile Gehasi jwakutumicila jwakwe kuti amŵilanje jwamkongwe jula. Gehasi ŵamŵilasile jwamkongwejo.

¹³ Pa ŵayice jwamkongwejo, Elisha ŵamsalile Gehasi kuti, “Mumwusye jwamkongweju yakusosa kuti namtendele, pakusosa kumtogolela pa yindu yambone yatutendele uweji. Kapena akwete maloŵe gakuti tukadandawulile kwa mwenye, kapena kwa jwamkulungwa jwa ngondo?” Jwamkongwejo ŵajanjile kuti, “Une ndili pa mtendele pasikati pa acalongo acimjangu.”

¹⁴ Elisha ŵamwusisye Gehasi kuti, “Nambi sambano tumtendele cici jwamkongweju?” Jwalakwe ŵajanjile kuti, “Pepani, jwamkongweju nganakola mwanace jwamlume, nipo ŵamkwakwe ali ŵacekulupe.”

¹⁵ Elisha ŵatite, “Mwaŵilanje soni.” Jwamkongwejo piŵamŵilasile, ŵayice ni ŵajimi pa mlango.

¹⁶ Elisha ŵamsalile jwamkongwejo kuti, “Ndaŵi ja mpela jinojino caka ca malaŵi, timciŵa mli kulolosya mwanace jwenu jwamlume myala mwenu.” Jwamkongwejo jwajanjile kuti, “Conde ambuje ŵangu, akasalambusya une, ŵalakwe ali mundu jwa Mlungu.”

¹⁷ Jili jipite miesi panandi, jwamkongwejo ŵakwete cilu. Ŵaŵelece mwanace jwamlume, ndaŵi jilajila mpela muŵaŵecetele Elisha.

¹⁸ Lisiku line, mwanace jula ali akusile, ŵajawile ku migunda ni babagwe, kweleko ŵamasengo ŵaliji mkukata tiligu.

¹⁹ Mwacisisimucila mwanace jula ŵalisile mwagumila kwa babagwe kuti, “Ngondone! Mtwe wangu! Mtwe wangu une!” Babagwe ŵamsalile jumo jwa ŵamasengo ŵakwe kuti, “Mumjigale mwanaceju, mkampelece kwa mamagwe.”

²⁰ Jwamasengo ŵamnyakwile mwanace jula, ni ŵajile kumpeleka kwa mamagwe. Mamagwe ŵampakete mwanacejo pa makongolo mpaka musi, nipo mwanacejo ŵawile.

²¹ Jwamkongwejo ŵamnyakwile mwanacejo niŵajile kumŵika mcipinda capenani ca Elisha, ŵamgonece pa cindanda, ni ŵamwugalile mwelemo, jwalakwe ni ŵakopwece.

²² Ŵaŵilasile ŵamkwakwe, ni ŵasalile kuti, “Mundumicisye mundu jwamasengo jumo ni bulu jumo, kuti njawule kwa Elisha jwakulocesya jula, ni kuwuja citemacitema.”

²³ Ŵamkwakwe ŵala ŵamwusisye kuti, “Ligongo cici akwawula kwa jwalakwejo lelo? Lelo nganiliŵa lisiku lya Sabato kapena lyuŵa lya cindimba Cakuwoneka Mwesi.” Jwamkongwe jula ŵajanjile kuti, “Yangali kandu.”

²⁴ Papopo jwamkongwejo ŵakwesile bulu, ni ŵamsalile mundu jwamasengo jula kuti, “Kwende tujawuleje, mumwutusye buluju mnope, mkasimtondoya kuwutuka, mpaka pa tinamsalile une.”

²⁵ Ŵawutandite ulendo wakwawula Kwitumbi lya Kalimeli kuja kuŵecetana ni Elisha. Elisha ŵam'weni jwamkongwe jula kwakutalicila ali mkwisa, ni ŵamsalile Gehasi jwakutumicila jwakwe kuti, “Mlole pesipo, jwamkongwe jwa ku Shunemu jula ali mkwisa.

²⁶ Mkamcingamile, ni mkamwusye kuti, ‘Ana kwambone? Nambi ŵamkwenu ni mwanace jula ali uli?’ ” Jwamkongwe jula ŵamjanjile Gehasi kuti, “Elo, ali cenene.”

²⁷ Nambo piŵayice kwitumbi kwa Elisha, jwamkongwejo ŵatindiŵele, ni ŵakamwile sajo sya Elisha. Gehasi ŵayice kuti amtute. Nambo Elisha ŵamsalile kuti, “Mumlece, ana ngamkulola kuti jwalakweju ali pa yisawusyo yekulungwa mnope? Nambo AMBUJE nginasalila une kandu kalikose.”

²⁸ Jwamkongwejo ŵatite kwa jwalakwe, “Ana ambuje, naŵendile ŵalakwe une mwanace? Ana ngininasalila kuti akalambusya une?”

²⁹ Elisha ŵamsalile Gehasi kuti, “Mliŵicile cile! Mjawule mwacitema, pakwawula mjigale simbo jangu. Naga mkusimana ni mundu jwalijose petala, mkasimumkomasya, soni naga mundu jwine akumkomasya m'mwejo, mkasimumjanga. Patimkayice ku nyumbako, mkagonece simbo janguji pa mtembo wa mwanacejo.”

³⁰ Nambo mamagwe mwanacejo ŵamsalile Elishajo kuti, “Ngulumbila pali AMBUJE ŵangu ŵacijumi, ni soni pameso pa ŵalakwe kuti une nginaleka ŵalakwe.” Myoyo Elis ŵalongene najo jwamkongwejo.

³¹ Gehasi ŵalongolele, nipo ŵajile kugoneka simbo jila pa mtembo wa mwanace jula, nambo nganigapikanika maloŵe kapena cimanyisyo cine cakulosya umi. Nipo ŵawujilile kuja kusimana ni Elisha, ni ŵamsalile kuti, “Mwanace jula nginajimuka.”

³² Piŵayice Elisha ku nyumbako, ŵajinjile mcipinda mwakwe mula ni ŵam'weni mwanace jwam'we ali amgonece pa cindanda cakwe cila.

³³ Ali ajinjile ŵawugele litanga ni ŵapopesile kwa AMBUJE.

³⁴ Myoyo ŵamgonele ni kulitambasukula pacanya pa mwanacejo, pakamwa pakwe pakwayene ni pakamwa pa mwanacejo, meso gakwe gakwayene ni meso ga mwanacejo, ni makono gakwe gakwayene ni makono ga mwanacejo. Cilu ca mwanacejo catandite kola mtukuta piŵalitambasukulaga Elisha pacanya pa cilu ca mwanacejo.

³⁵ Elisha ŵajimwice, ni ŵajesile akunakuku mcipindamo. Kaneko ŵajawile soni kuja kumgonela mwakulitambasukula pacanya pa mwanace jula, mwanacejo ŵajesemukwile kasano ni kaŵili, nipo meso gakwe galolite.

³⁶ Elisha ŵamŵilasile Gehasi ni ŵamsalile kuti, “Mkaŵilanje mamagwe mwanaceju ayice akuno.” Jwalakwe ŵajawile kuja kwaŵilanga. Piŵayice mamagwewo, Elisha ŵatite, “Mwanagwenu aju.”

³⁷ Jwamkongwejo ŵatindiŵele pasi pa sajo sya Elisha, ni ŵajinamisye mtwe wakwe pasi. Kaneko ŵamjigele mwanace jwakwe jula, ni ŵakopwece najo pasa.

Elisha akutenda yindu yakusimonjeka yine yiŵili

³⁸ Panyuma pakwe, Elisha ŵawujile soni ku Giligala, nipo mcilambomo mwaliji mwana sala. Lisiku line Elisha ŵaliji mkwiganya likuga lya ŵakulocesya, nipo pali papite ndaŵi, ŵamsalile jwakutumicila jwakwe kuti, “Ŵikani ciwulugo cekulungwa pamoto, mwatelecele yakulya ŵandu ŵa mwikuga lya ŵakulocesyaŵa.”

³⁹ Jumo jwa ŵakulocesyawo ŵajawile kwitinji kuja kukaŵa mboga. Kweleko ŵajisimene mipeleya ja mwitinji, ni ŵakaŵile yisogosi yakwe, ni ŵagumbesye mu nguwo jakwe yisogosi yakuwoneka mpela mbonda sya mwitinji. Ŵayice nayo nipo ŵayikatenyekatenye, ni ŵayitasile mciwulugo mula, nambo nganamanyilila kuti yaliji yikoko ya kuŵaŵa.

⁴⁰ Ŵapakwile ni kwapa ŵanduwo kuti alye. Nambo piŵayipasisye yakulyayo, ŵanduwo ŵagumisile ŵatite kuti, Elisha, “Mwana yikoko yakuŵaŵa mciwulugomu! Ngatupakombola kulya.”

⁴¹ Elisha ŵasalile kuti, “Myice nawo utandi.” Jwalakwe ŵawutasile utandiwo mciwulugo mula, ni ŵatite, “Mwapakulile soni ŵanduwo yakulyayo kuti alye.” Nipo ŵasimene kuti mwaliji mwangali yikoko yakuŵaŵa yila, nipo ŵalile.

⁴² Lisiku line mundu jwakutyocela ku msinda wa Baala Shalisha ŵayice kwa Elisha ali amjigalile yakulya yanagowola pejo, ni mitanda ja mikate makumi gaŵili jetelece ni utandi wa balele jwa nagowola pejo. Yosopeyi ŵayijigalile mu msaku wakwe. Elisha ŵamsalile jwakutumicila jwakwe kuti, “Mwagaŵile ŵandu ŵakulocesya yakulyayo kuti alye.”

⁴³ Nambo jwakutumicila jwakwe ŵajanjile kuti, “Yakulyayi ngiyikwanila kwagaŵila ŵandu 100 wosopeŵa.” Elisha ŵamsalile kuti, “Mwagaŵile ŵanduwo kuti alye, pakuŵa AMBUJE akusala kuti, ‘Ŵanduwo talye yakulyayo nipo yine tiyisigale.’ ”

⁴⁴ Myoyo jwakutumicila jula ŵagaŵenye ŵanduwo yakulyayo, nipo ŵalile, mpaka yine yasigele, mpela muŵaŵecetele Ambuje.